Link to home pageLanguagesLink to all Bible versions on this site

1 Ɠɔoɠɔ GALAGI ɓɔɛni GALA goo wo nui Zewu ʋɔ, Ɠanani ná-doun zunui, ga é keela wooi nii laazeeli Ɓaasa ma: 2 «Gè è zeɠeni fufiligi zu, gè è ɠɛ ga nà-nuɓusɛi Izilayɛle nuiti ta-lotuɠɔi, kɛlɛ è ʋilɛga Zeloɓoame ná-kɛʋelei ʋolu, è nà-nuɓusɛiti Izilayɛle nuiti dia kotoi ɠɛɛ vai ma, naa maaʋele ma, è nɔ̀un ziiɠaawana. 3 Naa ɠa é ba, nà è ɓalesu ná, ɗa-o, ɗa-ʋɛlɛyeɠei-yo, nà wo zosu eɠɛʋelei gè Zeloɓoame ná-pɛlɛyeɠei zoni la, Neɓate ná-doun zunui. 4 Ɓaasa ná-pɛlɛyeɠei wu, nui nɔpɛ é zaazu taazuʋɛ, gilɛiti ka ta ma ʋoomai mi, zɔi ma é zaazu dɔɓɔi zu, wɔniiti ka ta naama ʋoomai mi.»

5 Ɓaasa ná-kɛɛwotii mɔtaiti, ta ná-tɔɠɔɠula faiti, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 6 Ɓaasa zaani. Ti maaɠuluni Tiilesa. Ná-doun zunui Ela ɠa é masadai ɠɛɛni potogi zu. 7 Ɠɔoɠɔ GALAGI ɓɔɛni Ɓaasa ta ná-pɛlɛyeɠei ʋɔ, é ɠula GALA goo wo nui Zewu la, Ɠanani ná-doun zunui, tɔɔzei faa felegɔ: mɔunpa, kotoi é kɛɛni, é Ɠɔoɠɔ GALAGI yiiɠaawana ga ná-kɛɛwotiiti, eɠɛʋelei Zeloɓoame ta ná-pɛlɛyeɠei ti kɛɛni la, naa ʋoluma Ɓaasa Zeloɓoame mavofodaiti paa vai.

Izilayɛle masagi Ela
8 Aza ná-kona ʋuufelegɔ maazu lɔzitai (26) ma masadai zu Zuda unda, Ɓaasa ná-doun zunui Ela zeini Izilayɛle unda ga masagi Tiilesa. Kona felegɔ ɠa é kɛɛni masadai zu. 9 Ná-kɔɔɠuluɓai Zimili, nii é ɠɛni kɔɔɠɔ wotoloi ɠilazuʋɛ kpein unda, naa yaavai ɠilini ma. Siɛgi zu Ela ɠɛni la Tiilesa, Aalasa ná-pɛlɛi wu, masa pɛlɛi ma ɠundiɠii, é ɗa dɔɔi ɓɔle eɠɛ nui dɔɔi sogai, 10 Zimili lɛɛni, é paa, é masadai ɠɛɛ naa ʋotogi zu. Naa ɠɛɛni Zuda masagi Aza ná-kona ʋuufelegɔ maazu lɔfelai (27) ma masadai zu.

11 É ɠɛɛni nɔ feya ga masagi, é Ɓaasa ná-pɛlɛyeɠei pɛ undaaʋili, é la zunu ɠila kpalaa zɛni vulua doungo zu, ɓaa kpakolo su ná-pɛlɛwu nuiti saama, ta nui niiti ti ɠɛni polu. 12 Ʋele ɠana Zimili Ɓaasa ná-pɛlɛyeɠei pɛ undaaʋilini la, eɠɛʋelei Ɠɔoɠɔ GALAGI ɓɔɛni la tɔun daalɔɠɔma, é ɠula GALA goo wo nui Zewu la. 13 Naa pɛ ge ɠɛɛni tɔɔzei Ɓaasa ta ná-doun zunui Ela ta-ɠotoiti ba ti ti ɠɛɛni, ta niiti ti Izilayɛle nuiti diini kɛɛ vai ma, ti Ɠɔoɠɔ GALAGI Izilayɛle ná-GALAGI yiiɠaawana ga ta-ɠɔɔɠɔ ganigiti.

14 Ela ná-kɛɛwotii mɔtaiti, ta nii kpein é kɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu.

Izilayɛle masagi Zimili
15 Aza ná-kona ʋuufelegɔ maazu lɔfelai (27) ma masadai zu Zuda unda, Zimili kɛɛni masadai zu ga dɔɔɠɔ ɠila Tiilesa, názu Izilayɛle ɠɔɔʋɛbɛi ɗa Filisiti nuiti ta-laa wolai Giɓeton maaɠaku. 16 Kɔɔɠɔ nuiti ti mɛnigai ma ga Zimili masagi maaɓɔteʋea, é paa, naama volo na nɔ ti yɛni kɔɔlaaɠai zu, ti ta-ɠɔɔɠuluɓai Womeli ɠɛ ga Izilayɛle masagi. 17 Womeli ta ná-kɔɔʋɛbɛi pɛ ti zeɠeni Giɓeton, ti li, ti Tiilesa zei kɛlɛ su. 18 Zimili kaai ma ga taai zoga, é liini, é lɛ dɔɔɠu wosuʋɛ naa ɠɛni masa pɛlɛi wu, é abui ʋili masa pɛlɛi ʋa, é za abui zu. 19 É zaani tɔɔzei kotoiti ba é ti ɠɛɛni, é Ɠɔoɠɔ GALAGI wanama vai ɠɛ, é ziɛ ʋele ɲɔu ga Zeloɓoame ɠɛʋele, nii é Izilayɛle nuiti diini kotoi ɠɛɛ vai ma. 20 Zimili ná-kɛɛwotii mɔtaiti, ta yaavai é gilini, naati sɛʋɛʋɛ Izilayɛle masagiti ta-ɠɛɛwoti zɛʋɛi zu.

