1 ⴱⵉⵏⵓ ⴷ ⵉⵊⵊ ⵏ ⵓⵎⴻⵙⵜⴻⵀⵣⵉⵢ,

ⵛⵛⵔⴰⴱ ⴷ ⴱⵓ-ⵙⵙⴹⴻⵄ,

ⴽⵓⵍ ⵉⵊⵊⴻⵏ ⵡⴻⵏⵏⵉ ⵣⵣⴰⵢⴻⵙ ⵉ ⵖⴰ ⵉⵡⴻⴷⴷⴰⵔⴻⵏ,

ⵄⴻⵎⵎⴰⵔⵚ ⵡⴰⵔ ⵉⴷⴷⵉⴽⴽⵡⵉⵍ ⴷ ⴰⵎⵉⵖⵉⵙ.

2 ⴰⵀⵓⴷⴷⵉ ⵏ ⵓⵊⴻⴵⵉⴷ ⴰⵎ ⵣⵣⵀⵉⵔ ⵏ ⵡⴰⵢⵔⴰⴷ:

ⵡⴻⵏⵏⵉ ⵜ ⵉⵙⵙⴻⵄⴰⵔⴻⵏ,

ⵉⵅⴻⵟⵟⴰ ⴰⴽ-ⴷ ⵍⴻⵄⵎⴰⵔ ⵏⵏⴻⵙ.[a]

3 ⴰⵙⵎⴰⵃ ⴷⴻⴳ ⵓⵎⵛⵓⴱⴱⴻⵛ

ⴰⵇⴰ ⴷ ⵛⵛⴰⵏ ⵉ ⵡⴻⵔⵢⴰⵣ,

ⵎⴰⵛⴰ ⴽⵓⵍ ⴰⴱⵓⵀⴰⵍⵉ ⴰⴷ ⵉⴷⴷⵓⵇⵇⴻⵣ. [b]

4 ⵣⵉ ⵍⵡⴻⵇⵜ ⵏ ⵍⴻⵅⵔⵉⴼ ⵡⴰⵔ ⵉⵛⴰⵔⵔⴻⵣ ⵓⵎⴻⵄⴳⵓⵣ,

ⵅⴻⵏⵏⵉ ⴰⴷ ⵉⵜⵜⴰⵔ ⴷⵉ ⵍⵡⴻⵇⵜ ⵏ ⵜⵎⴻⵢⵔⴰ,

ⵎⴰⵛⴰ ⵡⴰⵔ ⵉⵜⵜⵉⴼ ⵡⴰⵍⵓ.

5 ⵉⵅⴰⵔⵔⵉⵚⴻⵏ ⴷⴻⴳ ⵡⵓⵍ ⵏ ⴱⵏⴰⴷⴻⵎ

ⴰⵎⴰⵏ ⵢⵓⴵⵖⴻⵏ,

ⵎⴰⵛⴰ ⵉⵊⵊ ⵏ ⵡⴻⵔⵢⴰⵣ ⵙ ⵍⴻⴼⵀⴰⵎⴻⵜ

ⵉⵙⵙⴻⵏ ⴰⴷ ⵜⴻⵏ ⵢⴰⵢⴻⵎ. [c]

6 ⴰⵟⵟⴰⵙ ⵏ ⵉⵡⴷⴰⵏ ⵜⵜⵍⴰⵖⴰⵏ ⵅ ⵛⴰ ⵏ ⵉⵊⵊⴻⵏ

‘ⴰⵎⴻⴷⴷⵓⴽⴽⴻⵍ ⵏⵙⴻⵏ ⴷ ⴰⵎⵜⵉⵇⵇⵉ’,

ⵎⴰⵛⴰ ⴰⵔⵢⴰⵣ ⴷ ⴰⵎⵜⵉⵇⵇⵉ,

ⵎⴰⵏ ⵡⴻⵏ ⵜ ⵉ ⵖⴰ ⵢⴰⴼⴻⵏ?

7 ⴰⵎⵙⴻⴳⴳⴻⴷ ⵉⴳⴳⵓⵔ ⴷⵉ ⵍⴻⵚⴼⴰⵢⴻⵜ ⵏⵏⴻⵙ,

ⵙⵙⴻⵄⴷ ⵏ ⵉⵃⴻⵏⵊⵉⵔⴻⵏ ⵏⵏⴻⵙ

ⵉ ⵉⵜⵜⴻⵊⵊⴰ ⴰⵡⴰⵔⵏⵉ ⴰⵙ.

