1 Iḥřa ijj n umezřuḍ

igguren di řeṣfayet nnes,

x wenni ɣar iǧan iyencicen farɣen,

u aqa t d abuhaři i yeǧa. [a]

2 Břa tussna uřa d řeɛmar war iǧi ca mliḥ,

wenni ittqeǧqen s iḍaren nnes, ad ixḍa.

3 Tubbuheřya n bnadem

issfarraɣ abrid nnes,

u xenni uř nnes ad isɛar x SIDI. [b]

4 Agřa ittawi-dd aṭṭas n imeddukkař,

maca amezřuḍ isemmeḥ dayes

umeddukkeř nnes.[c]

5 Acehhad issxarriqen

war ittwaḥesseb ca d amezdag,

wenni dd-yarexxun i ixarriqen,

war inejjem. [d]

6 Aṭṭas ttzawgen zzat i wudem n umcenneɛ,

kuř ijj ittexs ad yiři d ameddukkeř

n weryaz i ɣar iǧa terzifin.

7 Marra aytmas n umezřuḍ carrhen t,

mecḥař ttiggʷejjen xas

imeddukkař nnes!

Netta iḍeffar awařen

nni war isekkwin walu. [e]

8 Wenni iṭṭfen uř amiɣis,

ittexs řeɛmar nnes,

wenni iḥeṭṭan řefhamet,

ad yaf min icnan.

9 Ijj n ucehhad issxarriqen

war ittwaḥesseb ca d amezdag,

wenni yarexxun i ixarriqen,

ad ittwahellek.

10 Afeyyec war dd-yusi x ubuhaři,

mammec ɛad x umsexxar

maḥend ad iselleṭ x řḥukkam. [f]

11 Řeɛqeř n bnadem ittarra i-t

ad igg s ttasiɛ n řxaḍar

tusa-dd xas maḥend ad imeyyek

x uxeṭṭu nnes.

12 Asxeḍ n ujeǧid

am zzhir n weyrad di temẓi nnes,

maca arḍa nnes am nnda x arbiɛ. [g]

13 Mmis abuhaři d arẓiyyet i babas,

amcubbec n temɣart igga

am tuddimt n tzeqqa war iqeṭṭin. [h]

14 Taddart d wagřa

aqa aten d řwart n řejdud

maca ict n temɣart ifehhmen

aqa-tt n SIDI. [i]

15 Řeɛgez yarra bnadem

ad iwḍa deg iḍeṣ yuǧɣen,

u řeɛmar iccur s řɣecc ad iǧaẓ. [j]

16 Wenni iḥeṭṭan tawṣeyyet,

iḥeṭṭa řeɛmar nnes,

wenni war iḥeṭṭin ibriden nnes,

ad immet. [k]

17 Wenni ittḥinnan x umezřuḍ,

yareṭṭeř i SIDI.

Netta ad as ixeǧeṣ řxedmet nnes.

18 Webbex mmic, mařa ɛad din ca n řayas,

maca war t neqq ca,

war ttejji ca ad iksi aya řeɛmar nnec. [l]

19 Wenni isɛaren aṭṭas,

ad ittwaxeǧeṣ i manayenni,

maɣar mařa texsed ad t tmenɛed,

xenni ad dayes tarenyed waha.

20 Seř cek ɣar ucawar

uca qbeř ttarbiyyet,

maḥend ad tdewřed d amiɣis

ɣar uneggar.

21 Aqa din aṭṭas n ixemmimen

deg wuř n weryaz,

maca ccwar n SIDI ittɣima ibedd. [m]

22 Tamexsiwt icewwaren n bnadem

d řeḍrafet nnes,

ammu i iǧa ijj n umezřuḍ ḥsen

x ijj n bu-ixarriqen.

23 Tiggʷudi n SIDI tneddeh ɣar tudart,

maɣar itteṭṭeṣ ijjiwen,

war ɣares dd-ittas ca

min war iḥřin. [n]

24 Ameɛguz issnuffar afus nnes

di ṭṭebṣi,

war t-i-dd-ittarri ɛawed

ɣar uqemmum nnes. [o]  [p]

25 Wwet amestehziy,

ammu i ɣa iften

wenni war ɣares bu řefhamet,

u ɛaqeb afehham,

xenni ad ikseb řefhamet. [q]

26 Wenni itteggen ɣezzu di babas

niɣ wenni issuffuɣen yemmas,

aqa d mmis n řefḍiḥet

nni yarran bnadem ad iseḍḥa.

27 Sbedd-dd, a mmi,

maḥend ad tesřed ɣar uwebbex,

mařa texsed ad tḥeyyded

x wawařen iccuren s tussna.

28 Ijj n ucehhad i war isekkwin

iɣeṭṭeř zi řḥeqq,

uca aqemmum n iɛeffanen

iṣarreḍ řɣecc.

29 Imestehzayen tᵉttraja aten řeḥkamet,

u tiyitta deg weɛrur i ibuhařiyyen.