1 “Sikummulavile Mndewa Imulungu, Imulungu wenu, nhosa ya ng'ombe hebu ng'hondolo yali na kilema, kwavija mbuli ayo yomgevuza Mndewa Imulungu, Imulungu wenu.

2 “Kamba mwahahulika kudibuga dimoja mna gamabuga goyowagwelela Mndewa Imulungu, Imulungu wenu kamba hana mbigalo hebu mtwanzi kotenda gehile mgameso ga Mndewa Imulungu, Imulungu wenu na kabena lagano jake, 3 na heyo kachola kuisang'hanila na kuitambikila imilungu iyagwe, kaditambikila zuwa hebu mbalamwezi hebu vinhu viyagwe vili kuulanga avo vinigomese sikumvitambikile, 4 na mweye mulongeligwa mbuli ayo na muihulika, avo muzahile kamba mbuli ayo ya ukweli. Kamba mbuli ayo ya ukweli na kamba kinhu acho kigevuza kitendigwa mwiisi ya Izilaeli, 5 avo mulaveni munhu ayo kunze ya dibuga na mumtowe mabwe mbaka yafe. 6 Yakomigwe kwa usindila wa wanhu wabili hebu wadatu. Munhu sikuyakomigwe kwa usindila wa munhu imoja. 7 Awo iwanhu olava usindila wasonge kumtowa munhu ayo kwa mabwe abaho wanhu wayagwe na hewo wamtowe kwa mabwe. Kwa nzila ayo mogasegesa gehile hagati yenu.

8 “Kamba vahalawila vitala vidala na mweye hamujuwa va kutenda, vitala avo vodaha kuwa, mbuli ya ukomaji na mbuli ya haki ya wanhu na mbuli ya kuilumiza. Vahalawila vitala avo, musegele aho na muchole hanhu hayasagule Mndewa Imulungu, Imulungu wenu, 9 na kuko choleni kwa Walawi na imsemi yosang'hana kipindi acho, na mweye mulave avo ivitala na hewo otagusa. 10 Avo, mutende kamba vonda wawalongele kulawa hanhu aho hayasagule Mndewa Imulungu, muiteganye mutende gose kamba vonda wawalagize. 11 Musang'hane kamba viwowalongela na kamba viwowafunza. Sikumuleke mbuli yoyose iyowalagiza kutenda. 12 Munhu yoleka kumtegeleza imulava nhosa yomsang'hanila Mndewa Imulungu, Imulungu wenu, hebu msemi, munhu ayo yakomigwe. Kwa nzila ayo mogasegesa gehile hagati ya Izilaeli. 13 Wanhu wose ohulika na kudumba, na hawatenda kinhu bila kugelegeza.

14 “Mwahengila mwiisi yonda yawagwee Mndewa Imulungu, Imulungu wenu, mwahaisola na kukala mumo, na mweye molonga, ‘Tusagule mndewa yatutawale, kamba wanhu wa isi zose zituzunguluke,’ 15 modaha kumwika mndewa yawatawale, imunhu ayo yonda yamsagule Mndewa Imulungu, Imulungu wenu. Momwika imoja wa ndugu zenu yawe mndewa kumwenu. Sikumumtende munhu baki, yeli siyo ndugu yenu yawe mndewa wenu. 16 Hata avo sikuyawe na falasi wengi mbuli ya ng'hondo, na vivija sikuyawabweze iwanhu ako Misili ili yapate falasi wengi mbuli ya ng'hondo, kwavija Mndewa Imulungu kawazuma, ‘Sikumubwele kuko kabili.’ 17 Vivija sikuyasole watwanzi wengi, buleavo omtenda yamuleke Mndewa, na vivija sikuyawe na sente na zahabu nyingi. 18 Vonda yakalile ikigoda cha undewa, yandike kitabu kwa kwiga ikitabu cha malagizo gano, kili mmakono ga iwalava nhosa, awo Iwalawi. 19 Kitabu acho kokala nacho na yakisome siku zose za ugima wake ili yaifunze kumdumba Mndewa Imulungu, Imulungu wake, na yagagoge malagizo gano na mafundizo gano, 20 na sikuyaikweze mwenyego kubanza ndugu zake na sikuyageke kutali na heyo malagizo gano kwa mbuli yoyose, ili yasigale muutawala siku nyingi heyo na ulelo wake mwiisi ya Izilaeli.

<- Kumbukumbu 16Kumbukumbu 18 ->