3 Hessafe guye, taara haasaya kiitanchoy keyidi bis; iyara gahetanaw hara kiitanchoy yis. 4 Yida kiitanchoy, “Woxa bada, na7atetha addiyako, ‘Yerusalaamen daro asinne daro mehey daana gisho, katamaa yuushon gimbe dirsi koshshenna. 5 Taani iya yuushuwan tama dirsi gidana; taani iyaw boncho gidana’ yaagees Goday.
6 “Taani hintena biitta oyddu baggaa laallida gisho, yaape keyite; elle keyite; pudeha bagga biittafe baqatite” yaagees Goday.
7 “Neno, Xiyoone keya; Babiloone macca nayta giddon de7iyare, enta giddofe baqata” yaagees Goday.
8 Ubbaafe Wolqaama Goday iya bonchuwa qoncisana mela, ba asaa bonqida kawotethatako tana kiittidi, “Hintena bochiya uray iya ayfiya buluwa bochees. 9 Taani ta kushiya enta bolla denthana; enta aylleti enta zaaridi bonqana. He wode hinte Ubbaafe Wolqaama Goday tana kiittidaysa erana.”
10 “Taani yada hinte giddon daana gisho, Xiyoone asaw, zamarite; ufaytite!” yaagees Goday.
11 He wode daro kawotethati Godaara gahetidi iya ase gidana. I hinte giddon daana; Ubbaafe Wolqaama Goday tana hinteko kiittidaysa he wode hinte erana. 12 Geeshsha biittan Yihuda, bana gakida gisho oothidi laattana; Yerusalaame zaaridi doorana. 13 Goday ba de7iya geeshsha bessan dendida gisho, asho ma77ida ubbay iya sinthan si77i go!
<- Zakaryaasa Maxaafa 1Zakaryaasa Maxaafa 3 ->