1 Am umeḥbus di Siditneɣ, ziyyareɣ xawem, ḥima ad tuyurem am mammec dd-tusa ak-d třaɣit i zi tᵉttwařaɣam, [a] 2 s marra awaḍeɛ n buḥbeř, s temhint u s ttasiɛ n řxaḍar, aqa ad tqebbřem ijj wenneɣni di tayri, [b] 3 ad tecḍarem maḥend ad teqqimem tmunem d ijj di Arruḥ s tseɣwin n řehna, 4 maḥend ad tiřim deg ict n Arrimet u deg ijj n Arruḥ am mammec umi tᵉttwařaɣam deg usitem n třaɣit nwem d ijjen. 5 Maɣar SIDI d Ijjen, d l’iman d ijjen uřa d aseɣḍeṣ d ijjen, [c] 6 u AREBBI d Ijjen, Babatneɣ marra u x marra u s marra u dayneɣ marra. 7 Maca arḍa immewc aneɣ marra idneɣ ɛlaḥsab řmijař n min d aneɣ iwca Lmasiḥ. [d] 8 S uyenni qqaren:

“Igeɛɛed ɣar řuɛřa,

yiwyi akides imeḥbas di tmeḥbast,

iwca tirzifin i iwdan.” [e]

9 Maca min iɛna ɛawed wawař-a, aqa Netta igeɛɛed sennej, mɣir aqa Netta ɣar umezwar ɛawed tuɣa ihwa-dd ɣar ṭṭrufa n temmurt n wadday qaɛ?! [f] 10 Wenni tuɣa dd-ihwan, Netta ɛawed d Wenni tuɣa igeɛɛden sennej i marra ijenwan, ḥima ad issiweḍ marra ɣar řekmařet. [g]

11 Netta yarra ca d rrusul, ca d inabiyyen, ca d imbeccaren, ca d imeksawen u ca d imseřmaden, [h] 12 ḥima ad zzaysen ttwakemmřen imqeddasen i řxedmet n tsexxart, i řebni n Arrimet n Lmasiḥ, [i] 13 ař i ɣa naweḍ marra ɣar umuni d ijjen di l’iman u di tussna n Mmis n AREBBI, ad niři d ijj n bnadem ikmeř s řeɛbar n ṣṣifet tmun n Lmasiḥ. 14 Ittxeṣṣa war nettiři am iḥenjiren inni ittwaɛarran zi ṭṭarf ɣar wenneɣni uca dewřen iggʷjen zi kuř asemmiḍ n useřmed d aḥraymi zeg iwdan nni yarezzun ad aneɣ ɣarren s teḥraymect nsen, [j] 15 maca ittxeṣṣa ad nbedd nican di tayri nneɣ, maḥend marra min ɣarneɣ iǧan ad igma di Lmasiḥ wenni d Azeǧif. [k] 16 Zzayes tennejru u tᵉttwassmun Arrimet marra s marra řemfaṣeř, ɛlaḥsab min immewcen s řeɛbar i mkuř aɣezdis i tyumi n Arrimet, ař ɣa ittwakemmeř řebni nnes di tayri. [l]

17 Maca necc qqareɣ u cehhdeɣ man aya di SIDI, ḥima war teggurem ɛad am mammec uyuren řegnus inneɣni, inni iddaren di řbaṭeř n ixarriṣen nsen, [m] 18 barcnen di řeɛqeř nsen u aggʷejen x Tudart n AREBBI, minzi war daysen bu tussna, u x ssibbet n tqubbanect i daysen iǧan, u x ssibbet n řeqsaḥet n wuř nsen. [n] 19 Nitni qeḍɛen ixef nsen zeg usitem, sellmen ixef nsen i ufucceḥ u i weḍfar n marra markat n řexmej ɛlaḥṣab meẓri nsen. 20 Maca war iǧi ammu i tessnem Lmasiḥ, 21 řami zeɛma kenniw tuɣa tesřam ɣares nican uca třemdem zzayes ɛlaḥsab tidett i iǧan di Yasuɛ. 22 Maca s řɛeks ittxeṣṣa kenniw ad tenḍarem ticři nwem n zic, ad tejjem bnadem aqdim i ittwassexsaren s nnecwat iɣeccen. [o] 23 Ttwaɛedřem zi jdid s nneyyet n řeɛqeř nwem. 24 Arḍem bnadem n jdid i dd-ittwaxeřqen di AREBBI di tsegda u di taqeddast d tidett. [p]

25 S uyenni jjem ixarriqen, siwřem tidett kuř ijj ak-d jjar nnes, minzi neccin d ixfawen ijjen i wenneɣni. [q] 26 Xeyyqem, maca war tteggem ca ddnub, war ttejji ad teɣri tfuct x ijj n uduqqez n uxeyyeq nwem. [r] 27 War tticem ca amcan i ibřis. [s] 28 War tejji wenni ittacaren ad yacar ɛad, maca ḥsen ad yarber s ifassen nnes maḥend ad issuffeɣ ict d řḥajjet d taṣebḥant, maḥend ad tt iwc i yinni iḥdajen. [t] 29 War dd-ittekk ca wawař n wecrah zeg uqemmum nwem, maca min iṣebḥen u min ineffɛen i řebni, ḥima ad tessiwḍem arḍa i yinni i ɣa isřan. [u] 30 War ttessffugmem ca Arruḥ Iqeddsen n AREBBI i zi tᵉttwacemmɛem ař ass n usenjem. [v] 31 Jjem ad zzaywem tᵉttwakkes marra tarzugi d tefqeḥt d weɣḍab d uṣeddeɛ d uceqqef ak-d marra tuɛeffna i dd-ittasen ak-d man aya. [w] 32 Iřim tḍarfem u ggem řeḥnunect deg wayawa. Samḥem i wayawya am AREBBI ɛawed aqa iɣfar aneɣ di Lmasiḥ. [x]