1 ⵉⵃⵍⴰ ⵉⵊⵊ ⵏ ⵓⵎⴻⵣⵍⵓⴹ

ⵉⴳⴳⵓⵔⴻⵏ ⴷⵉ ⵍⴻⵚⴼⴰⵢⴻⵜ ⵏⵏⴻⵙ,

ⵅ ⵡⴻⵏⵏⵉ ⵖⴰⵔ ⵉⴵⴰⵏ ⵉⵢⴻⵏⵛⵉⵛⴻⵏ ⴼⴰⵔⵖⴻⵏ,

ⵓ ⴰⵇⴰ ⵜ ⴷ ⴰⴱⵓⵀⴰⵍⵉ ⵉ ⵢⴻⴵⴰ. [a]

2 ⴱⵍⴰ ⵜⵓⵙⵙⵏⴰ ⵓⵍⴰ ⴷ ⵍⴻⵄⵎⴰⵔ ⵡⴰⵔ ⵉⴵⵉ ⵛⴰ ⵎⵍⵉⵃ,

ⵡⴻⵏⵏⵉ ⵉⵜⵜⵇⴻⴵⵇⴻⵏ ⵙ ⵉⴹⴰⵔⴻⵏ ⵏⵏⴻⵙ, ⴰⴷ ⵉⵅⴹⴰ.

3 ⵜⵓⴱⴱⵓⵀⴻⵍⵢⴰ ⵏ ⴱⵏⴰⴷⴻⵎ

ⵉⵙⵙⴼⴰⵔⵔⴰⵖ ⴰⴱⵔⵉⴷ ⵏⵏⴻⵙ,

ⵓ ⵅⴻⵏⵏⵉ ⵓⵍ ⵏⵏⴻⵙ ⴰⴷ ⵉⵙⵄⴰⵔ ⵅ ⵙⵉⴷⵉ. [b]

4 ⴰⴳⵍⴰ ⵉⵜⵜⴰⵡⵉ-ⴷⴷ ⴰⵟⵟⴰⵙ ⵏ ⵉⵎⴻⴷⴷⵓⴽⴽⴰⵍ,

ⵎⴰⵛⴰ ⴰⵎⴻⵣⵍⵓⴹ ⵉⵙⴻⵎⵎⴻⵃ ⴷⴰⵢⴻⵙ

ⵓⵎⴻⴷⴷⵓⴽⴽⴻⵍ ⵏⵏⴻⵙ.[c]

5 ⴰⵛⴻⵀⵀⴰⴷ ⵉⵙⵙⵅⴰⵔⵔⵉⵇⴻⵏ

ⵡⴰⵔ ⵉⵜⵜⵡⴰⵃⴻⵙⵙⴻⴱ ⵛⴰ ⴷ ⴰⵎⴻⵣⴷⴰⴳ,

ⵡⴻⵏⵏⵉ ⴷⴷ-ⵢⴰⵔⴻⵅⵅⵓⵏ ⵉ ⵉⵅⴰⵔⵔⵉⵇⴻⵏ,

ⵡⴰⵔ ⵉⵏⴻⵊⵊⴻⵎ. [d]

6 ⴰⵟⵟⴰⵙ ⵜⵜⵣⴰⵡⴳⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵓⵎⵛⴻⵏⵏⴻⵄ,

ⴽⵓⵍ ⵉⵊⵊ ⵉⵜⵜⴻⵅⵙ ⴰⴷ ⵢⵉⵍⵉ ⴷ ⴰⵎⴻⴷⴷⵓⴽⴽⴻⵍ

ⵏ ⵡⴻⵔⵢⴰⵣ ⵉ ⵖⴰⵔ ⵉⴵⴰ ⵜⴻⵔⵣⵉⴼⵉⵏ.

7 ⵎⴰⵔⵔⴰ ⴰⵢⵜⵎⴰⵙ ⵏ ⵓⵎⴻⵣⵍⵓⴹ ⵛⴰⵔⵔⵀⴻⵏ ⵜ,

ⵎⴻⵛⵃⴰⵍ ⵜⵜⵉⴳⴳⵯⴻⵊⵊⴻⵏ ⵅⴰⵙ

ⵉⵎⴻⴷⴷⵓⴽⴽⴰⵍ ⵏⵏⴻⵙ!

