1 ⵡⴻⵏⵏⵉ ⵉⵄⴻⵣⵣⵍⴻⵏ ⵉⵅⴻⴼ ⵏⵏⴻⵙ,

ⵢⴰⵔⴻⵣⵣⵓ ⵅ ⵎⴻⵥⵔⵉ ⵏⵏⴻⵙ,

ⵏⴻⵜⵜⴰ ⵉⴷⴷⵓⵇⵇⵓⵣ ⵅ ⵎⴰⵔⵔⴰ

ⵎⵉⵏ ⵉⵣⴻⵎⵎⴰⵔⴻⵏ ⴰⴷ ⵢⵉⵍⵉ ⴷ ⴰⴷⴻⴱⴱⴰⵔ.

2 ⴰⴱⵓⵀⴰⵍⵉ ⵡⴰⵔ ⴷ ⴰⵙ ⵜᵉⵜⵜⴻⵄⵊⵉⴱ ⵍⴻⴼⵀⴰⵎⴻⵜ,

ⵉⵜⵜⴻⵄⵊⵉⴱ ⴰⵙ ⵎⵖⵉⵔ ⴰⵄⴰⵔⵔⵉ ⵏ ⵡⵓⵍ ⵏⵏⴻⵙ.

3 ⵅⵎⵉ ⴷⴷ-ⵉⵜⵜⴰⴷⴻⴼ ⵓⵄⴻⴼⴼⴰⵏ,

ⵉⵜⵜⴰⵙ-ⴷⴷ ⵓⵍⴰ ⴷ ⴰⵙⴻⵃⵇⴰⵔ,

ⵓ ⴰⴽ-ⴷ ⵍⴻⴼⴹⵉⵃⴻⵜ ⵉⵜⵜⴰⵙ-ⴷⴷ ⵍⵄⴰⵔ.

4 ⴰⵡⴰⵍⴻⵏ ⵣⴻⴳ ⵓⵇⴻⵎⵎⵓⵎ ⵏ ⵡⴻⵔⵢⴰⵣ

ⴰⵎ ⵡⴰⵎⴰⵏ ⵢⵓⴵⵖⴻⵏ,

ⵍⵄⵓⵏⵚⴰⵔ ⵏ ⵜⵉⵖⵉⵜ ⴷ ⵉⵛⵜ ⵏ ⵜⵉⵖⵣⴰⵔⵜ ⵉⵜⵜⴰⵣⵣⵍⴻⵏ.

5 ⵡⴰⵔ ⵉⴵⵉ ⵛⴰ ⵎⵍⵉⵃ ⴰⴷ ⵜⴻⵙⵙⵄⵉⵣⵣⴻⴷ ⴰⵄⴻⴼⴼⴰⵏ,

ⵎⴰⵃⴻⵏⴷ ⴰⴷ ⵜⴻⵙⵙⵃⴻⵢⵢⴷⴻⴷ

ⴰⵎⵙⴻⴳⴳⴻⴷ ⴷⵉ ⵛⵛⵔⴻⵄ. [a]

6 ⵉⵢⴻⵏⵛⵉⵛⴻⵏ ⵏ ⵓⴱⵓⵀⴰⵍⵉ ⵏⴻⴷⴷⵀⴻⵏ ⵜ

ⵖⴰⵔ ⵓⵎⵛⴻⴱⴱⴻⵛ,

ⴰⵇⴻⵎⵎⵓⵎ ⵏⵏⴻⵙ ⵉⵜⵜⵍⴰⵖⴰ-ⴷⴷ ⵉ ⵡⴻⵄⵎⵓⴷ.

7 ⴰⵇⴻⵎⵎⵓⵎ ⵏ ⵓⴱⵓⵀⴰⵍⵉ ⴷ ⴰⵀⴻⵍⵍⴻⴽ ⵏⵏⴻⵙ,

ⵉⵢⴻⵏⵛⵉⵛⴻⵏ ⵏⵏⴻⵙ ⴷ ⵍⴼⴻⵅ ⵉ ⵍⴻⵄⵎⴰⵔ ⵏⵏⴻⵙ. [b]

8 ⴰⵡⴰⵍⴻⵏ ⵏ ⵉⵅⴱⴰⵔⵊⵉⵢⵢⴻⵏ ⴰⵎ ⵃⴰⵍⴰⵡⵉⵜ,

ⵀⴻⴽⴽⵡⴰⵏⵜ ⴷⴻⴳ ⵉⵅⵅⴰⵎⴻⵏ

ⵏ ⴷⴰⵅⴻⵍ ⵏ ⵓⵄⴻⴷⴷⵉⵙ. [c]

9 ⵡⴻⵏⵏⵉ ⵉⴵⴰⵏ ⴷ ⴰⵎⴰⵔⵅⵓ ⴷⵉ ⵍⵅⴻⴷⵎⴻⵜ ⵏⵏⴻⵙ,

ⴰⵇⴰ ⵜ ⴷ ⵓⵎⴰⵙ ⵏ ⴱⴰⴱ ⵏ ⵓⵍⴻⴷⴷⴻⴵ.

