KUTENDEKA 10

Ntundu yaafumine mu baana balalume bena Noa

(1 Milandu Ya Nsiku 1.5-23)

1 Noa waavyele baana batatu balalumenke: Shemu, ni Hamu, pamo ni Yafeti. Babo batatu ni bo baavyele baana balalume pa kyamba kya kibunda.

2 Yafeti waavyele Gomeri, ni Magogi, ni Madai, ni Yavani, ni Tubali, ni Mesheki, pamo ni Tirasi. 3 Gomeri waavyele Ashkenazi, ni Rifati, pamo ni Togarma. 4 Yavani waavyele Elisha, ni Tarshishi, ni Kitimu, pamo ni Dodanimu. 5 Babo i babikolue ba bantu baali baikeele mu bilila. Ezi i nvyalo yakua Yafeti yaali yaikeele kubalua mukowa mu kyalo kyakue. Kubalua libumba lyaali lyalanda lulimi lwakue.

6 Hamu waavyele Kushi, ni Misri, ni Puti, pamo ni Kanaani. 7 Kushi waavyele Seba, ni Havila, ni Sabuta, ni Raama, pamo ni Sabuteka. Raama i waavyele Sheba ni Dedani. 8 Kushi waavyele Nimrodi. Ozo Nimrodi i waali kalwisia wa maka pa kyalo. 9 Waali wali mbwela wa nama mwine mwine ku menso akua Yawe. Ni pakako, bantu balibalanda nangue, “Nga Nimrodi mbwela wa nama mwine mwine ku menso akua Yawe.” 10 Ntendeko ya bukolo bwakue yaali mu Babeli, ni mu Ereki, ni mu Akadi, pamo ni mu Kalne mu kyalo kya Sinari. 11 Nimrodi lu-aafumine koko, waile ku Asuria, wakuulako muzi wa Ninawe, ni muzi wa Rehoboti-Iri, ni muzi wa Kala, 12 pamo ni muzi ukata wa Reseni, muzi uli pa bukata bwa muzi wa Ninawe ni wa Kala.

13 Misri waavyele Baludia, ni Ba-anamu, ni Baleabu, ni Banafutui, 14 ni Bapatrusi, ni Bakaslui. Babo i babikolue ba Bafilistini ni Bakaftori.

15 Kanaani waavyele Sidona waali libeli wakue, kabili waavyele Heti. 16 Kanaani ni ye waali wali kikolue wa Bayebushi, ni Ba-amori, ni Bagirgashi, 17 ni Bahivi, ni Ba-ariki, ni Basini 18 ni Ba-arvati, ni Basemari, pamo ni Bahamati.

Pa kyamba, nvyalo ya Bakanaani yaasalangheene. 19 Mipaka ya kyalo kyabo yaali yafumine ku Sidona yaile lya ku Gerasi mpaka ku Gaza. Kabili yaali yapitile lya ku Sodoma, ni lya ku Gomora, ni lya ku Adima, pamo ni lya ku Seboimu mpaka ku Lasha. 20 Ezi i nvyalo yakua Hamu yaali yaikeele kubalua mukowa mu kyalo kyakue. Kubalua libumba lyaali lyalanda lulimi lwakue.

Bena Shemu

21 Shemu, mukuluube kwa Yafeti, i waali kikolue wa Baeberi bonse. 22 Shemu waavyele Elamu, ni Ashuri, ni Arpakishadi, ni Ludi, pamo ni Aramu. 23 Aramu waavyele Uzi, ni Huli, ni Geteri, pamo ni Mashi. 24 Arpakishadi waavyele Sela. Sela ni ye waavyele Eberi. 25 Eberi waavyele baana babili balalume: Umo waali wakuutua Pelegi,[a] pantu waavyelue musita ubaakaseene kyalo mu mikoa mikoa. Ni unge wainikilue Yoketani. 26 Yoketani waavyele Almodadi, ni Shelefu, ni Asarmaveti, ni Yera, 27 ni Hadoramu, ni Uzali, ni Dikla, 28 ni Obali, ni Abimaeli, ni Sheba, 29 ni Ofiri, ni Avila, pamo ni Yobabu. Babo bonse baali ba mu luvyalo lwakua Yoketani. 30 Kyalo kibaali baikeelemo kyaali kyatendekeele ku Mesha kine ulimukuya ku Sefari ku kapili ka ku kabanga ka kyalo. 31 Ezi i nvyalo yakua Shemu yaali yaikeele kubalua mukowa mu kyalo kyakue. Kubalua libumba lyaali lyalanda lulimi lwakue.

32 Babo bantu bonse ba mu luvyalo lwakua Noa, i ntundu yaafumine mu baana balalume bena Noa, ntundu yaasalangheene mwaya kyalo kyonse pa kyamba kya kibunda.

<- KUTENDEKA 9 KUTENDEKA 11 ->