21 Izilayɛle nuɓusɛiti ti ɠɛɛni su fele, gilazuʋɛ ʋilɛni Ginate ná-doun zunui Tiɓini ʋolu ga ti kɛ ga masagi, gilazuʋɛ ʋilɛ Womeli ʋolu. 22 Niiti ti ɠɛni Womeli ʋolu, naati ti zobo sɔlɔɔni zɔiti ma ti ɠɛni Ginate ná-doun zunui Tiɓini ʋolu. Tiɓini zaani niina, Womeli zei masadai zu.

Izilayɛle masagi Womeli
23 Aza ná-kona ʋuusaʋagɔ maazu ɠilagi (31) ma masadai zu Zuda unda, Womeli zeini Izilayɛle unda ga masagi. Kona puugɔ maazu felegɔ (12) ɠa é kɛɛni masadai zu. Naama ɠona puugɔ maazu felegɔi (12) zu, é kɛɛni ga kona dɔzita Tiilesa. 24 Naa ʋoluma é liini Semɛɛl ʋɔ bɛ, é Samali ɠizei ɠeya ma ga walii waadɔzita (6.000), é taa wolai lo gizei naa ma, é taai naa laaseigi ʋɛɛ ga Samali. Naama laaseigi ɠulani Seemeel laaseigi zu, nii é zooi ɠeyani ma.

25 Womeli Ɠɔoɠɔ GALAGI wanama vai ɠɛɛni, siɛ ʋelei ɲɔi é leʋe masagiti pɛ ba, ti leʋeni tɔun tuɠɔ. 26 É ziɛ ʋele ɲɔuni ga Neɓate ná-doun zunui Zeloɓoame ɠɛʋele, nii é Izilayɛle nuiti diini kotoi ɠɛɛ vai ma, ta ti Ɠɔoɠɔ GALAGI Izilayɛle ná-GALAGI yiiɠaawana ga kɔɔɠɔ gani kɔɔ vai ti ɠɛni kɛɛzu. 27 Womeli ná-kɛɛwotii mɔtaiti, ta ná-tɔɠɔɠula faiti é ti lɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu. 28 Womeli zaani. Ti maaɠuluni Samali. Ná-doun zunui Akaɓe ɠa é masadai ɠɛɛni potogi zu.

Izilayɛle masagi Akaɓe
29 Aza ná-kona ʋuusaʋagɔ maazu lɔsaʋai (38) ma masadai zu Zuda unda, Womeli ná-doun zunui Akaɓe zeini Izilayɛle unda ga masagi Samali. Kona ʋuufelegɔ maazu felegɔ (22) ɠa é kɛɛni masadai zu. 30 Womeli ná-doun zunui Akaɓe Ɠɔoɠɔ GALAGI wanama vai ɠɛɛni, é ɲɔu é leʋe masagiti pɛ ba, ti leʋegai tuɠɔ. 31 É Neɓate ná-doun zunui Zeloɓoame ná-kotoiti pɛ kɛɛni, naa la ziilɛini, é li, é Sidɔn masagi Eteɓaale ná-doun anzanui Zezaɓɛle vulu, é li vɔlɔ é kɔɔɠɔ ganigi Ɓaale lɛbi, é nɔkɔ bu. 32 É pɛlɛ loni kɔɔɠɔ ganigi Ɓaale ʋɛ Samali, é zalaɠa ɠulazuʋɛ ɓɛtɛ ná. 33 É sale wului ɓadɔni. Naama ɠɛɛwotiiti kpein maaʋele ma, Akaɓe Ɠɔoɠɔ GALAGI, Izilayɛle ná-GALAGI yiiɠaawanani, é leʋe Izilayɛle masagiti kpein ba, ti leʋeni tɔun tuɠɔ.

34 Akaɓe ná-siɛgi zu ɠa Ɓetɛle nui Yiyɛle Zeliko taai loni da ʋolu. Kɔtu mɔungi é daani, naa zu anii ɠɛni ga ná-doun zunu mɔungi Aɓilame, kpegai ma ga pɛlɛla ɓogiti pilɛ, naa zu anii ɠɛ ga ná-doun zunui loungo gelei Seguɓe. Naama vai pɛ ge ɠɛɛni é zoloo wooi naa ma, nii Ɠɔoɠɔ GALAGI boni, é ɠula Nun ná-doun zunui Zozuwe la.

<- 1 Masagiti 151 Masagiti 17 ->