1 Leza waamulangulukile Noa ni bilengua byonse bikose bi-aali nabio mu safina. Leza waabuusiizie mwela pa kyalo, ni menda aatendekele kuya akama. 2 Monse mwaali mwafuma menda pansi mwaasinkile, lyulu lyaizalikile, ni nvula yaakatile, 3 menda aatwaliliile kuya akama buke buke mpaka nsiku 150. 4 Pa busiku bwa lyanondo ni kilooba mwezi wa kilooba, safina yaikeele peulu mpili ya Ararati. 5 Menda aatwaliliile kukeepa. Mu mwezi wa lyanondo pa busiku bwa mambo, mpili yaatendekele kumoneka.

6 Lupaapitile nsiku 40, Noa waizwile nzota 7 ni kutuma kazooko. Kazooko tekaabwelele, inzi kaali kaya kazyunguluka sie mu lweleele mpaka musita waakamine menda pa kyalo. 8 Kabili Noa waatumine kakunda kaye kamone kine menda akeepa pa kyalo, 9 inzi pantu menda aali teanakame pa kyalo kyonse, kakunda tekaamwene nkendo ya kuya kwikalapo. Ni pakako, kaabweleele kuli Noa. Noa wakakwata ni kukengizia mu safina. 10 Pa kyamba kya mulungu umo, kabili Noa waafumiizie kakunda mu safina ni kukatuma. 11 Bobo bwenka busiku kyungulo, kakunda kaabwelele katweme lyani lya muzeituni ku mulomo. Noa i lu-ainikile nangue menda akeepa. 12 Kabili Noa waapembeele ni unge mulungu. Waatumine kakunda paakale. Lolo lwendo lwene kakunda tekaabwelele.

13 Noa lu-aakumaniizie myaka 601, mu mwezi wa mambo pa busiku bwa mambo, menda aakamine pa kyalo. Noa waatupukwile ntupiko ya safina, ni kiine wamwene menda akamine. 14 Mu mwezi wa bubili pa nsiku 27, Musili waumine.

15 Leza waamwanine Noa nangue, 16 “Fuma mu safina, wewe ni mukazi obe, ni baana bobe balalume pamo ni bakazi babo. 17 Fumia kubalua kilengua kikosele ki-uli nakio mu safina, byoni, ni nama pamo ni kubalua kilengua kya pa kyalo, evi bivyalane ni kusanduluka pa kyalo.” 18 Ni kiine Noa waafumine pamo ni mukazi wakue, ni baana bakue balalume pamo ni bakazi babo. 19 Nama ni byoni pamo ni bilengua byonse bikose byaali byali mu safina, byaafumine.

20 Noa waamukuuliile Yawe kitale. Waabuulilepo misango yonse ya bilengua bisambikile, pa nama ni tooni, ni kubiziziizia byonse pa kitale kuti bibe ngelelo. 21 Yawe waawamiinue na bunu bwa ngelelo yaaziziiziwe. Yawe waalandile evi, “Nsikikatiipa kabili kyalo pa mulandu wa muntu, anzia kine malanga a muntu abiipile kutula ku bulumendo bwakue. Kabili nsikikeenoona bilengua byonse bikose mu ozu musango. 22 Lyonse kyalo lukikilipo, kuli kwaya kwali musita wa kubyala ni musita wa kuzombola, musita wa kasama ni musita wa lyuza, musita wa mwela ni musita wa likungulu, musita wa koba ni musita wa busiku, ni byo byaakabeelelela.”

<- KUTENDEKA 7KUTENDEKA 9 ->