1 Folo mɔinmɔin ge leʋeni. Foɠo ɓaankpaangi ma ɠona saʋasiɛi ma, Ɠɔoɠɔ GALAGI ɓɔɛni Eli ʋɔ, é ɠɛ ma: «Li, è ɓɔɠɔ lɛ ga Akaɓe, nà ɓe tonai ʋa niina, é ʋu zooi ma.» 2 Eli liini ɓɔɠɔ lɛɛzu ga Akaɓe. Pului wola ɓɔini Samali. 3 Akaɓe Aɓediyase lolini, masa pɛlɛi wu ɠundiɠii. (Aɓediyase ɠɛni ga Ɠɔoɠɔ GALAGI ɠaazuluaba nu wola. 4 Siɛgi zu Zezaɓɛle ɠɛni Ɠɔoɠɔ GALAGI laawoo wo nuiti paazu la, Aɓediyase nu ungila (100) seɠeni ti zaama, é ti lɔɔɠu pugiti su ga nu ʋuulɔɔludɔɔlu, é ɗa ti ɠɔnɔkula ga ɓului ta ziɛi.) 5 Akaɓe ɠɛni Aɓediyase ma: «Leʋena zooi zu ná pɛ ziɛungiti ta kɔtuɗɛiti pɔ bɛ ti, ɓafɔ ɗa tufa wundu ɠaa, nii a kɛ sooiti ta soovale fuuluiti zɛnvu yɛ ti zu, ade mina ʋili togani ʋaa vaa zu.» 6 Ti zooi ɠaaɠwɛɛni ɓɔɠɔ ʋa ga ti suɓizɛ, Akaɓe ɠila ge li ga ná-pele, Aɓediyase ɓalaa tɔ ɠila ge li ga ná-pele.

7 Aɓediyase ɠila kɛai ma pelei zu, é Eli ɠaani, é ɗa ʋa pɔ pelei. Aɓediyase ɠwɛɛsu ɠaani ba, é loo kɔɠɔwu, é laaʋɛ zooi ma, é ɠɛ ma: «Ɗa ɠa nɛi, màliɠii Eli?» 8 Eli ɠɛ ma: «Nà ɠa. Li, è ɠɛ è-maliɠii ma: ‹Eli ɠa é ʋaazu.› » 9 Aɓediyase ɠɛni Eli ma: «Kotoi ɓɛgele ɠa gè kɛai, nɛ̀i gè ga ɗa-wotiɠɛ nui, è tèʋesu Akaɓe ʋɔ ga é pàa? 10 Gè ɠonaa ɗa-ƓALAGI Ɠɔoɠɔ GALAGI ma, nii é vulua, ga zou la yɛni ta masa zooi ta la yɛni, ʋɛ màliɠii la nu leʋeni ná è ɠaiziɛzu. Ni naama yooi zu nuiti ta la ɠɛna ma: ‹É la ʋaani gi ʋɔ bɛ,› kɛni naati ti ɠona mɔnɔ ga ti la è ɠaani. 11 Ɗa ma ka, è ɠɛ gè li, gè ɠɛ màliɠii ma: ‹Eli ɠa é ʋaazu.› 12 Naa ʋoluma nà zeɠena è ɠoba, Ɠɔoɠɔ GALAGI ná-Zɛnvui ɠa ʋaazu é è zeɠe, é li ga ɗe, gè la kwɛɛ mini, gè zɛba gè li, gè ʋoluvaawo Akaɓe ma, a ʋaana, é la è ɠaani, toɠa pàa. Nà ma, ɗa-wotiɠɛ nui, nà luazu Ɠɔoɠɔ GALAGI ʋa kaite mà loungo yee. 13 Màliɠii, ti la naa woni è ma ɓaa, nii gè kɛɛni, siɛgi zu Zezaɓɛle ɠɛni Ɠɔoɠɔ GALAGI laawoo wo nuiti paazu la? Gè GALA goo wo nu ungila (100) dɔɔɠuni ti zaama pugiti su ga nu ʋuulɔɔludɔɔlu, gè ɗa ti ɠɔnɔgi ɠula ga ɓului ta ziɛi. 14 Ɗa ɠa, è ɠɛ gè li, gè ɠɛ maliɠii ma: ‹Eli ɠa é ʋaazu.› Toɠa pàa.»

