1 “Dikabila da Walawi, awo iwalava nhosa, sikuwawe na hanhu hebu uhazi wowose mwiisi ya Izilaeli. Hewo waje ndiya ilavagwa kwa Mndewa Imulungu kamba nhosa. 2 Sikuwawe na uhazi hamoja na ndugu zao, Waizilaeli wayao, Mndewa Imulungu ayo uhazi wao kamba viyawalongele.

3 “Dino dokuwa fungu da iwalava nhosa kulawa mzinhosa zilavigwa, iwe nhosa ya ng'ombe hebu ng'hondolo, wamgwelele imulava nhosa umkono na zisaya na usapi. 4 Muwagwelele ndiya yenu ya ichanduso kusengigwa na divai na mavuta genu na mibahila ya ichanduso ya ng'hondolo zenu. 5 Mna gamakabila genu gose, Mndewa Imulungu, Imulungu wenu kawasagula iwanhu wa kabila da Lawi ili wamsang'hanile kamba walava nhosa siku zose.

6 “Kamba Mulawi yoyose kolonda mwenyego kodaha kusegela kudibuga jojose da iwanhu wa Izilaeli na kuchola hanhu hayasagule Mndewa Imulungu, 7 aho kodaha kusang'hana kwa twaga da Mndewa Imulungu, Imulungu wake kamba awo iwalawi wayage osang'hana kuulongozi wa Mndewa Imulungu. 8 Heyo yagweleligwa ndiya sawasawa na iwalava nhosa wayagwe, hamoja heyo kapata sente mbuli ya vinhu va iwahenga zake viuzigwe.

9 “Mwahengila mwiisi iyowagwaa Mndewa Imulungu, Imulungu wenu sikumukweleleze mila zigevuza za iwanhu wa isi azo. 10 Sikukuwe munhu yoyose hagati yenu yonda yamulave nhosa muumoto mwanage wa kimbigalo hebu wa kitwanzi, hebu munhu yoyose yolagula hebu yolola nyota za wanhu hebu yofambula mbuli zikwiza hebu muhawi, 11 hebu munhu yologa wanhu hebu munhu yowanga hebu munhu youza mbuli kwa mizimu. 12 Munhu yoyose yotenda mbuli kamba zizo komgevuza Mndewa Imulungu. Kwa mbuli kamba azo zigevuza, Mndewa Imulungu, Imulungu wenu kowawinga iwanhu wa isi azo zili kuulongozi wenu. 13 Molondigwa mutelele mgameso ga Mndewa Imulungu, Imulungu wenu.

14 “Wanhu wa isi azo zonda musole isi yao owategeleza iwanhu olola nyota za iwanhu na walaguzi, lakini Mndewa Imulungu, Imulungu wenu, kowagomesa mweye sikumutende vivo.

15 “Mndewa Imulungu, Imulungu wenu komwinulilani mtula ndagu kamba niye kulawa hagati yenu, Mwiizilaeli miyenu na mweye mumtegeleze heyo. 16 Mbuli ayo iyo yumumpulile Mndewa Imulungu, Imulungu wenu ako Holebu siku dija vimuiting'hane, mulonga, ‘Sikutuihulike kabili sauti ya Mndewa Imulungu, Imulungu wetu, na sikutuwone kabili moto uno mkulu, buleavo tofa!’ 17 Na heyo Mndewa Imulungu kanongela, ‘Walonga goya. 18 Nowenulila mtula ndagu kamba gweye, imoja wa ndugu zao. Niye nogela mbuli zangu mmulomo wake na heyo kowalongela gose gonda nimulagize. 19 Munhu yoyose yonda yaleme mbuli zonda yalonge mtula ndagu ayo kwa twaga jangu, niye mwenyego nomkoboza. 20 Lakini mtula ndagu yoyose yonda yalonge mbuli kwa twaga jangu, na kuno niye simulagize yalonge mbuli ayo hebu kolonga mbuli kwa twaga da imulungu iyagwe, mtula ndagu ayo kofa.’

21 “Lakini mweye modaha kugelegeza mmizoyo yenu, ‘Todahaze kuijuwa mbuli hailongigwe na Mndewa Imulungu?’ 22 Kamba mtula ndagu yahalonga mbuli kwa twaga da Mndewa Imulungu, na mbuli ayo hailawilile hebu siyo kweli, mbuli ayo hailongigwe na Mndewa Imulungu, avo mtula ndagu ayo kalonga kwa kuitapa, mweye sikumumdumbe.

<- Kumbukumbu 17Kumbukumbu 19 ->