1 Tiseɓé nui Eli, nii é ɠɛni ga Galaade yooi zu nui ta, naa ɠɛni Akaɓe ma: «Gè ɠonaa Ɠɔoɠɔ GALAGI ma, nii é vulua, Izilayɛle ná-GALAGI gè botii ɠɛɛzu bɛ, konagi niiti ti ʋaazu, duɓu la ʋua, tona la ʋua, kɛni ni nà falina.»

2 Naama wooi ʋoluma, Ɠɔoɠɔ GALAGI ɓɔɛni Eli ʋɔ, é ɠɛ ma: 3 «Zeɠe ʋɛ, è li folo ɠulazu ʋelei. Lɔɔɠu Kelite kɔtuɗɛi ma ʋɛtugi zu, nii é folo ɠulazu ʋelei ziɛ wolai Zuludɛn ɠobaʋɛ. 4 Kɔtuɗɛi naa ɠa é ɠɛɛzu ga ɗa-ɓɔɔle ɗɛi, gè devei vea kalawɔniiti zea ga ti ɗa è ɠɔnɔkula ná.»

5 Eli liini, é naa ɠɛ, nii Ɠɔoɠɔ GALAGI boni ma. É liini, é zei Kelite kɔtuɗɛi ɠobaʋɛ, nii é folo ɠulazu ʋelei ziɛ wolai Zuludɛn ɠobaʋɛ. 6 Kalawɔniiti ti ɠɛni liizu pɔ ga ɓului ta suai sobui ta kpɔkɔ, é ɠɛni ɓɔɔlezu ga kɔtuɗɛi. 7 Kɛlɛ yeeɠɛɠalai tanigaa laawu, kɔtuɗɛi vɔɔni, mazɔlɔɔ tona la mɔ ɠɛni ʋuuzu zooi zu.

8 Ɠɔoɠɔ GALAGI ɓɔɛni pɔ naazu, é ɠɛ ma: 9 «Wuzeɠe, è li Salɛpɛta, Sidɔn yooi zu, è zei ná. Gè devei veeʋɛ poanzai ta ya, ga é ɗa è ɠɔnɔkula miná.»

10 Eli wuzeɠeni, é li Salɛpɛta. Taa ziɠidaʋɛ, é poanzai ta ɠaani, é ɗa koʋii yɛʋɛ. Eli tolini, é ɠɛ ma: «Ni ɗa kɛɛna, li kae, è ʋa bɛ̀ ga ziɛi tago ziɛ liɠii zu, gè ɓɔɔle.» 11 Naa liizuʋɛ ʋaazu ga ziɛi, é naa lolini ʋolu, é ɠɛ ma: «Ni ɗa kɛɛna, è ʋa ɓalaa ga ɓulu ɓuɠa ɠila pɔ̀.»

12 Kɛlɛ poanzai ɠɛni ma: «Gè ɠonaa ɗa-ƓALAGI, Ɠɔoɠɔ GALAGI ma, nii é vulua, ga ɓulu ɓuɠa ɠila kpalaa ge la zèa pɛlɛi wu. Zee zakpa ɲɛ gila nɔ ɠa é zèa aniɲakai zu ga ɓulu vukɔi, ta gulɔi tago nɔ ɠa é zèa gulɔ woolei zu. Gè ɠɛa ʋaani koʋi ɓuɠa felegɔ yɛʋɛzu, gè li, gè naa mɔta goi ɓɛtɛ dòun zunui ʋɛ. Gá miina, ani ɠili ge la mɔ gi ya, kɛni niina nɔ gi zei, gi ɗa saai maaɓɔun.»

13 Eli ɠɛni ma: «Mina lua. Li, è naa ɠɛ, nii è bogai, kɛlɛ nii é è yeewu, ɓulu ɠila kpɛtɛ dɛ ga naa nɔ̀un bɛ, è ʋaa la pɔ̀, ɗa li niina, è ta ɓɛtɛ wo ʋɛ, wa è-loun zunui. 14 Mazɔlɔɔ Ɠɔoɠɔ GALAGI, Izilayɛle ná-GALAGI wooi ɠaa: ‹Ɓulu vukɔi ma aniɲakai zu la ʋalaga pɛ, ta gulɔ woolei zu la ʋalaga pɛ, eyɛsu naama voloi zeeli, yeei Ɠɔoɠɔ GALAGI tonai ʋuuzu la zooi ma.› »

15 É liini, é naa ɠɛ, nii Eli boni ma. Tama, daamianigi ɠɛni zea yeeɠɛɠala zuɠooza daawu, tɔ-o, ná-pɛlɛyeɠei-yo, naa ʋɛɛ Eli ʋa. 16 Ɓulu vukɔi la ʋalani aniɲakai zu, gulɔi la ʋalani goolei zu, eɠɛʋelei nɔ Eli Ɠɔoɠɔ GALAGI laawooi woni da ma.

17 Niima vaiti pɛ poluma, poanzai é yeezeini Eli wu, naa ná-doun zunui zeeɓɛni, seeɓɛi ɓɔi, é za. 18 Dee ɠɛni ma: «GALA goo wo nui, leeni ɠa é de yɔɠɔzu? È ʋaaʋɛ ga è kì too nà-faaɠaaza golaiti, ta è ɠɛ ga dòun zunui zaa zaɓui ɓaa?» 19 Eli ɠɛni ma: «È-loun zunui ve zèa.» É naa ɠulani anzanui yeeloko zu, é lɛɛ la geezu ʋɛlɛi wu, ʋɛ ti daazuʋɛɛni ná, é da ná-betei zu. 20 Naa ʋoluma é Ɠɔoɠɔ GALAGI maanɛɛnɛni ɠani: «Ɠɔoɠɔ GALAGI, ɗɛi è ga nà-GALAGI, poanzai nii ɓalaa é yeezeiɗai bù ná-pɛlɛi wu, ɗa pɔ è ma ɲɔi zei ma, ga è ná-doun zunui ʋaa?» 21 É zakpa maalɛɛ daa ɠɛɛni doungoi ma ga saʋagɔ, é ɗa Ɠɔoɠɔ GALAGI maanɛɛnɛ ɠani: «Ɠɔoɠɔ GALAGI, nà-GALAGI, nà è maanɛɛnɛzu, doungoi nii yɛnvui ʋu su ʋolu!» 22 Ɠɔoɠɔ GALAGI Eli woomɛnini, é doungoi yɛnvui ʋuuni su ʋolu, naa tɔɔzei mɔnɔ ga yɛnvua.

23 Eli doungoi zeɠeni, é yei la buu ʋele ʋɛlɛi wu, é fe dee ya, é ɠɛ ma: «Wɛlɛ, è-loin ɠa vulua!» 24 Anzanui ɠɛni Eli ma: «Gè kwɛɛga niizu ga ɗa ga GALA goo wo nu ɓɔɠɔɓɔɠɔ, ta ɗa Ɠɔoɠɔ GALAGI laawooi laazeelizu ga ɠite.»

<- 1 Masagiti 161 Masagiti 18 ->