1 ጳዉሎሳ ዳርበን ልስጥራን ቅትዳ። እዘ ጢሞትዮሳ ጋዘ አማንዘ አስ የነ። ኤ እንታ አማንዘ አይሁደ ማቾ፥ ኤ አዳይ ግርኬ አስ። 2 ልስጥራን እቆንዮነ የዘ አማንዙንꬅ ጢሞትዮሳ ባዝ ሎይꬂ ማርክꬍዳ። 3 ጳዉሎሳ ጢሞትዮሳ ፋራ ኤኮደስ ኮይ፥ ኤ አዳይ ግርኬ አስ ማቅዳኖ ይና በስተ የዘ አይሁደ ኡቡንꬅ ኤርዘ ግሾ ኤዛ ጋራዝዳ። 4 ኡን ካታማራ አꬍተር የሩሳላመ የዘ ሐዋሩንꬅን ጭሙንꬅን አጭደ ቆፍቶ አማንዙንꬅ ናጎደ ጋር ኡንትስ ኦህተራ አꬍዳ። 5 ይኒ ግሾ፥ ዎሳ ኬꬅታ አማኖራ ሚንግተ፥ ፋይዶራን ቃምተ ቃምተ ጋንግተር Ꮉንግዳ።

6 እስያ ግዳ ቃላ ኦሃመ ጋር ጌሽ አያና ኡንታና ካይደ ግሾ ጵርገራን ጋላትያ ሳአራ አꬍዳ። 7 ኡን ሚስያ ጋጻ የልደ ዎደ ብቲንያ ቅቶደስ ቆፕዳ የሻ። የዝን የሱሳ አያና ኡንታና ካይዳ። 8 ይኒ ግሾ፥ ኡን ሚስያ ካለራ አꬍተራ ጢሮአዳ ዎꬍዳ። 9 ጳዉሎሳ ቃማ ቆንጭꬃራ ፈቲ መቀዶንያ አስ ፋጎ፥ «መቀዶንያ ፊንግ ኑና ማዶያ» ጋእ ኤቂ ዎሶደራ ብእዳ። 10 ቆንጭꬅ ኤ ብእዳንፓ ማቂ ኑ መቀዶንያ ቅቶደስ ኮይዳ። ይናን፥ ዎንገለ እዘ የዘ አሱንꬅስ ኦሆደስ ጾዚ ኑና ጼግዳ አዝዳ።

11 ጢሮአዳፓ ደንዲ ማርካበ ግዳ ገሊ ሳሞትራቀ Ꮉንግደ፥ ዎንትስት ዎደ ናጱለ Ꮉንግዳ። 12 እዝፓ ደንዲ መቀዶንያ ሳአ የዘ ፍልጵስዩሳ ጋእንትዘ ዎራዳ ካታማ Ꮉንግዳ። ማህ ፍልጵስዩሳ ሮሙንꬅ አህዘ ካታማ። ኑ ይና ካታምተ ኤራꬅ ዎደ በትዳ።

13 ሳምባታ ዎደ ካታማፓ ጋጻ ቦርካ ዶና አይሁዱንꬅ ጾዘ ዎስዘ በሲ የዛኖ ቆፒ እዘ Ꮉንግዳ። ይና በስተ ሺቅደ ማቹንꬅስ ቃላ ኦህዳ።

14 ኑና ስእዘ አሱንꬃፓ ፈቲ ሊድያ ጋእንትዘ ትያጥሮነ ካታማፓ ይእደ፥ ጾዝ አማንዘ ዞቆ ማኦ ዛልእዘ፥ ማችታ የነ። ጳዉሎሳ ኦህዛኖ እዛ ስኦደ ጋር ላꬂ እ ዎዝንቶ ቡግዳ። 15 ሊድያ ፋ ካራ አሱንꬃራ ዎላ ጻማቅንትዳንፓ ማቂ ኑጎ፥ «ይን ታና ላꬃ ቱሮ አማንዳ ጋይኮ ታ ካራ ይእ ሸምፖተ» ጋእ ምንꬂ ዎስዳ።

16 ኑ ጾዝ ዎስዘ በስተ Ꮉንጎደራ ኢታ አያና ኢላ አፋ የዚ ማርꬍዘ ፈቲ ዉዱር አርታ ኑራ የልንትዳ። እዛ ማርꬊ ጋማ ብራ ፋ ላꬁንꬅስ ከእነ። 17 ጳዉሎሳን ኑናን ካሊ፥ «Ꮉንስ ኡባፓ ካታራ ጾዘ አሩንꬃና! ኡን ይን አቶደ ኦግቶ ኦህዙንꬃና» ጋእ ኡክዳ።

18 ኡባ ዎደ ይኒ ጋር ጋነ። የዝን ጳዉሎሳ ዥልꬊ ሱብ ማቂ፥ የ አያንዛ፥ «የሱስ ክርስቶሳ ሱንꬅተ ኢፓ ከዞ» ጋእ ኪትዳ። ኢራ ኢታ አያንዘ ኢፓ ከዝዳ።

19 የዝን እ ላꬁንꬅ ፋስ ብራ ደንግዘ ኦግታ ꬋብዳኖ ብእ፥ ጳዉሎሳን ስላሰን አይኪ፥ ፍርዳ ኬꬃ ዳይኑንꬅ ቲኖ ጎቺ ካንግዳ። 20 ዳይኑንꬅ ቲኖ ኡንታና ካንግ፥ «Ꮉንስ አይሁደ አስ ማቂ ኑ ካታማ አሱንꬃና ጋማ ዋይꬃነ። 21 ኑ ሮመ ጋደ አሱንꬅ ኤኮደስን ኦቾደስ ዎጋ ማቆሰ ባዝ ታማርሳነ» ጋይዳ።