8 ⵉⵊⵊ ⵏ ⵓⵊⴻⴵⵉⴷ ⵏⵏⵉ ⵉⵜⵜⵖⵉⵎⴰⵏ

ⵅ ⵍⴽⵓⵔⵙⵉ ⵏ ⵛⵛⵔⴻⵄ,

ⵉⵜⵜⵚⴻⴼⴼⴰ ⵎⴰⵔⵔⴰ ⵍⵖⴰⵔ ⵙ ⵜⵉⵟⵟⴰⵡⵉⵏ ⵏⵏⴻⵙ. [d]

9 ⵡⵉ ⵉⵣⴻⵎⵎⴰⵔⴻⵏ ⴰⴷ ⵢⵉⵏⵉ:

“ⵏⴻⵛⵛ ⵙⵙⵉⵣⴻⴷⴳⴻⵖ ⵓⵍ ⵉⵏⵓ,

ⵏⴻⵛⵛ ⵉⵣⴷⵉⴳⴻⵖ ⵣⵉ ⴷⴷⵏⵓⴱ ⵉⵏⵓ!”? [e]

10 ⵉⵊⵊ ⵏ ⵍⴻⵡⵣⴻⵏ ⴷ ⵉⵊⵊ ⵏ ⵍⴻⵡⵣⴻⵏ ⵏⵏⴻⵖⵏⵉ,

ⵉⵊⵊ ⵏ ⵉⴼⴰ ⴷ ⵉⵊⵊ ⵏ ⵉⴼⴰ ⵏⵏⴻⵖⵏⵉ,

ⴰⵇⴰ ⴰⵜⴻⵏ ⵙ ⵜⵏⴰⵢⴻⵏ ⵉⴷⵙⴻⵏ ⴷ ⵏⵏⵄⵉ ⵉ ⵙⵉⴷⵉ. [f]

11 ⴰⵃⵓⴷⵔⵉ ⵉⵙⵙⵛⴰⵏⴰ ⴷⵉ ⵜⵎⴻⴳⴳⴰ ⵏⵏⴻⵙ,

ⵎⴰ ⵍⵅⴻⴷⵎⴻⵜ ⵏⵏⴻⵙ ⵜⴻⵚⴼⴰ

ⵏⵉⵖ ⴰⵇⴰ ⵏⵉⵛⴰⵏ ⵉ ⵜⴻⴵⴰ.

12 ⴰⵎⴻⵣⵣⵓⵖ ⵉⵜⵜⴻⵙⵍⴰⵏ ⴷ ⵜⵉⵟⵟ ⵉⵜⵜⵡⴰⵍⴰⵏ,

ⵙⵉⴷⵉ ⵉⴳⴳⴰ ⵉ-ⵜⴻⵏ ⵙ ⵜⵏⴰⵢⴻⵏ ⵉⴷⵙⴻⵏ. [g]

13 ⵡⴰⵔ ⵜⵜⴻⵅⵙ ⵉⴹⴻⵚ

ⵎⴰⵃⴻⵏⴷ ⵡⴰⵔ ⵜⴻⴷⴷⵉⴽⴽⵡⵉⵍⴻⴷ ⴷ ⴰⵎⴻⵣⵍⵓⴹ,

ⴰⵔⵣⴻⵎ ⵜⵉⵟⵟⴰⵡⵉⵏ ⵏⵏⴻⵛ,

ⵙⵢⵉⵡⴻⵏ ⵉⵅⴻⴼ ⵏⵏⴻⵛ ⵙ ⵡⴻⵖⵔⵓⵎ. [h]

14 ‘ⵡⴰⵔ ⵉⵃⵍⵉ, ⵡⴰⵔ ⵉⵃⵍⵉ!’, ⵉⵇⵇⴰⵔ ⵓⵎⵙⴻⵡⵡⴻⵇ,

ⵎⴰⵛⴰ ⵎⴰⵍⴰ ⵢⵓⵢⵓⵔ,

ⴰⵎⵎⵓ ⵉ ⵉⵜⵜⵛⴻⵏⵏⴻⵄ ⵉⵅⴻⴼ ⵏⵏⴻⵙ.

15 ⵓⵔⴻⵖ ⵉⴵⴰ, ⵓⵍⴰ ⴷ ⴰⵟⵟⴰⵙ ⵏ ⵍⵎⴰⵔⵊⴰⵏ,

ⵎⴰⵛⴰ ⵉⵢⴻⵏⵛⵉⵛⴻⵏ ⵛⵛⵓⵔⴻⵏ ⵙ ⵜⵓⵙⵙⵏⴰ

ⴷ ⵉⵛⵜ ⵏ ⵍⵇⴻⵛⵄⴻⵜ ⵉⵖⵍⴰⵏ ⴰⵟⵟⴰⵙ. [i]

