1 Ɗu ɓi ɓaah ciŋ ngo, kosi ɗu kos Yeesu Kiristaa Heɗ ɓoo yi raak kiyak, kinaata ambsoh na talsoh ɓo'. 2 Ɓo' hayeen ŋ cohiŋ ɗu, a ɓekuk kulɓa moɗiɗ na jaaru urus ; ɓo' wiiriis ñakiɗ nam hay na daah ciŋ ɗe. 3 Ɗu eɗ cir ɓoyi na kulɓaaci moɗiɗ ci, ɗu woo ɗe ne a ɓoofaat ŋ ɗisik baahiɗ ; ɗu woo heɗ daah ci ne a tufkaat wala a ɓoof ŋ kehƴi, ŋ kot ci. 4 Ɗu tum ineem ɗah, ɗu talsoh talsoh haa e ? Teemb ndeem, ɗu nikiɗ atte'oh na liiɓohaaɗ moɗaaɗi'iɗ !

5 Ɓaah ciŋ ngo ŋ keeñkoh, sikɗukaat to. Ɗu inhiɗ baahiɗ ne a Kooh tan ñakiɗ ciŋ Adina ne ɓa nik raakiɗ ci ngaŋ kos, ɓa raak ɓak ŋ Nguuri a gap ɓi waaɗ ɗe. 6 Waaye ɗu, ɗu ruhsiɗiɗ ñakiɗ ci ! Ɗu hotɗi hotɗi ne e heɗ raak-raak ci na torhiɗee ɗu, ɓa ɓayee ɗu waas ne ɗu ngela e ? 7 A ɓinde na riiɓɗe tiiki moɗohngaani ɗu eɗu ? E ɓeɗ haa e ?

8 Fiis ci woyiɗ ne : « Waaɗa morom fu findi fu waaɗoh haf fu. » Mbaa, ɗu taambɗoh waasiŋ Kooh, Heɗ Nguuri, ɗaa ɗah, ɗu haɓiɗ in baahiɗ. 9 Waaye ɗu talsohohee ɗah, wa bakaaɗ ; te waasi hey ɗu ambe findi ɓo' yurhaaɗi.

10 Ɓo' nu taambiɗ waasi, a ɗal nakoh yino dong nga ɗah, a faɗiɗa jen. 11 Laam Yi woo ne : « Kina njaaloo », a yi nam woo ne : « Kina ap ɓo'.[a] » Nik ne fu njaalooɗi na ɓitiɓ jaambur, waaye fu ap ɓo' ɗah, fu ɗaliɗ waasiŋ Kooh jen. 12 Ɗu inhiɗ ne ɗu hey atte'se ngaŋ waasi na faɗse ambuuɗ ci. Kon, woyohaaɗ ciŋ ɗu, na tumohaaɗ ciŋ ɗu hunaat naa. 13 Ɓo' nu yirmohɗi ɗah, a yirmassanɗi ŋ atteeni ; laam, a yirim uupiɗ atte hatil.

14 Ɓaah ciŋ ngo, wa raak winde njiriñ ɓo' woyee ne a kosiɗ te kosiŋ ɗe hunɗi na tum ? Ɗu liiɓiɗ ne koseem miniɗ ɗe muciɗ e ? 15 Findi taambɗoh ƴaar mbaa ɓitiɓ, a ñak ɓekkaah, a raakuu kañam ki a etoh Kooh-nu-wiis ; 16 ɓo' nga ɗu woo ɗe ne : « Kaɗa na jam. Soosi faɗaat ɗa. Meeɗɗa haf fu ñam po fu kap. » Raak ɗa paƴiɗɗi ɗe ini a etoh ɗah, wa raak winde njiriñ ? 17 Kosi hunɗi na tum mand ɗaa ; wa kaaniɗ sagu niki wa nik kiik wa.

18 Waaye, ɓo' miniɗ woo morom ce ne : Fu raak kos-kos, ŋ raakka tum-tum. Teeɓ po kosiŋ ɗa wi hunɗi na tum, ŋ teeɓ ɗa kosiŋ ngo ŋ tum-tum. 19 Fu kosiɗ ne Kooh yino ; ineem in baahiɗ. Waaye jiiniici na baahaaɗiikiŋ ca sah kosiɗa po ca na saakɗohe saakɗoh nga. 20 Naandɗi ! Andi fu waaɗ teeɓu ne kosi hunɗi na tum raakɗi njiriñ ?

21 Ini tah po Kooh ammba caac ɓoo Ibrahiima findi ɓo' yurhiɗ, wa ina a tumee haa e ? E dega a dege kuɓkaŋ ɗe Isaahha ne a seeƴkoh ɗe haa e ? 22 Kon, fu hotiɗ ne kosiŋ ɗe hunee na tum ! E ini a tumee tah kosaŋ ɗe mit. 23 Ŋ ineem, ini Fiis ci woo raakka, an : « Ibrahiima kossa Kooh, tahha po Kooh ammba ɗe findi ɓo' yurhiɗ ; po a na ɓeeɗkohse nawle Kooh.[b] » 24 Ɗu hotiɗ nga, Kooh na ambe ɓo' findi yurhiɗ ŋ in ci a na tume, kon wa ŋ kos dong haa.

25 Rahab toonkoha nak, ini tah po Kooh ammba ɗe findi ɓo' yurhiɗ, wa ina a tumee haa e ? E ɗembɗa a ɗembɗee ɓooɓa Israayel ca tuuƴe, ƴutta, a lahiɗta ɓa ŋ waas wiiriis haa e ?

26 Findi faani raakɗi kiñin kaanoh, kosi hunɗi na tum kaanoh ɗaa.

<- Saak 1Saak 3 ->