22 አሱንꬅ ፈቲ ዛላ ማቂ፥ ጳዉሎሳላን ስላሰላን ደንድዳ። ዳይኑንꬅ ኡን ማእቶ ጋሪ ጉፈር ኡንታና ጉዳደ ፋና ኪትዳ። 23 ኡንታና ጋማ Ꮉꬍዳንፓ ሱባ አች ኬꬃ ገልꬅዳ። አች ኬꬅቶ ካፍዛይ ኡንታና ምንꬂ ካፎደ ጋር ኪትዳ። 24 አች ኬꬅቶ ካፍዘ ይና ኪቶ ኤኪ፥ ጳዉሎሳን ስላሰን አች ኬꬅትስ ቆልአ ገልꬅዳ። ኡን ቶህቶ ዱꬃራ አጭዳ።

25 የዝን ቃማ ብላሄ ማቅዘ ዎደ ጳዉሎሳራን ስላሰራን ዎስተራን ማዝሙረ የጽተራን ጾዝ ጋላታነ። አች ኬꬅተ የዘ መለ አሱንꬅን ኡን ጋዛኖ ስእነ። 26 ቆፕካይዝን አች ኬꬅት ሳእታ ኤንእንቶደ ዎንꬅስ ሳአ ኤንእዳ። ይና ሳተ ፉርꬅታ ኡባ ቡጉንቲ አትዳ፤ አጭንትደ አሱንꬅ ኡቡንꬅ ሳንꬃላታ ብልንቲ ዎꬍዳ። 27 አች ኬꬅቶ ካፍዘ ገንቶፓ ባርክደ ዎደ አች ኬꬅት ፉርꬅታ ኡባ ቡጉንትዳኖ ብእ አጭንትደ አሱንꬅ ኬሲ ኤኪ ቅትደ ጋር ኣዝን ፋና ዎꬎደስ ማሻ ኤክዳ። 28 የዝን ጳዉሎሳ ፋ ቃልቶ ꬎቅ ዪዚ «ኑ ኡባና Ꮉነ የዘ ግሾ ነ ነና ቆህፐ» ጋይዳ።

29 አች ኬꬅቶ ካፍዘ ጾምፐ ዎሲ ኤኪ ኤልሲ ግዳ ዎጽዳ። ጎቅተራ ጳዉሎሳ ቲኖን ስላሰ ቲኖ ዙግዳ። 30 ኡንታና ባለ ኬሲ፥ «ታ ላꬁንꬆ፥ ታ አቶደስ አኮ ኦቾደስ ቤዘ?» ጋይዳ።

31 ጳዉሎሳራን ስላሰራ ኤጎ፥ «ላꬅ የሱስ ክርስቶሳ አማኖ፤ ኔራን ነ ካራ አሱንꬃራን አቶዳ» ጋይዳ። 32 ኡን ኤስን ኤ ካራ የዘ ኡቡንꬅስ ላꬄ ቃላ ኦህዳ። 33 ቃማ ይና ሳተ አች ኬꬅቶ ካፍዘ ኡንታና ካንግ ኡን Ꮉርግዘ በስቶ ሜጭዳ። ኤልሲ ፋ ካራ አስ ኡቡንꬃራ ጻማቅንትዳ። 34 ጳዉሎሳን ስላሰን ፋ ካራ ካንግ ኡንትስ ካꬃ አꬅዳ። ኤ ፋ ካራ አስ ኡቡንꬃራ ጾዝ አማንደ ግሾ ኡፋይትዳ።

35 ሳእታ ዎንትን ዳይኑንꬅ፥ «የንꬅ አሱንꬃና ብሎ» ያጋእ ፖሊሱንꬃና ኤጎ ኪትዳ። 36 አች ኬꬅቶ ካፍዘ፥ «ይን ብልንቶደ ጋር ዳይኑንꬅ ኪትዳ። ይኬ፥ ኬዚ ሳሮ ቅቶተ» ያጋእ ይና ኪቶ ጳዉሎሳስ ኦህዳ።

37 የዝን ጳዉሎሳ የንꬅ ፖሊሱንꬃጎ፥ «ኑ ሮመ አስ [a] ማቃደራ ኡን ኑና ፍርዳ ባይꬅ አስ ቲኖ Ꮉꬊ፥ አች ኬꬃ ኦልዳ። Ꮉተ ኑና አችንት ኬዚ ቅቶ ጋነ? Ꮉኖስ፥ ኡን ፋ ኦምትስ ይእ ኑና ኬሶ» ጋይዳ።

38 ፖሊሱንꬅ ዳይኑንꬅስ ይኖ ኦህን፥ ጳዉሎሳራን ስላሰራን ሮመ ሳአ አስ ማቅዳኖ ስእደ ዎደ ዣሽትዳ። 39 ይኒ ግሾ፥ ዳይኑንꬅ ይእ ኡንታጎ፥ ኑ ይንታና ቆህዳ ያጋእ ማሮትꬅ ኦጭዳ። አች ኬꬅትፓ ባለ ኡንታና ኬሲ፥ ካታማፓ ኬዚ ቅቶደ ጋር ዎስዳ። 40 ጳዉሎሳራን ስላሰራን አች ኬꬅትፓ ኬዚ ሊድያ ካራ Ꮉንግዳ። እዘ አማንዙንꬃራ የልንት ኡንታና ምንꬅꬂ ኬዚ ቅትዳ።

<- ሐዋሩንꬅ ኦቻ 15ሐዋሩንꬅ ኦቻ 17 ->