1 X uyenni necc, Bulus, aqa ayi d ameḥbus n Yasuɛ Lmasiḥ, i kenniw inni iǧan zi řegnus, [a] 2 mařa zeɛma aqa tesřam x tsexxart n arḍa n AREBBI i d ayi immewcen jar awem, [b] 3 belli ittwassargeb ayi-dd ssirr, am izzareɣ uriɣ awem-dd s drus. [c] 4 Xmi ɣa tɣarem man aya, tzemmarem ad tfehmem řefhamet inu n ssirr n Lmasiḥ, 5 wenni war ittwassargeb ca di tarwa n bnadem di řejyuř nneɣni, am mammec ittwaɛarra xas řexxu s Arruḥ i rrusul imqeddasen nnes u i inabiyyen nnes, [d] 6 aḥeqqa inni zi řegnus ad iřin d iwriten akidsen d iɣezdisen akidsen n Arrimet nnes uřa d icricen n lwaɛd nni dayes immewcen s L’Injil, [e] 7 i zi dewřeɣ d amsexxar ɛlaḥsab tawhibt n arḍa n AREBBI i d ayi immewcen ɛlaḥsab jjehd nnes i dayi ixeddmen. [f] 8 Aqa immewc ayi arḍa-ya, i necc d amuqřiř qaɛ jar marra imqeddasen, ḥima ad barrḥeɣ s Řexbar Aṣebḥan, iwa agřa n Lmasiḥ i war nzemmar ad nefhem, [g] 9 u ḥima ad ssuffɣeɣ ɣar tfawt i marra, min ixs ad yini uwekkeř n ssirr i tuɣa inuffaren di zzmanat n zic di AREBBI, Wenni i dd-ixeřqen kuřci, [h] 10 ḥima tiɣit n AREBBI ak-d waṭṭas n iɣezdisen nnes ad tiři tᵉttwassnen s tmesmunt ɣar řeḥkamat d ṣṣulaṭat deg ijenwan, [i] 11 tiɣit i tuɣa issewjed Netta zi zzman uca ikemmeř i-tt di Siditneɣ Yasuɛ Lmasiḥ, 12 wenni dayes aqa ɣarneɣ taryast d wadaf ak-d ttiqet s l’iman zzayes. [j] 13 S uyenni ttzawageɣ kenniw, maḥend war ttiḥřem ca s řemḥayem inu di ṭṭweɛ nwem. Aqa man aya i uɛuǧi i kenniw. [k]

14 Ad adareɣ s ifadden inu zzat i Babas n Siditneɣ Yasuɛ Lmasiḥ, 15 i Wenni umi semman kuř ijj n tbabat i iǧan deg ijenwan d temmurt, 16 ḥima ad awem iwc ɛlaḥsab agřa n uɛuǧi nnes u ḥima ad tᵉttwassjehdem s jjehd s Arruḥ nnes di bnadem nwem n daxeř. [l] 17 ḥima Lmasiḥ ad izdeɣ deg wuřawen nwem s l’iman, s tayri, x minni teccatem iẓewran u dsas nwem ad yiři imten, [m] 18 ḥima ad tzemmarem ad tfehmem ak-d marra imqeddasen min teɛna tiru d tuzzeggart d řuɛřa d řaǧaɣ, 19 u ad tessnem ɛawed řemɣaret n tussna n tayri n Lmasiḥ, uca ad tiřim tɛemmarem s marra aɛemmar n AREBBI.

20 Maca i Netta umi ɣares tizemmar ifeyyḍen ḥima ad igg di ṭṭweɛ nneɣ sennej i min nettᵉttar niɣ nettxarreṣ, ɛlaḥsab jjehd nnes i ixeddmen dayneɣ, [n] 21 i Netta ikkar as-dd uɛuǧi di tmesmunt nnes, di Yasuɛ Lmasiḥ, di marra řejyuř i řebda qaɛ. Amin. [o]