1 Wa ye ɓek lahtoh ci na hiñoh ci ŋ ɗooƴ ɗu ? E waaɗ-waaɗ ci na hiñohe ŋ ɗooƴ cir ciŋ faan ciŋ ɗu haa e ? 2 Ɗu na waaɗe in, ɗu raakuu wa, ɗu boomoh. Ɗu hot ɓo' na in, ɗu minuu wa raak, ɗu lahtohe, ɗu hiñohe. Ɗu na kiimeeɗi Kooh, weɗ tah ɗu raakɗi. 3 Ali ɗu kiim sah, ɗu rahsanɗi, laam kiimiŋ ɗu baahɗi. Ɗu na kiime ne ɗu taambiɗ waaɗ-waaɗ ciŋ ɗu.

4 Njaalo'oh ci ɗu nikoh ! Ɗu inahɗi ne ɓo' nu waaɗ Adina ɗah, a sangiɗ Kooh e ? Te ɓo' nu waaɗ nawle'koh na Adina ɗah, a sangiɗiŋ Kooh. 5 Ɗu liiɓiɗ ne ini Fiis ci woo, wa ɗi ŋ ɓarngi e ? Ne : « Kooh waaɗiɗ ruuhi a geniɗ nga ɓoo te a fiiriɗ nga lool. »[a] 6 Waaye a baah kiŋ ɗe weɗ uup. Ineem, wa hunnda na ini Fiis ci woo ne : « Kooh hunɗi na yaksiɗkoh ci, ɓi ruhsiɗ haf ɓa, ɓeɗ a na teeɓe baah kiŋ ɗe. »[b]

7 Mbaa ñaamkaat Kooh. Ndengsiɗkohaat na Seytaani, a hey saandohe po a us ɗu. 8 Reɓgaat Kooh, a hey ɗu reɓge. Ɗu ɓi bakaaɗoh ci, siisndiɗohiɗ ci ɗu nikoh, ɓohñukaat te ɗu hooliɗ keeñ ciŋ ɗu. 9 Miskiɗkaat, nikaat ŋ ruy, rooyaat ! Ƴen ciŋ ɗu ɓoƴsukaat muhun, sumi ɗu sum nik tiis. 10 Ruhsiɗaat haf ɗu ŋ fiki Heɗi, a hey ɗu meeɓe.

11 Ɓaah ciŋ ngo, kanaat ɓoofoh morom ɗu. Ɓo' nu woo in moɗaaɗi ŋ morom ce wala a attee ɗe ɗah, woo keem, a woo wa waasiŋ Kooh, te atteeneem, a attee wa waasiŋ Kooh. Ŋ ineem, a tum haf ce atte'oh waasi, te a joya joy taambiɗ. 12 A yino na tufkiɗe waas a atte'e. A yi dong min mucɗoh, a yi min ɗumboh. Kon fu yi na atte'e morom fu, yaf ɓa ?

13 Sikɗukaat ɗu ɓi na woye ne : « Woti wala kim, ɓoo hey kee kur nangam, ɓoo tum nga kiis, ɓoo toontuk, ɓoo raak kopor. » 14 Ɗu inah inah kimiŋ ɗu findi wa moocohan e ? Kipes kiŋ ɗu ye ? Ɗu mand na maari na pule, wa maañuu, wa coot. 15 Inii kay weɗ ɗu joy woo : « Wa neɓ Heɗi ɗah, ɓoo hey pese, ɓoo haɓiɗ inii wala wii. » 16 Waaye ɗu ɓii yaksiɗuk ŋ yegi ɗu yeg haf ɗu te yaksiɗuk mand ɗaa baahɗi.

17 Mbaa ɓoyi inah ini baahiɗi a joy haɓiɗ, a haɓiɗɗaa ɗah, a bakaaɗiɗ.

<- Saak 3Saak 5 ->