ⵏⴻⵜⵜⴰ ⵉⴹⴻⴼⴼⴰⵔ ⴰⵡⴰⵍⴻⵏ

ⵏⵏⵉ ⵡⴰⵔ ⵉⵙⴻⴽⴽⵡⵉⵏ ⵡⴰⵍⵓ. [e]

8 ⵡⴻⵏⵏⵉ ⵉⵟⵟⴼⴻⵏ ⵓⵍ ⴰⵎⵉⵖⵉⵙ,

ⵉⵜⵜⴻⵅⵙ ⵍⴻⵄⵎⴰⵔ ⵏⵏⴻⵙ,

ⵡⴻⵏⵏⵉ ⵉⵃⴻⵟⵟⴰⵏ ⵍⴻⴼⵀⴰⵎⴻⵜ,

ⴰⴷ ⵢⴰⴼ ⵎⵉⵏ ⵉⵛⵏⴰⵏ.

9 ⵉⵊⵊ ⵏ ⵓⵛⴻⵀⵀⴰⴷ ⵉⵙⵙⵅⴰⵔⵔⵉⵇⴻⵏ

ⵡⴰⵔ ⵉⵜⵜⵡⴰⵃⴻⵙⵙⴻⴱ ⵛⴰ ⴷ ⴰⵎⴻⵣⴷⴰⴳ,

ⵡⴻⵏⵏⵉ ⵢⴰⵔⴻⵅⵅⵓⵏ ⵉ ⵉⵅⴰⵔⵔⵉⵇⴻⵏ,

ⴰⴷ ⵉⵜⵜⵡⴰⵀⴻⵍⵍⴻⴽ.

10 ⴰⴼⴻⵢⵢⴻⵛ ⵡⴰⵔ ⴷⴷ-ⵢⵓⵙⵉ ⵅ ⵓⴱⵓⵀⴰⵍⵉ,

ⵎⴰⵎⵎⴻⵛ ⵄⴰⴷ ⵅ ⵓⵎⵙⴻⵅⵅⴰⵔ

ⵎⴰⵃⴻⵏⴷ ⴰⴷ ⵉⵙⴻⵍⵍⴻⵟ ⵅ ⵍⵃⵓⴽⴽⴰⵎ. [f]

11 ⵍⴻⵄⵇⴻⵍ ⵏ ⴱⵏⴰⴷⴻⵎ ⵉⵜⵜⴰⵔⵔⴰ ⵉ-ⵜ

ⴰⴷ ⵉⴳⴳ ⵙ ⵜⵜⴰⵙⵉⵄ ⵏ ⵍⵅⴰⴹⴰⵔ

ⵜⵓⵙⴰ-ⴷⴷ ⵅⴰⵙ ⵎⴰⵃⴻⵏⴷ ⴰⴷ ⵉⵎⴻⵢⵢⴻⴽ

ⵅ ⵓⵅⴻⵟⵟⵓ ⵏⵏⴻⵙ.

12 ⴰⵙⵅⴻⴹ ⵏ ⵓⵊⴻⴵⵉⴷ

ⴰⵎ ⵣⵣⵀⵉⵔ ⵏ ⵡⴻⵢⵔⴰⴷ ⴷⵉ ⵜⴻⵎⵥⵉ ⵏⵏⴻⵙ,

ⵎⴰⵛⴰ ⴰⵔⴹⴰ ⵏⵏⴻⵙ ⴰⵎ ⵏⵏⴷⴰ ⵅ ⴰⵔⴱⵉⵄ. [g]

13 ⵎⵎⵉⵙ ⴰⴱⵓⵀⴰⵍⵉ ⴷ ⴰⵔⵥⵉⵢⵢⴻⵜ ⵉ ⴱⴰⴱⴰⵙ,

ⴰⵎⵛⵓⴱⴱⴻⵛ ⵏ ⵜⴻⵎⵖⴰⵔⵜ ⵉⴳⴳⴰ

ⴰⵎ ⵜⵓⴷⴷⵉⵎⵜ ⵏ ⵜⵣⴻⵇⵇⴰ ⵡⴰⵔ ⵉⵇⴻⵟⵟⵉⵏ. [h]

14 ⵜⴰⴷⴷⴰⵔⵜ ⴷ ⵡⴰⴳⵍⴰ

ⴰⵇⴰ ⴰⵜⴻⵏ ⴷ ⵍⵡⴰⵔⵜ ⵏ ⵍⴻⵊⴷⵓⴷ

ⵎⴰⵛⴰ ⵉⵛⵜ ⵏ ⵜⴻⵎⵖⴰⵔⵜ ⵉⴼⴻⵀⵀⵎⴻⵏ

ⴰⵇⴰ-ⵜⵜ ⵏ ⵙⵉⴷⵉ. [i]

