1 [a]Leza waamupaalile Noa pamo ni baana bakue balalume wabaana nangue, “Vyalane musanduluke evi luvyalo lobe lwizuzie kyalo. 2 Nama yonse ya pa kyalo ni tooni tonse twa mu lweleele, ni bilengua byonse bilibyayibula pansi, ni masabi onse a mu lyezi, byaakaba byaunvua mwezo ni kumitiina. Kabili namipeela buvinde pa bintu byonse bya pa kyalo. 3 Nama ya misango yonse ikosele yaakaba bilio byenu nga vinaamipeele saasa ulekenkeene. 4 [b]Inzi tekuti mukaliililile nama pamo ni mulopa wakue, pantu i bukose bwakue. 5 Kisinka naakakita kibwelezi pa mulopa wa bukose bwenu, naakakita kibwelezi ku muntu ni ku nama, ni ku muntu ni muntu nakue. 6 [c]Ozo waakeetila mulopa wa muntu, ni ye mulopa wakue waakeetilua na muntu, pantu muntu waalengelue wapaleene ni Leza.

7 [d] “Inzi mwemue vyalane musanduluke evi luvyalo lobe lwizuzie kyalo.”

8 Kabili Leza waamwanine Noa ni baana bakue balalume nangue, 9 “Unvue, napinghana nenu pamo ni nvyalo yenu. 10 Napinghana na bilengua byonse bikose: Toni tonse, ni nama yonse ya kuteekua pamo ni nama yonse ya mu kisonso imwakifuma nayo mu safina. 11 Napinghana nenu nangue, nene nsikikeenoona kabili bilengua bikose na kibunda. Kabili tekukaba kinge kibunda kyaakeenoona kyalo.” 12 Leza waabaanine nangue, “Kaka i kalangi ka kipingo kinapinghana nenu pamo ni bilengua byonse bikose, kalangi ka muyayaya ku nvyalo yonse ya ku ntanzi. 13 Nabiika mukolanvula mu malezi kuti ube kalangi ka kipingo kinapinghana na kyalo. 14 Naakaba nakita kine nakolonghania malezi, ni mukolanvula wamoneka mu malezi, 15 naakaba nalangakana kipingo kinapinghana nenu, ni nama yonse ni tooni tonse pamo ni bilengua byonse bikose nangue nsikikabinoona kabili na kibunda. 16 Mukolanvula paukaba wamoneka mu malezi, naakaba nakentako kuti nanguluke kipingo kya muyayaya kili pakati kane ni bilengua byonse bikose bya pa kyalo.” 17 Leza waamwanine Noa, “Kaka i kalangi ka kipingo kinapinghana na bilengua byonse bikose bya pa kyalo.”

18 Meena a baana balalume bena Noa baafumine mu safina ni aza: Shemu, ni Hamu, Ni Yafeti. Hamu i waavyele Kanaani. 19 Babo baana batatu balalume bena Noa i babikolue ba bantu bonse baasalangheene mwaya kyalo.

20 Noa wa-alukile mulimi. Kabili i waali wa mambo kulima bukaba bwa mizabibu. 21 Busiku bumo Noa waaminine divai, wakolua, ngubo yakue yaapenukile paali waleele mu liema lyakue. 22 Hamu, se kwa Kanaani, lu-aamwene se waleele bwamba, waile kubwilako Shemu ni Yafeti. 23 Shemu ni Yafeti lubaunvwile evio, baatweme ngubo pa nkombe, babamba kuya nayo kinfwefue mpaka kuya kumuvimba sibo. Bene tebaamukentele sibo waali waleele bwamba. 24 Noa lu-aakololokelue ni kumana vyaakitile mwana wakue Hamu, 25 waalandile evi,