1 A Igalaṭiyyen ifɣuřen, wi kenniw issuffɣen zeg webrid? Aqa Lmasiḥ tuɣa ittwarcem qibač i tiṭṭawin nwem am wenni immuten x ṣṣalib. [a] 2 Degga waha xseɣ ad t ssneɣ zzaywem: Ma tᵉṭṭfem Arruḥ s řexdayem n Ccariɛa niɣ umi tᵉtteggem array i l’iman? 3 Ma amenni teǧam d ifɣuřen, aqa tebdam s Arruḥ, ma řexxu ad tkemmřem s ddat? 4 Ma teksim tamara aṭṭas x walu? Ma tuɣa s tidett x walu? 5 Wenni d awem iwcin Arruḥ uca ittegg lmuɛjizat jar awem, ma ittegg i-tent zi řexdayem n Ccariɛa niɣ umi tᵉttesřam tabarreḥt n l’iman, 6 am mammec tuɣa Ibrahim yumen di AREBBI uca xenni ittwaḥseb as-dd man aya d tasegda. [b] 7 S uyenni ssnem, belli inni iǧan n l’iman, nitni d ayt n Ibrahim. 8 Minzi issen AREBBI qbeř, aqa řegnus ad ttwaseggden s l’iman, izzar ibeccar Netta i Ibrahim s Řexbar Aṣebḥan, am mammec qqarent Tira Iqeddsen: “Dayek i ɣa ttwabarken řegnus marra.” [c] 9 S uyenni inni yumnen ad ttwabarken ak-d řmumen Ibrahim.

10 Marra inni iddaren s řexdayem n Ccariɛa, aqa nitni sadu nneɛřet, minzi tura: “D amenɛuř kuř ijjen wenni war iqqimen ittᵉṭṭef di marra timesřayin yuran deg wedlis n Ccariɛa ḥima ad tent igg!” [d] 11 Aqa ittban mliḥ belli war din ḥed i ɣa ittwaseggden ɣar AREBBI s Ccariɛa, minzi tura: “Amseggad s l’iman ad iddar!” [e] 12 Xenni Ccariɛa war tkemmeř ca s l’iman, maca bnadem wenni itteggen min dayes yurin, ad zzayes iddar. [f] 13 Maca Lmasiḥ aqa ixeǧeṣ xaneɣ, ḥima ad aneɣ ifekk zi nneɛřet nni iǧan x yinni sadu Ccariɛa am d idweř xaneɣ d amenɛuř, minzi tura: “D amenɛuř kuř ijjen i t ɣa yuyřen x teḥnact!”, [g] 14 ḥima ad tiweḍ lbaraka n Ibrahim ɣar řegnus s Yasuɛ Lmasiḥ, maḥend s l’iman ad neṭṭef lwaɛd n Arruḥ.

15 A aytma, ad ssiwřeɣ x řeḥsab řeɛqeř n bnadem: aqa ijj n řɛahd ittwaggen jar iwdan, war izemmar uřa d ijj ad t ibḍeř niɣ ad dayes ibeddeř ca. [h] 16 Aqa lwuɛud ttwaggen i Ibrahim d zzariɛet nnes. Netta war d as yini ca: “I iɛeqqayen n zzariɛet nwem!”, am i waṭṭas, maca: “I uɛeqqa n zzariɛet nnec!”, am i yijjen, aqa-t d Lmasiḥ. [i] 17 Xenni qqareɣ ammu: Řɛahd nni iggin AREBBI zic di Lmasiḥ, war t tbeṭṭiř ca Ccariɛa, tenni tusa-dd arebɛa-mya u-třatin n iseggʷusa awarni man aya, ḥima ad tegg lwaɛd ixwan. [j] 18 Minzi mařa řwart iǧa s Ccariɛa, aqa war iǧi ɛad s lwaɛd i Ibrahim. Maca AREBBI aqa iwca as t s lwaɛd. [k]

19 Xenni i umi tneffeɛ Ccariɛa? Aqa tᵉttwammarni ɣar lwaɛd x ssibbet n ddnub ařami dd-tusa Zzariɛet tenni umi ittwagg lwaɛd. U s lmalakat temmewc Ccariɛa deg ufus n ijj n lwasit. [l] 20 Lwasit war iǧi d lwasit n ijjen, maca AREBBI d Ijjen.

21 Ma xenni Ccariɛa ḍidd i lwaɛd n AREBBI? Ɛemmarṣ! Minzi mařa tuɣa temmewc ict n Ccariɛa tzemmar ad tesseddar, d tidett tuɣa tasegda s Ccariɛa. 22 Maca Tira Iqeddsen bellɛent x marra di ddnub, ḥima lwaɛd ad immewc s l’iman di Yasuɛ Lmasiḥ i yinni yumnen. [m]

23 Maca qbeř ma i dd ɣa yas l’iman, tuɣa aneɣ nᵉmmeḥḍa di Ccariɛa uca ittwabelleɛ xaneɣ zi l’iman, wenni tuɣa i ɣa iḍharen ɛad. 24 S uyenni tuɣa Ccariɛa am wenni d aneɣ ittarebban ař Lmasiḥ, ḥima ad nettwasegged s l’iman. [n] 25 Maca řexxu, umi dd-yusa l’iman, aqa war neqqim ɛad sadu wenni ittarebban.

26 Minzi marra kenniw d arrawen n AREBBI s l’iman n Yasuɛ Lmasiḥ. [o] 27 Minzi marra inni ittwassɣeḍṣen di Lmasiḥ, aqa arḍen Lmasiḥ. [p] 28 Xenni war din Uday niɣ Aramiy, war din ɛad ismeɣ niɣ aḥurri, war din ɛad aryaz niɣ tamɣart, minzi marra kenniw d ijjen i teǧam di Yasuɛ Lmasiḥ. [q] 29 Mařa kenniw teǧam n Lmasiḥ, aqa kenniw d zzariɛet n Ibrahim uca ɛlaḥsab lwaɛd d iwriten. [r]