15 ⵍⴻⵄⴳⴻⵣ ⵢⴰⵔⵔⴰ ⴱⵏⴰⴷⴻⵎ

ⴰⴷ ⵉⵡⴹⴰ ⴷⴻⴳ ⵉⴹⴻⵚ ⵢⵓⴵⵖⴻⵏ,

ⵓ ⵍⴻⵄⵎⴰⵔ ⵉⵛⵛⵓⵔ ⵙ ⵍⵖⴻⵛⵛ ⴰⴷ ⵉⴵⴰⵥ. [j]

16 ⵡⴻⵏⵏⵉ ⵉⵃⴻⵟⵟⴰⵏ ⵜⴰⵡⵚⴻⵢⵢⴻⵜ,

ⵉⵃⴻⵟⵟⴰ ⵍⴻⵄⵎⴰⵔ ⵏⵏⴻⵙ,

ⵡⴻⵏⵏⵉ ⵡⴰⵔ ⵉⵃⴻⵟⵟⵉⵏ ⵉⴱⵔⵉⴷⴻⵏ ⵏⵏⴻⵙ,

ⴰⴷ ⵉⵎⵎⴻⵜ. [k]

17 ⵡⴻⵏⵏⵉ ⵉⵜⵜⵃⵉⵏⵏⴰⵏ ⵅ ⵓⵎⴻⵣⵍⵓⴹ,

ⵢⴰⵔⴻⵟⵟⴻⵍ ⵉ ⵙⵉⴷⵉ.

ⵏⴻⵜⵜⴰ ⴰⴷ ⴰⵙ ⵉⵅⴻⴵⴻⵚ ⵍⵅⴻⴷⵎⴻⵜ ⵏⵏⴻⵙ.

18 ⵡⴻⴱⴱⴻⵅ ⵎⵎⵉⵛ, ⵎⴰⵍⴰ ⵄⴰⴷ ⴷⵉⵏ ⵛⴰ ⵏ ⵍⴰⵢⴰⵙ,

ⵎⴰⵛⴰ ⵡⴰⵔ ⵜ ⵏⴻⵇⵇ ⵛⴰ,

ⵡⴰⵔ ⵜⵜⴻⵊⵊⵉ ⵛⴰ ⴰⴷ ⵉⴽⵙⵉ ⴰⵢⴰ ⵍⴻⵄⵎⴰⵔ ⵏⵏⴻⵛ. [l]

19 ⵡⴻⵏⵏⵉ ⵉⵙⵄⴰⵔⴻⵏ ⴰⵟⵟⴰⵙ,

ⴰⴷ ⵉⵜⵜⵡⴰⵅⴻⴵⴻⵚ ⵉ ⵎⴰⵏⴰⵢⴻⵏⵏⵉ,

ⵎⴰⵖⴰⵔ ⵎⴰⵍⴰ ⵜⴻⵅⵙⴻⴷ ⴰⴷ ⵜ ⵜⵎⴻⵏⵄⴻⴷ,

ⵅⴻⵏⵏⵉ ⴰⴷ ⴷⴰⵢⴻⵙ ⵜⴰⵔⴻⵏⵢⴻⴷ ⵡⴰⵀⴰ.

20 ⵙⴻⵍ ⵛⴻⴽ ⵖⴰⵔ ⵓⵛⴰⵡⴰⵔ

ⵓⵛⴰ ⵇⴱⴻⵍ ⵜⵜⴰⵔⴱⵉⵢⵢⴻⵜ,

ⵎⴰⵃⴻⵏⴷ ⴰⴷ ⵜⴷⴻⵡⵍⴻⴷ ⴷ ⴰⵎⵉⵖⵉⵙ

ⵖⴰⵔ ⵓⵏⴻⴳⴳⴰⵔ.

21 ⴰⵇⴰ ⴷⵉⵏ ⴰⵟⵟⴰⵙ ⵏ ⵉⵅⴻⵎⵎⵉⵎⴻⵏ

ⴷⴻⴳ ⵡⵓⵍ ⵏ ⵡⴻⵔⵢⴰⵣ,

ⵎⴰⵛⴰ ⵛⵛⵡⴰⵔ ⵏ ⵙⵉⴷⵉ ⵉⵜⵜⵖⵉⵎⴰ ⵉⴱⴻⴷⴷ. [m]

22 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⴱⵏⴰⴷⴻⵎ

ⴷ ⵍⴻⴹⵔⴰⴼⴻⵜ ⵏⵏⴻⵙ,

ⴰⵎⵎⵓ ⵉ ⵉⴵⴰ ⵉⵊⵊ ⵏ ⵓⵎⴻⵣⵍⵓⴹ ⵃⵙⴻⵏ

ⵅ ⵉⵊⵊ ⵏ ⴱⵓ-ⵉⵅⴰⵔⵔⵉⵇⴻⵏ.

