1 Ɓaah ciŋ ngo, kinaat laay ɓi nikan jangɗohoh ciŋ waasi ; ɗu inhiɗ ne, e ɓoo ɓi jangɗohoh ci raakan atteeni uupan misik. 2 Laam ɓoo jen, ɓoo laayiɗ findi ɓoo na kafndukohe. Ɓo' nu kafndukɗi ŋ woo ciŋ ɗe ɗah, a ɓo' mitiɗ, yi min amb cir ciŋ faaniŋ ɗe jen.

3 Ɓoo na lahɓe panis ci ne ca teyɗukiɗ ɓoo, ɓoo min ca yurhiɗ na faaniŋ ca jen ŋ ɗisik nu neɓ ɓoo. 4 Namaat marak batooci. Ini caa yake, te puuɗis yakak yeñee ca jen, wa guweernaay ƴissuut weɗ na tahe ɓi na nupɗee ca yurhiɗ ca ɗisik nu neɓ ɓa. 5 Peɗeem mand ɗaa, wa cir ƴissuut ŋ faan, waaye wa na tipaahke ngaŋ ɓi in yakak.

Markaat findi melem nduuƴ ƴissuutoh, wa miniɗ hoomiɗ nduuf yakak. 6 Peɗeem, wa yongkaah. Fu maraka ŋ ɗooƴ cir ci ɗah, wa Adina riifiɗ na in baahaaɗi. Weɗ na kaɓe faani jen in baahaaɗi, wa doh kipes ki jen. Weɗ ŋ haf wa, wa kaɓoh ŋ yongkaaha yakka.

7 Heet ciŋ ɗoopaat ci jen, ca miniɗ koɗu, ci na tiinde, na sel ci na ci na faske ŋ kehƴi, na ciŋ cookmi, ca jen ca miniɗ koɗu te ɓo' na koɗee ca. 8 Waaye, ali ɓo' minɗi koɗ peɗeem ; wa njaajaani ɓo' minɗi amb, wa riifiɗ na daŋari na ape. 9 Weɗ ɓoo na yakɗohe Heɗ ɓoo Kooh, Baabi ; ɓoo namee wa kiimɗoh moɗaaɗi ɓooɓi Kooh fer ŋ mandohaaɗiŋ ɗe. 10 Moo nguɓi yino yakɗohe, yonjohe[a] e ? Ineem joyɗi nikoh ɗaa, ɓaah ciŋ ngo ! 11 Cul yino miniɗ pulɗe masuɓ hooliɗ na masuɓ aayiɗ e ? 12 Ɓaah ciŋ ngo, ndun miniɗ rim oliiw e ? Wala reseñ miniɗ rim ndun ? Naac jemiɗ namɗi min puliɗ masuɓ neɓiɗ !

13 Ya ɓa raak liiɓohaaɗ moɗiɗ nga ɗu, a ñaannja ? A teeɓohaata na pesohaaɗ moɗiɗ ; tumohaaɗ ciŋ ɗe hunaat na eɗef na liiɓohaaɗ moɗiɗ.

14 Waaye ɓo' nga ɗu, a hot ɓo' na in, a minɗi wa raak, a raak aay-keeñ nga, wala a nik ɓoyi waaɗ ne a yi dong raakan, ɓoyeem, a kinaat yaksiɗuk nga ; a yaksiɗuk nga ɗah, a nikɗi ŋ keeh. 15 Liiɓohaaɗeem pulohɗi ɗafki. Wa inaa Adina, inaa ɓo', inaa jiini. 16 Ɗisik nu mandohaaɗ ceem nik ɗah, wa hey raake mbalay na tumohaaɗ moɗaaɗi nu nik.

17 Ŋ ini kaɗ ŋ liiɓohaaɗi moɗiɗi puloh ɗafki, wa hooliɗ, wa waaɗiɗ jam, wa soosiɗ, wa huniɗ na rangsuk, wa riifiɗ na yirmoh te wa na rime in baahiɗ. Wa raakɗi langɗoh, wa raakɗi naafeeha. 18 Waas yurhiɗ, e sokoh jam ci na sokee wa ŋ jam.

<- Saak 2Saak 4 ->