10 ⵉⵙⴻⵎ ⵏ ⵙⵉⴷⵉ ⴷ ⵉⵊⵊ ⵏ ⵍⴱⵓⵔⵊ ⵉⵎⵜⴻⵏ,

ⴰⵎⵙⴻⴳⴳⴻⴷ ⵉⵜⵜⴰⵣⵣⴻⵍ ⵖⴰⵔ ⴷⵉⵏⵏⵉ,

ⵓⵛⴰ ⵉⵜⵜⵡⴰⵙⵙⴰⴽⴽⵡⴰⴹ ⴰⵍ ⴷⵉⵏ ⴷⵉ ⵍⴰⵎⴰⵏ. [d]

11 ⴰⴳⵍⴰ ⵏ ⴱⵓ-ⵡⴰⴳⵍⴰ

ⴷ ⵜⴰⵏⴷⵉⵏⵜ ⵏⵏⴻⵙ ⵉⵊⴻⵀⴷⴻⵏ,

ⵜⴰⵏⵉⵜⴰ ⴰⵎ ⵢⵉⵊⵊ ⵏ ⵍⵃⵉⴹ ⵢⵓⵄⵍⴰⵏ ⵇⴰⵄ

ⴷⵉ ⵍⴱⴰⵍ ⵏⵏⴻⵙ. [e]

12 ⵇⴱⴻⵍ ⵎⴰ ⵉ ⵖⴰ ⵉⵜⵜⵡⴰⵔⵥ,

ⵉⵜⵜⴳⴻⵄⵄⴰⴷ ⵡⵓⵍ ⵏ ⴱⵏⴰⴷⴻⵎ,

ⵎⴰⵛⴰ ⴰⵡⴰⴹⴻⵄ ⵉⵜⵜⵉⵣⵡⴰⵍ ⴰⵙ ⵉ ⵛⵛⴰⵏ. [f]

13 ⵡⴻⵏⵏⵉ ⴷⴷ-ⵉⵜⵜⴰⵔⵔⴰⵏ ⴰⵡⴰⵍ

ⵇⴱⴻⵍ ⵉ ⵖⴰ ⵉⵙⴻⵍ,

ⴷ ⵎⴰⵏ ⴰⵢⴰ ⴷ ⵜⵓⴱⴱⵓⵀⴻⵍⵢⴰ

ⴷ ⵍⴻⴼⴹⵉⵃⴻⵜ ⵉ ⵏⴻⵜⵜⴰ.

14 ⴱⵓⵃⴱⴻⵍ ⵏ ⵡⴻⵔⵢⴰⵣ

ⵉⵜⵜⵙⴻⵏⵏⴻⴷ ⵉ-ⵜ ⵖⴰⵔ ⵍⴻⵀⵍⴰⵛ ⵏⵏⴻⵙ,

ⵎⴰⵛⴰ ⴱⵓⵃⴱⴻⵍ ⵉⵜⵜⵡⴰⵔⵥⴻⵏ,

ⵡⵉ ⵉⵣⴻⵎⵎⴰⵔⴻⵏ ⴰⴷ ⵜ ⵉⴽⵙⵉ?

15 ⵓⵍ ⵏ ⵓⴼⴻⵀⵀⴰⵎ ⵢⴰⵔⴻⵣⵣⵓ ⵜⵓⵙⵙⵏⴰ,

ⴰⵎⴻⵣⵣⵓⵖ ⵏ ⵓⵎⵉⵖⵉⵙ ⵢⴰⵔⴻⵣⵣⵓ ⵜⵓⵙⵙⵏⴰ.

16 ⵜⴰⵔⵣⴻⴼⵜ ⵏ ⴱⵏⴰⴷⴻⵎ ⵜⴰⵔⴻⵣⵣⴻⵎ ⴰⵙ ⵜⵉⵡⵡⵓⵔⴰ,

ⵜⵏⴻⴷⴷⴻⵀ ⵉ-ⵜ ⵣⵣⴰⵜ ⵉ ⵡⵓⴷⴻⵎ ⵏ ⵉⵎⴻⵇⵇⵔⴰⵏⴻⵏ.