15 Kɛlɛ Eli ɠɛni ma: «Gè ɠonaa Ɠɔoɠɔ GALAGI, Fai-Pɛ-Maliɠii ma, nii é vulua, nii gè botii ɠɛɛzu bɛ, gaamazu za kɛni gè ɓɔɠɔ lɛ ga Akaɓe.»

16 Aɓediyase liini, é Akaɓe laaɠomi, é ʋoluvaawo naa ma. Akaɓe ɓalaa liini naazu Eli ʋɔ pelei. 17 É Eli ɠaai ma, é ɠɛni ma: «Wɛlɛ ɗa ʋa, ɗɛi è ʋaazu ga maanɔɠɔi Izilayɛle yooi zu!» 18 Eli gooɠaaʋoteni, é ɠɛ ma: «Nà laade, gè ʋa ʋa ga maanɔɠɔi Izilayɛle ma, kɛlɛ wa ʋe, ɗa-o, è-ɠɛɛ ná-pɛlɛyeɠei-yo, mazɔlɔɔ wo ɠɛlɛa Ɠɔoɠɔ GALAGI ná-deveiti ba, wo ɗa lɛbiyai ve Ɓaaleni bɛ. 19 Keela leʋena, é Izilayɛle nuiti pɛ gaalɛ ba kòba Kaalamɛle gizei ma, naa ʋɛɛ Ɓaale ná-gala goo wo nu unnaani puulɔɔlugɔiti (450) ba, ta anzanu ɠalagi Asela ná-gala goo wo nu unnaanigɔiti (400), niiti Zezaɓɛle ti ɠɔnɔkulazu.»

20 Akaɓe keelaiti teʋeni, ti Izilayɛle nuiti kpein gaalɛ ba, ta gala goo wo nuiti, Kaalamɛle gizei ma. 21 Eli maaɓuɠani nuɓusɛiti ba, é ɠɛ ti ma: «Wa yɛsu ada felegɔiti zɔɠɔzu, eyɛsu yeelɛ? Ni Ɠɔoɠɔ GALAGI ɠa é ga GALA, à ʋilɛ polu, ni tama Ɓaale ʋe, à ʋilɛ polu!» Nuɓusɛiti ti la gooɠaaʋoteni ga woo ɠila kpalaa.

22 Eli ɠɛni ti ma: «Nà ɠila ka zɛ̀gai ná ga Ɠɔoɠɔ GALAGI ná-GALA goo wo nui, Ɓaale nɔnɔiti ta ga nu unnaanigɔ puulɔɔlugɔ (450). 23 Ti nikɛ zinɛ felegɔ ve gi ya. Ɓaale ná-nuiti ti yiimazeɠe, ti teʋeleʋe, ti da koʋii maazu, ti mina abu lo ba. Nà ɓalaagi, gè nikɛ zinɛi ɠilagi ɠɛʋele ɓɛtɛ, gè da koʋii maazu, gè mina abu lo ba. 24 Naa ʋoluma à wa-ɠalagi vali, nɔ̀un gè Ɠɔoɠɔ GALAGI vali. Zɔi é ga GALA kitei, naa ɠa é gooɠaaʋotegi veezu ga é abui ɠaazo.» Nuɓusɛiti pɛ ti ɠɛ ma: «Gi vaa naa wu.»