16 ⵎⴰⵍⴰ ⵉⵊⵊⴻⵏ ⵉⴷⴷⴰⴽⴽⵡⴰⵍ

ⴷ ⴰⴹⵎⴰⵏ ⵉ ⵢⵉⵊⵊ ⵏ ⵓⴱⴰⵔⵔⴰⵏⵉ,

ⵅⴻⵏⵏⵉ ⴽⵙⵉ ⴰⵔⵔⵓⴹ ⵏⵏⴻⵙ ⵓ ⴽⵙⵉ ⵜ ⴷ ⴷⴷⵉⵢⵢⴻⵜ

ⵉ ⵢⵉⵏⵏⵉ ⵡⴰⵔ ⵉⵜⵜⵡⴰⵙⵙⵏⴻⵏ. [j]

17 ⴷ ⴰⵎⵉⵥⵉⴷ ⵉ ⴱⵏⴰⴷⴻⵎ ⴰⵖⵔⵓⵎ

ⵏⵏⵉ ⵉⵟⵟⴻⴼ ⵙ ⵉⵅⴰⵔⵔⵉⵇⴻⵏ,

ⴰⵡⴰⵔⵏⵉ ⴰⵙ ⴰⴷ ⵉⵛⵛⵓⵔ ⵓⵇⴻⵎⵎⵓⵎ ⵏⵏⴻⵙ

ⵙ ⵉⵇⴰⵢⴰⵙⴻⵏ. [k]

18 ⵉⵅⴻⵎⵎⵉⵎⴻⵏ ⵜⵜⴻⴽⵎⵉⵍⴻⵏ ⵙ ⵓⵛⴰⵡⴰⵔ,

ⵅ ⵓⵢⴻⵏⵏⵉ ⵏⴷⴻⵀ ⴰⵎⴻⵏⵖⵉ ⵙ ⵓⴷⴻⴱⴱⴰⵔ. [l]

19 ⵡⴻⵏⵏⵉ ⵉⴳⴳⵓⵔⴻⵏ ⴷⴰ ⴷ ⴷⵉⵀⴰ ⵙ ⵜⴻⵅⴱⴰⵔⵊⵉⵜ,

ⵉⵜⵜⵄⴰⵔⵔⴰ ⵎⵉⵏ ⵉⵏⵏⵓⴼⴼⴰⵔⴻⵏ,

ⵡⴰⵔ ⵜⵙⴻⴱⴱⴻⴱ ⴰⴽ-ⴷ ⵡⴻⵏⵏⵉ ⵉⵙⵙⵃⵉⵏⵏⵉⴱⴻⵏ

ⵙ ⵉⵢⴻⵏⵛⵉⵛⴻⵏ ⵏⵏⴻⵙ ⵉⵚⴻⴱⵀⴻⵏ. [m]

20 ⵡⴻⵏⵏⵉ ⵉ ⵖⴰ ⵉⵏⴻⵄⵍⴻⵏ ⵅ ⴱⴰⴱⴰⵙ ⴷ ⵢⴻⵎⵎⴰⵙ,

ⵍⴻⴼⵏⴰⵔ ⵏⵏⴻⵙ ⴰⴷ ⵉⵜⵜⵡⴰⵙⵙⴻⵅⵙⵉ

ⴷⵉ ⵜⴰⴵⴻⵙⵜ ⵜⴰⴱⴰⵔⵛⴰⵏⵜ. [n]

21 ⵎⴰⵍⴰ ⵜⴰⵙⵖⴰⵔⵜ ⵜᵉⵜⵜⵡⴰⴽⵙⴻⴱ ⴷⴻⵖⵢⴰ

ⵙ ⵜⴰⵣⵍⴰ ⴷⴻⴳ ⵓⵎⴻⵣⵡⴰⵔⵓ,

ⵡⴰⵔ ⴷⴷ-ⵜⵉⵡⴻⴹ ⴷ ⵍⴱⴰⵔⴰⴽⴰ ⵖⴰⵔ ⵓⵏⴻⴳⴳⴰⵔ. [o]

22 ⵡⴰⵔ ⵇⵇⴰⵔ: “ⵏⴻⵛⵛ ⴰⴷ ⵅⴻⵍⴼⴻⵖ ⵍⵖⴰⵔ!”

