1 ኑ ኤፈሶነ ጭሙንꬃፓ ሻግንትደፓ ሱባ ማርካበራ ቆሰ ቅትዳ። ዎንትስት ዎደ ሮዳ የሊ እዝፓ ጳጥራ ቅትዳ። 2 ፈንቀ ፊንግዘ ማርካበ ደንግ ኤ ግዳ ገሊ ቅቶደስ ደንድዳ። 3 ኑ ቆጵሮሳ ብእደ ዎደ፥ ቆጵሮሳ ዎርክታ ባጋ አሺ ሶርያ የꬍዳ። ማርካብዘ ፋ ጫንቶ እዘ ኬꬆደስ ኮይደ ግሾ ጢሮሳ ቅትዳ። 4 እዘ አማንዘ አሱንꬃና ደንግ ኡንታራ ላፑን ቃማ በትዳ። ጳዉሎሳ የሩሳላመ ቅታመ ጋር ኡን ኤስ አያናራ ኦህዳ። 5 ኑኒ ኡን ካለ ጋምእዘ ዎድታ Ꮉልእን ኬዚ ቅትዳ። ኡን ኡባ ፋ ማቹንꬃራን ፋ ናኡንꬃራ ዎላ ካታማፓ ጋጻ ኬሲ ኑና ሞይዝዳ። ኑ አባ ካለ ቡንቁንቲ ጾዝ ዎስዳ። 6 ይንፓ ሱባ፥ ዎል ሳሮꬅን ኑ ማርካብተ ገልዳ፤ ኡን ፋ ካራ ማቅዳ።

7 ኑ አባ ኦግቶ Ꮉሲ፥ ጢሮሳፓ ጰጠለማይሳ የልዳ። እዘ አማንዘ አሱንꬃና ሳርꬂ፥ ኡን ካለ ፈቲ ቃማ ፌዥዳ። 8 ዎንትስት ዎደ ኬዚ፥ ቂሳርያ ቅትዳ። ሳባኬ ፍልጶሳ ካራ የሊ ኤ ካለ በትዳ። ኤ የሩሳላመ ቲኖ ዶርንትደ ላፑንꬃፋ ፈታ። [a] 9 ፍልጶሳስ ናበ ማቅደ ኦይዲ ዉዱር ናኡንꬅ የነ።

10 ኑኒ ኡንደና ቃማ እዘ በቴዝን አጋቦሳ ጋዘ ናበ ይሁዳፓ ቂሳርያ ይእዳ። [b] 11 ኑጎ ይእ ጳዉሎሳ ሳቀ ኤኪ ናብዘ ፋ ኩሽቶን ፋ ቶህቶ አጪ፥ «ጌሽ አያና Ꮉይ ሳቂዘ አዳያ፥ የሩሳላመ አይሁዱንꬅ Ꮉንጋራ አጪ፥ አይሁደ ማቆሰ አሱንꬅስ አꬂ እንጎዳ ጋነ» ያጋይዳ።

12 ኑኒ ይኖ ስእደ ዎደ ኑንን የዘ አሱንꬅ ጳዉሎሳ የሩሳላመ ቅታመ ጋር ዎስዳ። 13 የዝን ጳዉሎሳ ማህ፥ «ይን Ꮉንጋራ ዬክተራ አኮስ ታ ዎዝንቶ ታንዘ? ታኒ፥ ላꬄ የሱሳ ሱንꬅት ግሾ አጭንተ ጻላላ ማቅካይዝን የሩሳላመ Ꮉይቆደስን ጊግንትዳ» ያጋይዳ።

14 ኑ ዞሪዳኖ ኤ ኤካንጽ እጽን፥ «ላꬄ ቆፍታ Ꮉኖ» ጋእ ስእ ጋይዳ።

15 እዘ ኤራꬅ ዎደ ጋምእዳንፓ ሱባ ጊግንቲ የሩሳላመ ቅቶደስ ከዝዳ። 16 ቂሳርያ የዘ አማንዘ አሱንꬃፓ ኤራꬁንꬅ ኑራ Ꮉንግዳ። ኡን ኑኒ ሸምፖደ በሲ ምናሶነ ጋዘ ቆጵሮሳ አꬄ ካራ ካልꬅዳ። ምናሶነ ቲኖ አማንደ አሱንꬃፓ ፈታ።