25 Eli ɠɛni Ɓaale ná-gala goo wo nuiti ma: «À yiimazeɠe nikɛ zinɛiti su, wa mɔunpa, mazɔlɔɔ wa ɠa wo mɔinɗai. Naa ʋoluma à wa-ɠalagi vali, kɛlɛ à mina abu ɠaazo.» 26 Ti nikɛ zinɛi zeɠeni, nii ti feeni ti ya, ti zalaɠai ɓɛtɛ, ti tɔɔzei ga Ɓaale maanɛɛnɛa, é zo sobui ma, é zeeli folo gaalɔgai ma, ti ɗa ɠɛ ma: «Ɓaale, gi wooɠaaʋote!» Ti ɗa kua wo zalaɠa ɠulazuʋɛ ɠobaʋɛ, kɛlɛ ti la gooɠaaʋote nɔpɛ sɔlɔɔni.

27 Foloi gaalɔgai ma, Eli tɔɔzeini ga é ɲɛɛɠulaa ti zu, é ɗa ɠɛ ti ma: «À wola wooɠula, mazɔlɔɔ galagi ʋe. Tanisu toɠa ɠisiɛzu fai ta zu, ɓaa ti toli ga gaazuvilɛ adɛ ta, ɓaa toɠa ɠɛ lia siɛ ma, ni naa laade, toɠa ɠɛ ɲiizu, à maaloɠa.» 28 Ti wola ɓainni, ti ɗa gaaɠili ma, ti ɗa ɓɔɠɔ maawana ga boɠa zɔkpɔiti ta kpɛɛinti, eɠɛʋelei ti-ɠɛɛwoti wɔlɔmaiti ti la, ti yɛ su, ɲamai ɗa ɠula ti ʋa. 29 Folo gaalɔgai leʋegai ma, ti ɠɛni Ɓaale lolisu mɔnɔ ga zea laalitaaligi ma mɔinmɔin, eyɛsu kpɔkɔ volo zalaɠa ɠula yeeɠɛɠalai zeeli, kɛlɛ ti la gooɠaaʋote gila kpalaa sɔlɔɔni ga woo ɲɛ gila ɓaa poo gila kpalaa.

30 Eli nuɓusɛiti tolini ga ti ɠaalɛ ba koba. Ti ʋaai ma, Eli tɔɔzeini ga é ɗa Ɠɔoɠɔ GALAGI ná-zalaɠa ɠulazuʋɛ ɓɛtɛ ʋolu, ʋɛ ná ɠoloɠologa ɠɛni de niina. 31 Eli kɔtu puugɔ maazu felegɔ (12) zeɠeni, é zoloo Zakɔɓe mavofodaiti ma wolodamaiti tiegɔi ma. Zakɔɓei naa ɠa Ɠɔoɠɔ GALAGI ɓɔɛni pɔ, é ɠɛ ma: «È-laaseigi ɠa ɠɛ niina ga Izilayɛle.» 32 Kɔtui naati ka é zalaɠa ɠulazuʋɛ ɓɛtɛni ga tiye Ɠɔoɠɔ GALAGI laaseigi zu, é zeɠei leʋe, é kaku zalaɠa ɠulazuʋɛ ma, nii litɛlɛ ʋuusaʋagɔ (30) a zoo ʋuuzu su. 33 É koʋiiti daani ga pagɔ, é nikɛ zinɛi leʋeleʋe, é da koʋiiti maazu. 34 Naa ʋoluma é ɠɛni ti ma: «À ziɛ zaɠa, ɓɔni naanigɔ laave ga ziɛi, wo ti ʋu zalaɠai ta koʋiiti ma.» Ti naa ɠɛɛni. Eli ɠɛni ti ma: «À felesiɛi ɠɛ.» Ti naa ɠɛɛni. É ɠɛni ti ma: «À saʋasiɛi ɠɛ.» Ti naa ɓalaa kɛɛni. 35 Ziɛi yeini, é ɠakuni zalaɠa ɠulazuʋɛ ma, é zeɠei laave.

