1 Xseɣ ad iniɣ, mecḥař ma d awrit aqa-t ɛad d aḥenjir, war din bu řfarq x umsexxar, waxxa netta d bab n marra nitni. 2 Netta iǧa ɛad sadu imeḥdayen u sadu inni ittseyyaren taddart ař řweqt i yegga babas. 3 Ammu ɛawed neccin, umi d aneɣ tuɣa ɛad d iḥenjiren, tuɣa aneɣ d isemɣan sadu ṣṣulṭa n lfarayiḍ n ddunect-a. 4 Maca umi dd-yiweḍ uɛemmar n řweqt, AREBBI aqa issekk-dd Mmis i yeǧan zi temɣart d wenni iǧan sadu Ccariɛa, [a] 5 ḥima ad ifdi inni iǧan sadu Ccariɛa uca xenni neccin ad neṭṭef řefḍeř maḥend ad nettwaqbeř d mmis. [b]  [c]

6 Minzi kenniw teǧam d arrawen, AREBBI issekk Arruḥ n Mmis deg wuřawen nwem, wenni ittřaɣan: ‘Baba, Babatneɣ!’ [d] 7 S uyenni war teǧim ɛad d imsexxaren, maca d arrawen u mařa arrawen i teǧam, aqa kenniw ɛawed d iwriten n AREBBI s Yasuɛ Lmasiḥ. 8 Maca di zzman i war tessinem ca AREBBI, tuɣa tɛebbdem inni war iǧin s tewwa d irebbiten. [e] 9 Maca řexxu, awarni řami tessnem AREBBI, ɛad ḥsen AREBBI yargeb xawem, aqa tɛeqbem ɛawed ɣar ṣṣulṭa n lfarayiḍ iḍeɛfen izeřḍen n ddunect-a, texsem ɛawed ad asent tᵉmmarsem ixef nwem am zeg wecḥař uya! [f] 10 Tḥeṭṭam ussan d iyuren d zzmanat d iseggʷusa. [g] 11 Ttᵉggʷedeɣ xawem aqa ttamareɣ jar awem x walu.

12 A aytma, ttzawageɣ kenniw, iřim am necc, minzi necc am kenniw. Kenniw war d ayi teggim walu min war iḥřin. 13 Aqa kenniw tessnem belli barrḥeɣ awem-dd s Řexbar Aṣebḥan deg umezwaru s tuḍɛeft n arrimet inu. 14 Kenniw war tesseḥqarem niɣ tessṭeyyḥem zeg umarret n arrimet inu, maca tqebřem ayi am yijj n lmalak n AREBBI u am Yasuɛ Lmasiḥ. [h] 15 Mani truḥ xenni lbaraka nwem? Minzi cehhdeɣ xawem belli, mařa tuɣa tzemmarem, ad tqeřɛem tiṭṭawin nwem, ḥima ad ayi tent tewcem. 16 Ma dewřeɣ d řeɛdu nwem, minzi barrḥeɣ kenniw s tidett? 17 Nitni cḍaren aṭṭas xawem, maca war iǧi amenni waha, maɣar xsen ad kenniw ḥebbsen, ḥima kenniw ad tecḍarem xasen. [i] 18 Wah, mliḥ ad tiřim řebda tceṭṭarem di min iǧan d aṣebḥan, maca war iǧi xmi kiwem i ɣa ḥḍareɣ waha. 19 A iḥenjiren inu, twařa nneɣnit aqa ayi i kenniw am yict n temɣart tenni iksin ddeyset zzaywem s unezbar n tarwa, ař daywem i ɣa iřint tefras n Lmasiḥ. [j] 20 Xseɣ řexxu ad iřiɣ akidwem uca ad beddřeɣ tmijja inu, minzi aqa ugnuɣ zzaywem.

21 Inim ayi, kenniw inni ittexsen ad tiřim sadu Ccariɛa, ma war tᵉṭṭiɛem ca Ccariɛa? 22 Minzi aqa tura belli Ibrahim tuɣa ɣares tnayen n iḥenjiren, ijjen n tayya, wenneɣni n tḥurrect. [k] 23 Wenni n tayya aqa ittwaxřeq-dd ɛlaḥsab ddat, maca wenni n tḥurrect ittwaxřeq-dd ɛlaḥsab lwaɛd. [l] 24 Tina d tnayen n imedya n tnayen n řɛuhud, ijjen n wedrar n Sina, wenni i dd-ittarwen tasmuɣi, aqa-t Hajar. 25 Minzi Hajar d adrar n Sina di Ɛarabiyya, tenni yarewsen di Urcalim n řexxu, tenni iǧan di tesmuɣi ak-d tarwa nnes. [m] 26 Maca Urcalim n sennej d taḥurrect, aqa-tt d yemmatneɣ. [n] 27 Minzi tura:

“Farḥ, tenni war ittirwen ɛemmarṣ!

Duqqez s usřiwřew, sɣuyy s jjehd,

a cem tenni war issinen řewjeɛ n tarwa,

maɣar tarwa n tenni di semḥen

d aṭṭas x tarwa n tenni ɣar iǧa weryaz.” [o]

28 Maca neccin a aytma, d tarwa n lwaɛd am Isḥaq. [p] 29 Maca am di řweqt nni wi dd-itwaxeřqen ɛlaḥsab ddat tuɣa imarret wenni dd-ittwaxeřqen ɛlaḥsab Arruḥ, ammu ɛawed řexxu. [q] 30 Maca min qqarent Tira Iqeddsen? “Nḍarem barra tayya d mmis, minzi war ittiři mmis n tayya d awrit ak-d mmis n tḥurrect.” [r] 31 S uyenni, a aytma, aqa war neǧi ca d tarwa n tayya, maca tarwa n tḥurrect. [s]