17 ⵡⴻⵏⵏⵉ ⴷ ⴰⵎⴻⵣⵡⴰⵔⵓ ⴷⵉ ⴷⴷⴻⵄⵡⴻⵜ ⵏⵏⴻⵙ

ⵉⵜⵜⴱⴰⵏ ⴷ ⴰⵎⵙⴻⴳⴳⴻⴷ,

ⵎⴰⵛⴰ ⵅⴻⵏⵏⵉ ⴰⴷ ⴷⴷ-ⵢⴰⵙ ⵊⵊⴰⵔ ⵏⵏⴻⵙ

ⵓⵛⴰ ⵉⵜⵜⵏⴻⵛⵛⴻⴱ ⴷⵉ ⵜⵎⴻⵙⵍⴰⵛⵜ. [g]

18 ⵜⴰⵇⴻⴷⴷⵓⵃⵜ ⵉⵜⵜⴻⵊⵊⴰⵏ ⵉⵎⴻⵏⵖⴰⵏ ⵜⵜⴱⴻⴷⴷⴰⵏ,

ⵜⴱⴻⵟⵟⴰ ⵊⴰⵔ ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ.

19 ⵉⵊⵊ ⵏ ⵓⵎⴰ ⵏⵏⵉ ⵓⵎⵉ ⴷⵉ ⴳⴳⵉⵏ ⵍⵄⵉⴱ,

ⵉⵜⵜⵡⴰⵟⵟⴻⴼ ⴽⵜⴰⵔ ⵅ ⵉⵛⵜ ⵏ ⵜⴻⵏⴷⵉⵏⵜ ⵉⵊⴻⵀⴷⴻⵏ,

ⵉⵎⴻⵏⵖⴰⵏ ⴳⴳⵉⵏ ⴰⵎ ⵣⵣⴻⴽⵔⵓⵏ ⵏ ⵍⴻⵇⵚⴰⵔ.

20 ⵣⵉ ⵍⵖⵉⴵⴻⵜ ⵏ ⵓⵇⴻⵎⵎⵓⵎ ⵏ ⵉⵊⵊ ⵏ ⵡⴻⵔⵢⴰⵣ

ⵉⵜⵜⵢⴰⵡⴰⵏ ⵓⵄⴻⴷⴷⵉⵙ ⵏⵏⴻⵙ,

ⴰⴷ ⵉⵊⵊⴰⵡⴻⵏ ⵣⵉ ⵚⵚⴰⴱⴻⵜ ⵏ ⵉⵢⴻⵏⵛⵉⵛⴻⵏ ⵏⵏⴻⵙ. [h]

21 ⵍⵎⴻⵡⵜ ⴷ ⵜⵓⴷⴰⵔⵜ ⴷⴻⴳ ⵓⴼⵓⵙ ⵏ ⵢⵉⵍⴻⵙ,

ⴽⵓⵍ ⵉⵊⵊⴻⵏ ⵡⴻⵏⵏⵉ ⵜⴻⵏ ⵉⵜⵜⴻⵅⵙⴻⵏ,

ⴰⴷ ⵢⴻⵛⵛ ⵔⵖⵉⴵⴻⵜ ⵏⵙⴻⵏ. [i]

22 ⵡⴻⵏⵏⵉ ⵢⵓⴼⵉⵏ ⵜⴰⵎⵖⴰⵔⵜ,

ⵢⵓⴼⴰ ⵎⵉⵏ ⵉⵚⴻⴱⵃⴻⵏ,

ⵓ ⵏⴻⵜⵜⴰ ⵉⵟⵟⴻⴼ ⴰⵔⴹⴰ ⵏ ⵙⵉⴷⵉ. [j]

23 ⵙ ⵓⵃⴻⵛⵛⴻⵎ ⵉⵙⵙⴰⵡⴰⵍ ⵓⵎⴻⵣⵍⵓⴹ,

ⴱⵓ-ⵡⴰⴳⵍⴰ ⵉⵜⵜⴰⵔⵔⴰ-ⴷⴷ ⵙ ⵍⴻⵇⵙⴰⵃⴻⵜ.

24 ⴰⵔⵢⴰⵣ ⵏⵏⵉ ⵖⴰⵔ ⴵⴰⵏ ⵉⵎⴻⴷⴷⵓⴽⴽⴰⵍ ⴰⵟⵟⴰⵙ,

ⴰⴷ ⵉⵡⴹⴰ ⴷⵉ ⵜⴰⵎⴰⵔⴰ,

ⵎⴰⵛⴰ ⵛⴰ ⵏ ⵉⵎⵓⵔⴻⵏ

ⴰⵎⴻⴷⴷⵓⴽⴽⴻⵍ ⵉⵜⵜⴻⵅⵙ ⵉ ⵛⴻⴽ

ⴽⵜⴰⵔ ⵣⵉ ⵜⴰⵡⵎⴰⵜ. [k]