1 A aytma, mařa ḥed jar awem iwḍa-dd xas ddenb, ejj xenni inni igguren di Arruḥ ad t seggden s arruḥ n temhint. Ḥḍam, ḥima war tᵉttwajarrbem uřa d kenniw. [a]  [b]

2 Ksim ddqeř ijjen x wenneɣni, ammu i ɣa tkemmřem Ccariɛa n Lmasiḥ. [c] 3 Maɣar mařa ca n yijjen ittɣiř as aqa netta d ca, am t war iǧi, ixeddeɛ ixef nnes. 4 Maca ejj kuř ijjen ad iqeǧeb řxedmet n yixef nnes, xenni ad ɣares yiři usemɣar deg yixef nnes, war iǧi deg inneɣni, 5 minzi kuř ijjen ad iksi ddqeř n yixef nnes. [d]

6 Ejj wenni isřin Awař, ad icarc zi marra tiṣebḥanin i ɣares ak-d wenni zzayes t isřan. [e]

7 War ttxeddɛem ixef nwem, AREBBI war ittejji ḥed ad xas iqeṣṣar. Minzi min ma izarɛ bnadem, ad t imjar ɛawed. [f] 8 Minzi wenni izarrɛen deg weysum, zeg weysum ad imjar řɣecc. Maca wenni izarrɛen di Arruḥ, zi Arruḥ ad imjar Tudart ittduman. 9 Ejj aneɣ war nᵉttiḥeř ca umi nᵉttegg min iǧan d aṣebḥan, minzi ad dd-tas řweqt nni di ɣa nemjar, u man aya war d aneɣ issihiř ca. [g] 10 Ejj aneɣ řexxu, ařami ɣarneɣ ɛad lfurṣa, ad negg tcuni i marra, amezwaru i yinni d icricen akidneɣ di taddart n yinni yumnen. [h]

11 Xzarem, marra tira-ya i d awem dd-uriɣ, uriɣ tt s ufus inu. 12 Marra wi ixsen ad ssemɣaren deg weysum, aqa nitni tteggen xawem aɣiř ḥima ad tᵉttwaxetnem ḥima war ttwamarrten nitni x ssibbet n ṣṣalib n Lmasiḥ. 13 Minzi uřa d inni ittwaxetnen war ṭṭifen ca di Ccariɛa, maca nitni xsen ad tᵉttwaxetnem ḥima ad ssemɣaren di řextan deg weysum nwem. 14 Maca iggʷejen xafi maḥend ad ssemɣareɣ mɣir di ṣṣalib n Siditneɣ Yasuɛ Lmasiḥ s Wenni tᵉttwaṣelleb ddunect i necc u necc i ddunect. 15 Axtan niɣ břa axtan war isekkwi walu, maca wenni dd-ittwaxeřqen zi jdid wah. [i] 16 Marra wi ɣa yuyuren ɛlaḥsab abrid-a, ad xasen yiři řehna d arreḥmet uřa x Israil n AREBBI. [j]

17 War d ayi ittseddiɛ ḥed, minzi iwyeɣ-dd ccamat n Siditneɣ Yasuɛ di arrimet inu. [k]

18 A aytma, ad yiři arḍa n Siditneɣ Yasuɛ Lmasiḥ ak-d arruḥ nwem. Amin.

<- Igalaṭiyyen 5