ⵎⴰⵛⴰ ⵜⵛⴻⵍ ⵅ ⵙⵉⴷⵉ ⵓ ⵏⴻⵜⵜⴰ ⴰⴷ ⵛⴻⴽ ⵉⵙⵙⴻⵏⵊⴻⵎ. [p]

23 ⵉⵊⵊ ⵏ ⵍⴻⵡⵣⴻⵏ ⴷ ⵉⵊⵊ ⵏ ⵍⴻⵡⵣⴻⵏ ⵏⵏⴻⵖⵏⵉ,

ⴰⵇⴰ ⴰⵜⴻⵏ ⴷ ⵏⵏⵄⵉ ⵉ ⵙⵉⴷⵉ,

ⵍⵎⵉⵣⴰⵏⴰⵜ ⵉⵖⴻⵛⵛⴻⵏ ⵡⴰⵔ ⴵⵉⵏ ⵛⴰ ⵎⵍⵉⵃ. [q]

24 ⵉⵚⵓⵔⴰⴼ ⵏ ⵉⵊⵊ ⵏ ⵡⴻⵔⵢⴰⵣ ⴰⵇⴰ ⴰⵜⴻⵏ ⵏ ⵙⵉⴷⵉ,

ⵅⴻⵏⵏⵉ ⵎⴰⵎⵎⴻⵛ ⵖⴰ ⵢⴻⴳⴳ ⴱⵏⴰⴷⴻⵎ

ⴰⴷ ⵉⵙⵙⴻⵏ ⴰⴱⵔⵉⴷ ⵏⵏⴻⵙ? [r]

25 ⴰⵇⴰ-ⵜ ⴷ ⵍⴼⴻⵅ ⵉ ⴱⵏⴰⴷⴻⵎ

ⵉ ⵖⴰ ⵉⵍⴰⵖⴰⵏ ⵙ ⵓⵇⴻⴵⴻⵇ ‘ⴰⵎⵇⴻⴷⴷⴻⵙ’,

ⵓ ⵄⴰⴷ ⴰⵡⴰⵔⵏⵉ ⵍⵡⵓⵄⵓⴷ ⵏⵏⴻⵙ ⵉ ⵉⴳⴳⴰ

ⴰⴷ ⵉⵅⴰⵔⵔⴻⵚ.

26 ⵉⵊⵊ ⵏ ⵓⵊⴻⴵⵉⴷ ⴰⵎⵉⵖⵉⵙ ⵉⵜⵜⵚⴻⴼⴼⴰ ⵉⵄⴻⴼⴼⴰⵏⴻⵏ,

ⵉⵜⵜⴻⵊⵊⴰ ⵜⴰⵊⴰⵔⵔⴰⵔⵜ

ⵏ ⵜⴻⵍⵡⵉⵃⵜ ⵉⵜⵜⴻⵃⵍⵓⴵⵓⴹⴻⵏ ⵉ ⵓⵙⴰⵔⵡⴻⵜ

ⴰⴷ ⵅⴰⵙⴻⵏ ⵉⵄⵇⴻⴱ.

27 ⵜⵡⴰⵔⵔⵉⵜ ⵏ ⵏⵏⴻⴼⵙ ⵏ ⴱⵓⵃⴱⴻⵍ ⵏ ⴱⵏⴰⴷⴻⵎ

ⴷ ⵍⴻⴼⵏⴰⵔ ⵏ ⵙⵉⴷⵉ ⵏⵏⵉ ⵢⴰⵔⴻⵣⵣⵓⵏ

ⴷⵉ ⴷⴰⵅⴻⵍ ⵏ ⵉⵅⵅⴰⵎⴻⵏ ⵏ ⵓⵄⴻⴷⴷⵉⵙ.

28 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ

ⵃⴻⵟⵟⴰⵏ ⴰⵊⴻⴵⵉⴷ,

ⵓ ⵍⵄⴰⵔⵛ ⵏⵏⴻⵙ ⵉⵙⵙⴻⵊⵀⴻⴷ ⵉ-ⵜ

ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ.

29 ⵜⴰⵍⵡⵉⵣⵜ ⵏ ⵉⵃⵓⴷⵔⵉⵢⵢⴻⵏ ⴷ ⵊⵊⴻⵀⴷ ⵏⵙⴻⵏ,

ⵓ ⵍⵄⴰⴹⴰⵎⴰ ⵏ ⵉⵡⴻⵙⵙⵓⵔⴰ ⴷ ⴰⵛⵓⵡⵡⴰⴼ ⵉⵛⴰⴱⴻⵏ. [s]

30 ⵉⵢⴻⵣⵣⵉⵎⴻⵏ ⵉⵜⵜⴰⵣⵣⵍⴻⵏ ⵙ ⵉⴷⴰⵎⵎⴻⵏ

ⵙⵙⵉⵣⴷⵉⴳⴻⵏ ⴱⵏⴰⴷⴻⵎ ⵣⵉ ⵍⵖⴰⵔ,

ⵓ ⵜⵉⵢⵢⵉⵜⴰ ⵚⴻⴼⴼⴰⵏⵜ ⵓⵍⴰ ⴷ ⵜⴰⴽⵔⵉⵛⵜ.[t]