17 ኑኒ የሩሳላመ የልደ ዎደ አማንዘ አሱንꬅ ኑና ኡፋይት ሞክዳ። 18 ዎንትስት ዎደ ጳዉሎሳን ኑኒ ያይቆባራ የልንቶደስ ቅትዳ። ዎሳ ኬꬃ ጭሙንꬅ ኡቡንꬅ እዘ የነ። 19 ጳዉሎሳ ኡንታና ሳርꬅዳንፓ ሱባ አይሁደ ማቆሰ አሱንꬅ ግዳ ፋ ባጋራ ጾዚ ኦችዳኖ ኡባ ኡንትስ ኦህዳ።

20 ኡን ይኖ ስእደ ዎደ ጾዝ ጋላቲ ጳዉሎሳጎ Ꮉንጋራ ያጋይዳ፦ «ኑ እሻዮ፥ አይሁዱንꬅ ግዳ ዋንꬅ ሙኩሉንꬅ ጾዝ አማነዛኮ ነ በእነ፤ ኡን ኡቡንꬅን ህገ ምንꬂ ናጋነ። 21 ኔኒ አይሁደ ማቆሱንꬃና ሳአ የዘ አይሁደ ኡባ ፋ ናኡንꬅ ጋራዝንታመ ጋር፥ አይሁዱንꬅ ዎጋ ካላመ ጋራን ሙሴ ህገ እጾደ ጋር ኔኒ ታማርስዛኖ የሩሳላመ የዘ አይሁዱንꬅ ስእዳ። 22 ዬዝን አኮ ሎኦ? ነ ይእዳኖ ቱሮ ስኦዳ።

23 «ይኒ ግሾ፥ ኑኒ ኔስ ኦህዛኖ ስኦ፤ ገፋ የዘ ኦይዲ አሱንꬅ ኑ ካለ የነ። [c] 24 ኡንታና ኤኪ ኡንታራ ጌዦ፤ ማህ ኡን ፋ ኦምቶ ሜድንቶደ ጋር ኡንትስ ሚሸ እንጎ። ኡን ዛጋ ነባዝ ስእዳና ቱሮ ማቅካይዛኖን ኔኒ ነ ኦምተን ህገ ናግዘ አስ ማቅዳኖ ኡቡንꬅ ኤራነ።

25 «የዝን አማንዘ አይሁደ ማቆሰ አሱንꬃና ማቅዛኮ፥ ኡን ኤቃስ ዣርሽንትደባዝ ማአመ ጋር፥ ሱꬅ ኡዣመ ጋር፥ ባዉታ ማአመ ጋራን ኦላላመ ጋር፥ ኑኒ ኦህቶ አጪ፥ ፍርድ ኡንትስ ኪታ ጻፍዳ» ጋይዳ። [d]

26 ይንፓ ሱባ፥ ጳዉሎሳ ዎንትስት ዎደ አሱንꬃና ኤኪ፥ ኡንታራ ጌዥዳ። ኤ ፋ ጌዠ ዎድታ አይደ ፎልንቶደ የዛኮ ኤርሶደስን ፋ ዣርሽቶ አይደ ዣርሾደ የዛኮ ኤርሶደስ ጾዘ ኬꬃ ገልዳ።

27 ላፑን ቃማ ፎልንቶደስ ኡኮደራ፥ እስያፓ ይእደ አይሁዱንꬅ ጾዘ ኬꬃ ጳዉሎሳ ብእ፥ አስ ኡባ ደንꬅꬂ ጳዉሎሳ አይክዳ። 28 «እስራኤለ አሱንꬆ፥ ኑና ማዶተ፤ Ꮉይ አꬄ፥ ኑ ዎርዥቶ፥ ኑ ህግቶን Ꮉና ጾዘ ኬꬅቶ እጾደ ጋር አስ ኡቡንꬃና ኡባ በሳ ታማርሳነ። ይናን ማቃንጽ እጽን አይሁደ ማቆሱንꬃና ጾዘ ኬꬃ ገልꬂ፥ Ꮉና ጌሽ በስቶ ቱንዝዳ» ያጋእ ኡክዳ። 29 ኡን ይኖ ጋይዳና ዛጋ ኤፈሶነ ጥሮፍሞሳ ጳዉሎሳራ ካታማ ብእደ ግሾ Ꮉተ ጳዉሎሳ ጾዘ ኬꬃ ኤዛ ኤኪ ገልደባዝ ኡንትስ አዝዳ። [e]

