1 Binu d ijj n umestehziy,

ccrab d bu-ssḍeɛ,

kuř ijjen wenni zzayes i ɣa iweddaren,

ɛemmarṣ war iddikkwiř d amiɣis.

2 Ahuddi n ujeǧid am zzhir n wayrad:

wenni t isseɛaren,

ixeṭṭa ak-d řeɛmar nnes.[a]

3 Asmaḥ deg umcubbec

aqa d ccan i weryaz,

maca kuř abuhaři ad idduqqez. [b]

4 Zi řweqt n řexrif war icarrez umeɛguz,

xenni ad ittar di řweqt n tmeyra,

maca war ittif walu.

5 Ixarriṣen deg wuř n bnadem

aman yuǧɣen,

maca ijj n weryaz s řefhamet

issen ad ten yayem. [c]

6 Aṭṭas n iwdan ttřaɣan x ca n ijjen

‘ameddukkeř nsen d amtiqqi’,

maca aryaz d amtiqqi,

man wen t i ɣa yafen?

7 Amsegged iggur di řeṣfayet nnes,

sseɛd n iḥenjiren nnes

i ittejja awarni as.

8 Ijj n ujeǧid nni ittɣiman

x řkursi n ccreɛ,

ittṣeffa marra řɣar s tiṭṭawin nnes. [d]

9 Wi izemmaren ad yini:

“Necc ssizedgeɣ uř inu,

necc izdigeɣ zi ddnub inu!”? [e]

10 Ijj n řewzen d ijj n řewzen nneɣni,

ijj n ifa d ijj n ifa nneɣni,

aqa aten s tnayen idsen d nnɛi i SIDI. [f]

11 Aḥudri isscana di tmegga nnes,

ma řxedmet nnes teṣfa

niɣ aqa nican i teǧa.

12 Amezzuɣ ittesřan d tiṭṭ ittwařan,

SIDI igga i-ten s tnayen idsen. [g]

13 War ttexs iḍeṣ

maḥend war teddikkwiřed d amezřuḍ,

arzem tiṭṭawin nnec,

syiwen ixef nnec s weɣrum. [h]

14 ‘War iḥři, war iḥři!’, iqqar umsewweq,

maca mařa yuyur,

ammu i ittcenneɛ ixef nnes.

15 Ureɣ iǧa, uřa d aṭṭas n řmarjan,

maca iyencicen ccuren s tussna

d ict n řqecɛet iɣřan aṭṭas. [i]

16 Mařa ijjen iddakkwař

d aḍman i yijj n ubarrani,

xenni ksi arruḍ nnes u ksi t d ddiyyet

i yinni war ittwassnen. [j]

17 D amiẓid i bnadem aɣrum

nni iṭṭef s ixarriqen,

awarni as ad iccur uqemmum nnes

s iqayasen. [k]

18 Ixemmimen ttekmiřen s ucawar,

x uyenni ndeh amenɣi s udebbar. [l]

19 Wenni igguren da d diha s texbarjit,

ittɛarra min innuffaren,

war tsebbeb ak-d wenni issḥinniben

s iyencicen nnes iṣebhen. [m]

20 Wenni i ɣa ineɛřen x babas d yemmas,

řefnar nnes ad ittwassexsi

di taǧest tabarcant. [n]

21 Mařa tasɣart tᵉttwakseb deɣya

s tazřa deg umezwaru,

war dd-tiweḍ d lbaraka ɣar uneggar. [o]

22 War qqar: “Necc ad xeřfeɣ řɣar!”

maca tceř x SIDI u Netta ad cek issenjem. [p]

23 Ijj n řewzen d ijj n řewzen nneɣni,

aqa aten d nnɛi i SIDI,

řmizanat iɣeccen war ǧin ca mliḥ. [q]

24 Iṣuraf n ijj n weryaz aqa aten n SIDI,

xenni mammec ɣa yegg bnadem

ad issen abrid nnes? [r]

25 Aqa-t d řfex i bnadem

i ɣa iřaɣan s uqeǧeq ‘amqeddes’,

u ɛad awarni lwuɛud nnes i igga

ad ixarreṣ.

26 Ijj n ujeǧid amiɣis ittṣeffa iɛeffanen,

ittejja tajarrart

n teřwiḥt itteḥřuǧuḍen i usarwet

ad xasen iɛqeb.

27 Twarrit n nnefs n buḥbeř n bnadem

d řefnar n SIDI nni yarezzun

di daxeř n ixxamen n uɛeddis.

28 Tamexsiwt icewwaren d řaman

ḥeṭṭan ajeǧid,

u řɛarc nnes issejhed i-t

s tmexsiwt icewwaren.

29 Talwizt n iḥudriyyen d jjehd nsen,

u lɛaḍama n iwessura d acuwwaf icaben. [s]

30 Iyezzimen ittazzřen s idammen

ssizdigen bnadem zi řɣar,

u tiyyita ṣeffant uřa d takrict.[t]