36 Yeeɠɛɠalai kpɔkɔ volo zalaɠai ɠa ɗa ɠula la GALA bɛ, GALA goo wo nui Eli maaɓuɠani zalaɠa ɠulazuʋɛ ʋa, é ɠɛ ma: «Ɠɔoɠɔ GALAGI, Abalaame, ta Izaake, ta Izilayɛle ta-ƓALAGI, ɛsɛ pɛ ge kwɛɛ za ga ɗa ɠa è ga Izilayɛle ná-GALAGI, nɔ̀un nà ga ɗa-wotiɠɛ nui, ti kwɛɛ ɓalaa ga nii kpein gè kɛa, ɗa ɠa è naama levei veai zèa. 37 Gòoɠaaʋote, Ɠɔoɠɔ GALAGI, gòoɠaaʋote, nii a kɛ niima nuiti ti kwɛɛ ga Ɠɔoɠɔ GALAGI, ɗa ɠa è ga GALA kitei, ta ɗa ɠa è ti-yiiti gaaɠalesu ma è ma ga mɔungi ɠɛʋele.»

38 Ɠɔoɠɔ GALAGI yeeɓeni abui ʋa, é yei, é zalaɠai ta koʋiiti ta kɔtuiti gala, naa ʋɛɛ fufiligi ʋa, é ziɛi vɔ, nii é ɠɛni zeɠei zu. 39 Izilayɛle nuiti ti miná ɠaai ma, ti looni, ti laaʋɛ zooi ma, ti ɗa ɓain, ti ɗa ɠɛ ma: «Ɠɔoɠɔ GALAGI ɠa é ga GALA kitei! Ɠɔoɠɔ GALAGI ɠa é ga GALA kitei!»

40 Eli zɛba é ɠɛ ti ma: «À Ɓaale ná-gala goo wo nuiti so, gila kpalaa ge mina ʋela.» Ti ti pɛ soni, Eli yei ga tiye Kison kɔtuɗɛi laaʋɛ, miná ɠa ti ti ɠɔdaaleʋeni ná.

41 Naa ʋoluma Eli ɠɛni Akaɓe ma: «Li, è daami wo, è ɓɔɔle, mazɔlɔɔ nà tonai woomɛnisu, é ɗa kpunɛ.» 42 Akaɓe liini ga é daamii wo, é ɓɔɔle. Eli ma ge lɛ Kaalamɛle gizei ma, é ʋilɛ ɲiibiɠa zooi ma, é nɔungi ʋilɛ ɲiibiiti zɔɠɔzu. 43 É ɠɛni ná-botiɠɛ nui ma: «Lɛ, é wɛlɛ kpoloɗɛi laa ʋelei.» Naa lɛɛni, é wɛlɛ, é ɠale ma, é ɠɛ ma: «Ani nɔpɛ ge la ná.» Eli teʋe daa ɠɛɛni lɔfela. 44 Dɔfelasiɛi botiɠɛ nui ɠɛni ma: «Tonaɓiin ko ɠa zeɠezu kpoloɗɛi ɠaa ʋelei, é ɗa lɛ. Kɛlɛ é la wɔɔlɔni nu yee zapalagi ʋa.» Eli devei veeni zea, é ɠɛ ma: «Li, è bo Akaɓe ma, é ná-sooiti kɛʋele ɓɛtɛ, é yei fala, tonai mina ʋa pele leʋesu tuɠɔ.»

45 Geei ɠaa ɠɛni liizu ga ɓidia, tɔɔzei tonaɓiingiti ba, fiilɛi ɠɛni ʋaazu la, tona wolai tɔɔzeini ga ʋua, naazu masagi Akaɓe ɠɛni ná-wotoloi zu, é ɗa lɛ Zizeleyɛle taazuʋɛ. 46 Ɠɔoɠɔ GALAGI zɛbɛi veeni Eli ʋɛ, é zaamaɠili dii vai zu, é yɛni ɓizɛzu Akaɓe ná-wotoloi ɠakala, ti zeeli Zizeleyɛle taa loaʋɛ.

<- 1 Masagiti 171 Masagiti 19 ->