30 ካታምታ ኡባ ቡቅንትዳ፤ አሱንꬅ ኡባ ሺቂ ጳዉሎሳ አይኪ ጾዘ ኬꬃፓ ባለ ጎችዳ። ጾዘ ኬꬃ ፉርꬅታ ኤልሲ ጎርድንትዳ። 31 አሱንꬅ ጳዉሎሳ ዎꬎደስ ይአደራ፥ «የሩሳላመ ካታማ ኩሙꬅ ቡቅንትዳ» ጋዘ ዎርታ ሮመ ሻላቃጎ የልዳ። 32 ሻላቅዘ ዎታዳሩንꬃናን ማቶ Ꮉላቁንꬃና ኤኪ ዎጽተራ ይእዳ። አሱንꬅ ሻላቅዛን ዎታዳሩንꬃና ብእደ ዎደ ጳዉሎሳ ጉድዛኖ አሽዳ።

33 የ ዎደ ሻላቅዘ ሺቂ፥ ጳዉሎሳ አይኪ፥ ላምእ ሳንꬃላታራ አጭንቶደ ጋር ኪትዳ። የይዝ፥ ኤ ኦና የዛኮን አኮ ኦቼዛኮ አሱንꬃና ኦጭዳ። 34 አሱንꬃፓ ባግታ ፈትባዝ ጋእ ኡክዘ ዎደ Ꮉንኩንꬅ መለባዝ ጋእ ኡካነ። ኡክታ ጋንግደ ግሾ ሻላቅዘ ቱርቶ ሻጎደስ ዳንዳእንታንጽን፥ ዎታዳሩንꬅ ጳዉሎሳ ፋ የዘ በሳ ካንጎደ ጋር ኪትዳ። 35 ጳዉሎሳ የꬊ ከዝዘ ዳራጅቶ የልዘ ዎደ አሱንꬅ ኡርቂዛን ግሾ ዎታዳሩንꬅ ኤዛ ቶክዳ። 36 ጋማ አሱንꬅ፥ «ኤ Ꮉይቆ!» ጋእ ኡክተራ ካላነ።

37 ዎታዳሩንꬅ ጳዉሎሳ ፋ የዘ በስቶ ገልꬆደስ ይአደራ፥ ጳዉሎሳ ሻላቅዘጎ፥ «ታኒ ኔስ ፈትባዝ ኦህኮ ስኦዳተ?» ጋይዳ።

ኤ ጳዉሎሳጎ፥ «ነ ግርኬ ዶና ኤራነ? 38 ኔኒ Ꮉንፓ ቲኖ ቡቁꬅ መꬊ ሸምፖ ዎꬍደ ኦይዲ ሙኩል አሱንꬃና ኤኪ አኮ ባይዘ ጋናስ ገልደ ግብጸ አꬃ ባነ?» ጋይዳ።

39 የዝን ጳዉሎሳ፥ «ታኒ፥ ክልቅያ የዘ ኤርንትደ ተርሴሰ ካታማ አስ ማቅደ አይሁደ አስ። ታና አሱንꬅስ ኦህዞያ?» ጋይዳ።

40 ሻላቅዘ ኤጎ፥ «ኦሆ» ጋእን ጳዉሎሳ ዳራጃላ ኤቂ፥ አሱንꬅ ስእ ጋዉደ ጋር ፋ ኩሽትራ ማሊዳ። አሱንꬅ ስእ ጋእን እብራይስጠ ዶናራ Ꮉንጋራ ጋይዳ፦

<- ሐዋሩንꬅ ኦቻ 20ሐዋሩንꬅ ኦቻ 22 ->