1 Wenni iɛezzřen ixef nnes,

yarezzu x meẓri nnes,

netta idduqquz x marra

min izemmaren ad yiři d adebbar.

2 Abuhaři war d as tᵉtteɛjib řefhamet,

itteɛjib as mɣir aɛarri n wuř nnes.

3 Xmi dd-ittadef uɛeffan,

ittas-dd uřa d aseḥqar,

u ak-d řefḍiḥet ittas-dd řɛar.

4 Awařen zeg uqemmum n weryaz

am waman yuǧɣen,

řɛunṣar n tiɣit d ict n tiɣzart ittazzřen.

5 War iǧi ca mliḥ ad tessɛizzed aɛeffan,

maḥend ad tessḥeyyded

amsegged di ccreɛ. [a]

6 Iyencicen n ubuhaři neddhen t

ɣar umcebbec,

aqemmum nnes ittřaɣa-dd i weɛmud.

7 Aqemmum n ubuhaři d ahellek nnes,

iyencicen nnes d řfex i řeɛmar nnes. [b]

8 Awařen n ixbarjiyyen am ḥalawit,

hekkwant deg ixxamen

n daxeř n uɛeddis. [c]

9 Wenni iǧan d amarxu di řxedmet nnes,

aqa t d umas n bab n uředdeǧ.

10 Isem n SIDI d ijj n lburj imten,

amsegged ittazzeř ɣar dinni,

uca ittwassakkwaḍ ař din di řaman. [d]

11 Agřa n bu-wagřa

d tandint nnes ijehden,

tanita am yijj n řḥiḍ yuɛřan qaɛ

di řbař nnes. [e]

12 Qbeř ma i ɣa ittwarẓ,

ittgeɛɛad wuř n bnadem,

maca awaḍeɛ ittizwař as i ccan. [f]

13 Wenni dd-ittarran awař

qbeř i ɣa iseř,

d man aya d tubbuheřya

d řefḍiḥet i netta.

14 Buḥbeř n weryaz

ittsenned i-t ɣar řehřac nnes,

maca buḥbeř ittwarẓen,

wi izemmaren ad t iksi?

15 Uř n ufehham yarezzu tussna,

amezzuɣ n umiɣis yarezzu tussna.

16 Tarzeft n bnadem tarezzem as tiwwura,

tneddeh i-t zzat i wudem n imeqqranen.

17 Wenni d amezwaru di ddeɛwet nnes

ittban d amsegged,

maca xenni ad dd-yas jjar nnes

uca ittnecceb di tmesřact. [g]

18 Taqedduḥt ittejjan imenɣan ttbeddan,

tbeṭṭa jar inni ɣar teǧa ṣṣulṭa.

19 Ijj n uma nni umi di ggin řɛib,

ittwaṭṭef ktar x ict n tendint ijehden,

imenɣan ggin am zzekrun n řeqṣar.

20 Zi řɣiǧet n uqemmum n ijj n weryaz

ittyawan uɛeddis nnes,

ad ijjawen zi ṣṣabet n iyencicen nnes. [h]

21 Řmewt d tudart deg ufus n yiřes,

kuř ijjen wenni ten ittexsen,

ad yecc rɣiǧet nsen. [i]

22 Wenni yufin tamɣart,

yufa min iṣebḥen,

u netta iṭṭef arḍa n SIDI. [j]

23 S uḥeccem issawař umezřuḍ,

bu-wagřa ittarra-dd s řeqsaḥet.

24 Aryaz nni ɣar ǧan imeddukkař aṭṭas,

ad iwḍa di tamara,

maca ca n imuren

ameddukkeř ittexs i cek

ktar zi tawmat. [k]