23 ⵜⵉⴳⴳⵯⵓⴷⵉ ⵏ ⵙⵉⴷⵉ ⵜⵏⴻⴷⴷⴻⵀ ⵖⴰⵔ ⵜⵓⴷⴰⵔⵜ,

ⵎⴰⵖⴰⵔ ⵉⵜⵜⴻⵟⵟⴻⵚ ⵉⵊⵊⵉⵡⴻⵏ,

ⵡⴰⵔ ⵖⴰⵔⴻⵙ ⴷⴷ-ⵉⵜⵜⴰⵙ ⵛⴰ

ⵎⵉⵏ ⵡⴰⵔ ⵉⵃⵍⵉⵏ. [n]

24 ⴰⵎⴻⵄⴳⵓⵣ ⵉⵙⵙⵏⵓⴼⴼⴰⵔ ⴰⴼⵓⵙ ⵏⵏⴻⵙ

ⴷⵉ ⵟⵟⴻⴱⵚⵉ,

ⵡⴰⵔ ⵜ-ⵉ-ⴷⴷ-ⵉⵜⵜⴰⵔⵔⵉ ⵄⴰⵡⴻⴷ

ⵖⴰⵔ ⵓⵇⴻⵎⵎⵓⵎ ⵏⵏⴻⵙ. [o]  [p]

25 ⵡⵡⴻⵜ ⴰⵎⴻⵙⵜⴻⵀⵣⵉⵢ,

ⴰⵎⵎⵓ ⵉ ⵖⴰ ⵉⴼⵜⴻⵏ

ⵡⴻⵏⵏⵉ ⵡⴰⵔ ⵖⴰⵔⴻⵙ ⴱⵓ ⵍⴻⴼⵀⴰⵎⴻⵜ,

ⵓ ⵄⴰⵇⴻⴱ ⴰⴼⴻⵀⵀⴰⵎ,

ⵅⴻⵏⵏⵉ ⴰⴷ ⵉⴽⵙⴻⴱ ⵍⴻⴼⵀⴰⵎⴻⵜ. [q]

26 ⵡⴻⵏⵏⵉ ⵉⵜⵜⴻⴳⴳⴻⵏ ⵖⴻⵣⵣⵓ ⴷⵉ ⴱⴰⴱⴰⵙ

ⵏⵉⵖ ⵡⴻⵏⵏⵉ ⵉⵙⵙⵓⴼⴼⵓⵖⴻⵏ ⵢⴻⵎⵎⴰⵙ,

ⴰⵇⴰ ⴷ ⵎⵎⵉⵙ ⵏ ⵍⴻⴼⴹⵉⵃⴻⵜ

ⵏⵏⵉ ⵢⴰⵔⵔⴰⵏ ⴱⵏⴰⴷⴻⵎ ⴰⴷ ⵉⵙⴻⴹⵃⴰ.

27 ⵙⴱⴻⴷⴷ-ⴷⴷ, ⴰ ⵎⵎⵉ,

ⵎⴰⵃⴻⵏⴷ ⴰⴷ ⵜⴻⵙⵍⴻⴷ ⵖⴰⵔ ⵓⵡⴻⴱⴱⴻⵅ,

ⵎⴰⵍⴰ ⵜⴻⵅⵙⴻⴷ ⴰⴷ ⵜⵃⴻⵢⵢⴷⴻⴷ

ⵅ ⵡⴰⵡⴰⵍⴻⵏ ⵉⵛⵛⵓⵔⴻⵏ ⵙ ⵜⵓⵙⵙⵏⴰ.

28 ⵉⵊⵊ ⵏ ⵓⵛⴻⵀⵀⴰⴷ ⵉ ⵡⴰⵔ ⵉⵙⴻⴽⴽⵡⵉⵏ

ⵉⵖⴻⵟⵟⴻⵍ ⵣⵉ ⵍⵃⴻⵇⵇ,

ⵓⵛⴰ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ

ⵉⵚⴰⵔⵔⴻⴹ ⵍⵖⴻⵛⵛ.

29 ⵉⵎⴻⵙⵜⴻⵀⵣⴰⵢⴻⵏ ⵜᵉⵜⵜⵔⴰⵊⴰ ⴰⵜⴻⵏ ⵍⴻⵃⴽⴰⵎⴻⵜ,

ⵓ ⵜⵉⵢⵉⵜⵜⴰ ⴷⴻⴳ ⵡⴻⵄⵔⵓⵔ ⵉ ⵉⴱⵓⵀⴰⵍⵉⵢⵢⴻⵏ.