Kumbukumbu 19

Mabuga ga kukimbilila

(Kupetigwa 35:9-34; Yoshua 20:1-9)

1 “Mndewa Imulungu, Imulungu wenu vonda yawakoboze iwanhu waja isi yao kowagwaa mweye, na mwahaisola na kukala mzing'anda zao, 2 mubagule mabuga madatu kulawa mwiisi ayo yonda yawagwee Mndewa Imulungu, Imulungu wenu muisole. 3 Mutende nzila za kubita na muigole miyanza midatu isi ayo yonda yawagwee Mndewa Imulungu, Imulungu wenu muisole ili munhu yoyose yomkoma munhu yakimbilile kuko.

4 “Munhu yahamkoma munhu iyagwe bila kulonda na hawagombile na munhu ayo, kodaha kukimbilila kudibuga dimoja mna gamabuga gago, na kouhonya ugima wake. 5 Tulonge, munhu kochola na miyage kumuhulo kukanha ngodi na kipindi viyokanha zingodi umuhini usomoka na dishoka dimkoma miyage, munhu ayo kodaha kukimbilila kudibuga dimoja mna gamabuga gago, na kouhonya ugima wake. 6 Lakini kamba hana buga dimoja diiyeka, munhu ayo yoliha mbuli ya kugevuzika kodaha kumkweleleza na komgoga na kumkoma munhu ayo yamkomile miyage bila kulonda, hamoja halondigwe kukomigwa, kwavija wakala hawagombile bule. 7 Avo niye nowalagiza mubagule mabuga madatu.

8 “Vivija kamba Mndewa Imulungu, Imulungu wenu, yahazongeza zimbaka za isi yenu kamba viyaiduwile kwa wahenga zenu, na kowagwaa isi yose iyalongile kowagwaa iwahenga zenu, 9 na kamba mwahagoga goya malagizo gose goniwalagiza lelo, na mwahamnogela Mndewa Imulungu, Imulungu wenu na kukweleleza nzila zake siku zose, avo mokwengeza mabuga gayagwe madatu mna igano madatu, 10 ili munhu habanange kinhu sikuyakomigwe mwiisi yenu iyowagwaa Mndewa Imulungu, Imulungu wenu iwe yenu, avo sikumoneke mubananga kwa kwita damu ya munhu.

11 “Lakini kamba munhu kagomba na miyage, na heyo kamkweleleza kamvamila na kumkoma, abaho kakimbilila kudibuga dimoja mna gamabuga gago, 12 avo iwavele wa buga dijo wawatume wanhu wakamsole munhu ayo na wamgale kwa imunhu yoliha ili yakomigwe. 13 Sikummonele bazi, lakini mosegesa gehile ga kumkoma munhu hatendile gehile mna iisi ya Izilaeli, ili mukale goya.

14 “Sikumusegese vilaguso va zimbaka na waenu, zikigwe umwaka na iwahenga mwiisi iyowagwaa Mndewa Imulungu, Imulungu wenu iwe yenu.

Kulava usindila

15 “Usindila wa munhu imoja haulondigwa kumtagusa munhu mbuli ya kitala chochose. Usindila wa wanhu wabili hebu wadatu awo udaha kumtenda munhu yatagusigwe. 16 Kamba kolawilila munhu yoyose komtagusa miyage kwa kulava kitala cha uvizi, 17 avo heyo na imunhu yotagusigwa wachole kuulongozi wa Mndewa Imulungu, na kuulongozi wa iwalava nhosa na iwasemi iwosang'hana kipindi acho. 18 Awo iwasemi wakilole goya kitala acho na kamba imunhu ayo yalavile uusindila kaviza na kamtagusa miyage kwa uvizi, 19 avo, momtendela kamba viyalondile kumtendela miyage. Kwa nzila ayo mogasegesa gehile hagati yenu. 20 Na wanhu wayagwe ohulika na kudumba, avo gehile kamba gago hagatendigwa kabili hagati yenu. 21 Sikumuwonele bazi iwanhu kamba awo. Ugima kwa ugima na siso kwa siso na zino kwa zino na mkono kwa mkono na mgulu kwa mgulu.

<- Kumbukumbu 18 Kumbukumbu 20 ->