1 Beddem nican di tiřelli tenni umi d aneɣ ifekk Lmasiḥ, uca war ttdekkwiřem ɛawed, maḥend ad teksim azayřu n tesmuɣi. [a]

2 Aqa ayi necc Bulus ad awem iniɣ, mařa tᵉttwaxetnem, Lmasiḥ war kenniw ineffeɛ deg walu. [b] 3 Ɛawed cehhdeɣ i marra bnadem i ɣa ittwaxetnen, aqa netta s umarwas ḥima ad igg marra min iǧan di Ccariɛa. 4 Kenniw inni ittexsen ad ttwaseggdem s Ccariɛa, aqa tdewřen tarxum zi Lmasiḥ, uca zi arḍa i zi dd-tewḍam. 5 Minzi neccin nettraja asitem n tsegda s Arruḥ nni iǧan zi l’iman. 6 Maɣar di Yasuɛ Lmasiḥ, axtan niɣ břa axtan war isekkwi walu, maca mɣir l’iman waha nni ittwakemmřen s tayri. [c]

7 Kenniw tuzzřem mliḥ! Wi kenniw imenɛen ařami war tᵉttᵉṭṭifem ɛad s řaman di tidett? [d] 8 Ṭwaɛ-a nwem war iǧi zeg wenni d awem ittřaɣan. 9 Cwayt n wentun issmemm marra řɛejnet n warecti. [e] 10 Necc ttiqqeɣ daywem di Siditneɣ, aqa war ɣarwen tiři nneyyet nneɣni. U wenni kenniw ittseddaɛen, aqa ad yarbu řḥukm, man wen ma iɛna netta. [f]

11 A aytma, mařa necc ttbarrḥeɣ kenniw ɛad s wextan, mayemmi ɛad i ɣa ttwamarrteɣ? Ma xenni tᵉttwabeṭṭeř taɛenkrift n ṣṣalib? [g] 12 Meɛlik qaɛ ttexseɣ, aqa inni ittexsen ad kenniw qessen, ad ttwaqessen simant nsen.[h]

13 I tiřelli umi dd-tᵉttwařaɣam kenniw, a aytma, maca war ttqeǧbem tiřelli am lfurṣa i weysum, maca sexxarem ijjen i wenneɣni s tayri. [i] 14 Minzi marra Ccariɛa tkemmeř s yijj n wawař, aqa s man aya: “Ad texsed jjar nnec amecnaw ixef nnec.” [j] 15 Maca mařa tzeɛɛfem u tᵉttettem ijjen wenneɣni, xenni ḥḍam ixef nwem war tᵉttᵉttem ca ayawya qaɛ. [k]

16 Maca necc ad awem iniɣ: Uyurem di Arruḥ, war ttkemmřen ɛemmarṣ nnecwat n weysum. [l] 17 Minzi ddat yarezzu min iǧan ḍidd n Arruḥ, uca Arruḥ yarezzu min iǧan ḍidd n weysum. Nitni s tnayen ttbeddan ak-d wayawya, x uyenni war tzemmarem ad teggem min texsem. [m] 18 Maca mařa Arruḥ indeh i kenniw, war teǧim ɛad sadu Ccariɛa.

19 Řexdayem n weysum banent, aqa atent d zzina d řexmej d farq-ccɣeř [n]  [o] 20 d uɛbad i l’aṣnam d tseḥḥart d řeɛdawet d umcebbec d řeḥsed d tefqeḥt d uɣewweɣ d ubeṭṭu d tɣuriwin i dd-itteffɣen zeg webrid, [p] 21 d tusmi d wenɣay d uɣelli d řefsed uřa d timesřayin nneɣnit am tina. Inni ittceɣřen ixef nsen ak-d tmesřayin-a, aqa izwareɣ nniɣ t, u ad t iniɣ ɛawed, aqa nitni war warrten ca Tageldit n AREBBI. [q]

22 Maca řɣiǧet n Arruḥ aqa-tt d tayri d řefraḥet d řehna d řeḍrafet d ttasiɛ n řxaḍar d tcuni d l’iman d temhint uřa d ṣṣbar. [r] 23 Ccariɛa war teǧi ḍidd n tmesřayin-a. [s] 24 Maca inni iǧan zi Lmasiḥ aqa ṣellben aysum nsen ak-d marra ccehwat d nnecwat. [t] 25 Ejj aneɣ ad neddar s Arruḥ u ad nsellem ixef nneɣ i Arruḥ. 26 War d aneɣ ittejji ad nweqqar ijj wenneɣni s nnifaq, am nesseḥqara ijjen wenneɣni u nettasem uřa d ijjen zeg wenneɣni.