1 S uya iřim d imeḍfaren n AREBBI am iḥenjiren iɛizzen, 2 uyurem di tayri am mammec uřa d Lmasiḥ tuɣa ittexs aneɣ, iwca ixef nnes xaneɣ d tawhibt d tɣarṣt i AREBBI, aqa-tt d ict n řefwaḥet taṣebḥant. [a]

3 Maca x farq-ccɣeř d marra řexmej d ṭṭmeɛ, war xas ittiři bu wawař jar awem am mammec icuwwar i imqeddasen, [b] 4 uřa x řhard issbehdřen niɣ x wawařen ixwan niɣ x tqeṣṣart niɣ x řefḍiḥet, timesřayin i war neffɛent di walu, maca mammec nneɣni ittxeṣṣa aqadi. 5 Minzi tessnem aqa kuř ijj wenni itteggen farq-ccɣeř, niɣ wenni dayes řexmej niɣ ṭṭmeɛ, aqa wanita iɛebbed l’aṣnam, war ɣares bu tesɣart di tgeldit n Lmasiḥ u n AREBBI. [c]

6 War ttejjim uřa d ijjen ad kenniw iɣekkwi s wawařen ixwan, aqa zi man aya dd-ihekkwa weɣḍab n AREBBI x tarwa n řmuɛṣiyyet. [d] 7 War carrcem ca akidsen! 8 Minzi zic tuɣa kenniw d taǧest, maca aqa řexxu kenniw d tafawt di Siditneɣ. S uyenni uyurem am tarwa n Tfawt, [e] 9 minzi řɣiǧet n Tfawt tᵉttiři di marra tcuni d tsegda d tidett. [f] 10 Farzem min ɣa yarḍan Siditneɣ. 11 War carrcem ca di řexdayem tibarcanin i war dd-ittiwyen řɣiǧet, maca webbxem tent. [g] 12 Minzi min tteggen di tnuffra, aqa-t d nnɛi i war tzemmared uřa ad t tɛawded. 13 Minzi marra ad ittwasegged s Tfawt u ad ittwassargeb s Tfawt u marra min issargaben d Tifawt i yeǧa. [h] 14 S uyenni qqaren:

“Faq cek, a bu yiḍeṣ.

Kkar-dd zi taddart n imettinen,

uca ad xak igg Lmasiḥ tafawt.” [i]

15 Ḥḍam ad tuyurem s uweqqar, war iǧi am ibuhařiyyen, maca am imiɣisen, [j] 16 inni i ɣa yawyen ariqqi i řweqt nsen, minzi ussan-a d iɛeffanen. [k] 17 X uyenni war ttiřim d ibuhařiyyen, maca fehmem min ixs AREBBI. [l] 18 War seccaram ca s binu i ittawyen ɣar řeqjaḥet, maca iřim tɛemmarem s Arruḥ. [m] 19 Siwřem di řeɛmur nwem s izehhiden d izřan n uṣebbeḥ d izřan n Arruḥ, ɣennjem deg wuřawen nwem i SIDI. [n] 20 Qadam řebda AREBBI Babatneɣ x kuř ijjen deg Yisem n Siditneɣ Yasuɛ Lmasiḥ. [o] 21 Waḍḍɛem ixef nwem i wayawya di tayri n Lmasiḥ.

22 A timɣarin, waḍḍɛent i yeryazen nkent am tᵉttwaḍḍɛent i Siditneɣ, [p] 23 minzi aryaz aqa d azeǧif n temɣart am uřa d Lmasiḥ i yeǧan d Azeǧif n tmesmunt d wenni itticen Tudart i Arrimet. [q] 24 Am tmesmunt tᵉttwaḍḍeɛ ixef nnes i Lmasiḥ, amenni ɛawed timɣarin ad waḍḍɛent ixef nsent i yeryazen nsent di marra.

25 A iryazen, xsem timɣarin nwem am mammec tuɣa ixs Lmasiḥ tamesmunt uca isellem Ixef nnes di ṭṭweɛ nnes, [r] 26 ḥima ad tt yarr d tamqeddast u ad as issizdeg s usird n Waman Iddaren u s Wawař. [s] 27 Netta ad igg tamesmunt qibač i Yixef nnes s uɛuǧi, břa abeqqiḍ niɣ acebriq, břa uřa d ict n řḥajjet zi marra man aya, maca ad tiři d tamqeddast u břa řɛib. [t]

28 Ammu ittxeṣṣa ad xsen yeryazen timɣarin nsen am arrimet nsen. Aqa wenni ittexsen tamɣart nnes, aqa ittexs ixef nnes. 29 Uřa d ijj war icarh ɛemmarṣ arrimet nnes, maca issecca i-t, ittḥawař xas am mammec ittḥawař ɛawed Lmasiḥ x tmesmunt, 30 minzi neccin d ixfawen n Arrimet nnes, n weysum nnes u n iɣsan nnes. [u]

31 S uyenni aryaz ad yejj babas d yemmas maḥend ad iqqen ɣar temɣart nnes, ad iřin s tnayen idsen d ijj n weysum. [v] 32 Ssirr-a d ameqqran, maca necc qqareɣ t zi jjihet n Lmasiḥ d tmesmunt. 33 Maca ittxeṣṣa ɛawed i kuř ijj zzaywem maḥend ad ixs amenni tamɣart nnes am yixef nnes, maca tamɣart ad tweqqar aryaz.