1 Yawe waamwanine Noa nangue, “Ale ingila mu safina pamo ni lupua lobe pantu nakikumona wali mulunghami pa bantu bonse. 2 Buulapo mpe kilooba ya misango yonse ya nama isambikile ndume ni ikota, inzi nama itiikeene ubuulepo mpe imo imo ndume ni ikota. 3 Kabili buula mpe kilooba ya misango yonse ya tooni tulume ni tukota. Ukite evio kumona sie misango yonse ya nama ni ya tooni ikasungue bwino, evi ikavyalane paakale ni kuvula pa kyalo, 4 pantu kwasyala nsiku kilooba nkabe kunokia nvula pa kyalo. Ezio nvula yakaba kunoka nsiku 40 busiku ni koba. Nakaba kwinoona bilengua byonse bikose binaalengele pa kyalo.” 5 Noa waakitile bintu byonse bya-aninue na Yawe.

6 Kyalo lukyaabundile, Noa waali wali na myaka 600. 7 [a]Noa ni mukazi wakue ni baana bakue balalume pamo ni bakazi babo, baingiile mu safina evi tekuti bafue na azo menda a kibunda. 8 Misango yonse ya nama ni ya tooni kilume ni kikota, bisambikile ni bisisambikile pamo ni bilibyayibula pansi, 9 byaingiile bibili bibili mu safina pamo ni Noa nga mwaalandiile Leza. 10 Pa kyamba kya nsiku kilooba, kibunda kyaizile pa kyalo.

11 [b] Noa lu-aali na myaka 600, mu mwezi wa bubili pa nsiku lyanondo ni kilooba, menda aabambile kusula na maka mu tusulo. Mu muulu ni mo mwaabambile kwituluka menda. 12 Ezio nvula yaanokele pa kyalo nsiku 40 busiku ni koba. 13 Bobo bwenka busiku, Noa ni mukazi ni baana bakue balalume batatu, Shemu, ni Hamu, ni Yafeti pamo ni bakazi babo, baingiile mu safina. 14 Baingiile mu safina pamo ni nama ya mu kisonso mu misango yayo. Nama ya kuteekua mu misango yayo, ikata ni iniini, ni bilibyayibula pansi mu misango yabyo, ni tooni pamo ni byonse bilibyapupuka mu misango yabyo. 15 Bilengua bikose, bibili bibili kilume ni kikota, byaingiile mu safina pamo ni Noa. 16 Kubalua kilengua kikose, kilume ni kikota byaingiile mu safina nga mwa-aniinue Noa na Leza. Kupwako, Yawe wamwizalila Noa.

17-18 Nvula yaatwaliliile kunoka mpaka nsiku 40 busiku ni koba. Menda aizwile pa kyalo mpaka ni safina yabamba kweleela. 19 Menda aizwile pa kyalo mpaka ni mpili yonse yatibila. 20 Azo menda atwaaliliile kwizula pa kyalo mpaka metre kilooba kufuma peulu lupili luleepeesie. 21 Kubalua kilengua kikose kyaali kyaenda pa kyalo, kyoni, ni nama wa kuteekua ni nama wa mu kisonso, ni kilikyayibula pa kyalo pamo ni muntu, byaafwile. 22 Bilengua byonse byaali byapeema pano pa kyalo byaafwile. 23 Yawe waloviizie bilengua byonse bya pano pa kyalo. Waaloviizie bantu ni nama pamo ni byoni. Paasyele sie Noa ni balia baali wali nabo mu safina. 24 Menda aasyele aizwile pa kyalo nsiku 150.

<- KUTENDEKA 6KUTENDEKA 8 ->