Zakaryaasa Maxaafa
Gaatha Qofa
Zakaryaasa maxaafa koyro xiqisey, nabey Zakaryaasi, Baraka na7a, Ado na7a na7a gididaysa odees. Zakaryaasi Leewe koche; Isra7eele asay di7ope simmin, kahinenne nabe gididi Yerusalaamen Xoossas haggazida ase.
Zakaryaasi maxaafa xaafana mela gaaso gidida nam7u qofati de7oosona. Koyro qofay, di7ope simmidi Yihudan de7iya asay xoossa keethi keexo doomana melanne wursethi gakanaw minnidi eqana mela minthethanaasa. Nam7antho qofay, Kiristoosi simmidi yaanaw gam7in ufaysi qanxida asay, I yaa wode waanidi qoncanaw de7iyako enta akeekisanaasa.
Zakaryaasa maxaafay nam7u gita kifiletan shaaketees.
1. Shempo 1—8 gakanaw de7iya kifiley, K.Y.S. xeetanne laatamu laythafe bidi ichashu xeetanne tammanne ichashu laythi gakanaw de7iya laythata giddon, dumma dumma wodetan nabey Zakaryaasi odida tinbite qaala oykis. Ha nabey odida qaalati qoncetha maaran shiiqidosona. Hessika, Yerusalaamey ooraxanaba, xoossa keethi simmidi keexetanaba, Xoossa asay geeyanabanne yaana Kiristoosa laythaba odees.
2. Shempo 9—14 gakanaw de7iya kifiley ba huuphen nam7an shaaketees. Ha kifileti “Kiita woyko qaala” giya odan qoncidosona (9:1; 12:1). Koyro qaalay, yaana geetetida Kiristoosa baggara Isra7eeles atotetha ufaysi de7eysa odees. Ha nabey odida qaalati sinthafe yaana Kiristoosa wursetha pirdaba odees (9:1—11:17). Nam7antho qaalay, Isra7eele Godaako zaaridi simonne ooratha dere gigidi Godaa sinthan duussaba odees (12:1—14:21). He wode, Dawita soo asaas, “Nagarapenne tunatethafe geeshshiya pultoy dhuuqana” (13:1). Isra7eeley, “Xoossay, nu Godaa” yaagana (13:9). Kiristoosi kawo gididi Yerusalaame haarana (shem 14).
Wursethan, Haggey, di7ope simmida asay xoossa keethi keexana mela denthethiya wode, Zakaryaasi Xoossafe ekida qoncethaninne qaalan Yerusalaameynne xoossa keethay zaaridi ooraxanaysa odees.
Maxaafa Ayfe Qofata
Qoncethatanne qaalata (1:1—8:23)
Taako simmite ta hinteko simmana (1:1-6)
Hospun qamma qoncethatanne mallata (1:7—6:15)
Xooma, kiitetethinne anjetethi (7:1—8:23)
Kawoy simmana (9:1—14:21)
Koyro qaala: ayseysatanne enti aysiya asaa (9:1—11:17)
Nam7antho: asaanne enta ayseysata (12:1—14:21)

Goday Ba Asaa Xeegees

1 Daariyosi kawotida nam7antho laythan, hospuntho ageenan, Godaa qaalay Ido na7aa, Baraka na7aa, nabiya Zakariyasako yis.

2 “Goday hinte mayzata bolla daro hanqetis. 3 Shin ha77i asaas haysada yaagada oda: ‘Taako simmite; taani hinteko simmana’ yaagees Ubbaafe Wolqaama Goday. 4 Kase nabeti, hinte aawatako, ‘Hinte iita ogiyapenne iita oosuwape simmite’ yaagidi odin, si7onna ixidi, banta iita ogiyapenne oosuwape simmonna ixida, hinte mayzatada hanopite” yaagees Ubbaafe Wolqaama Goday. 5 Hinte mayzati ha77i awun de7oona? He nabeti merinaw paxa de7oona? 6 Gidoshin, nabeta, ta aylleta baggara taani odida kiitatinne higgeti ubbay hinte mayzata bolla gakibeennee? Yaatin, enti banta nagara paaxidi, “Ubbaafe Wolqaama Goday nu ogiyadanne nu oosuwada nuus immana gidaysada ba oosuwa oothis” yaagidosona.

Parata Qoncethi

7 Daariyosi kawotida nam7antho laythan, Shabaaxa geetetiya tammanne issintho ageenan, laatamanne oyddantho gallasan, Godaa qaalay Ido na7aa, Baraka na7aa, nabiya Zakariyasako yis. 8 Taani qamma qoncethan, zo7o para toggida issi asi be7as. I zangaaran de7iya barseneete geetetiya mithata garsan eqis; iyape guye baggara zo7o, daamanne bootha parati de7oosona. 9 Yaatin taani, “Ta godaw, haysati aybee?” yaagada oychas.

Taara haasaya kiitanchoy, “Haysati aybeko taani nena bessaana” yaagis.

10 Barseneete mitha garsan eqida uray, “Haysati sa7aa ubbaa yuuyidi wochana mela Goday kiittidaysata” yaagis.

11 Enti barseneete mithaa garsan eqida Godaa kiitanchuwako, “Nuuni sa7a ubbaa yuuyidi wochida; sa7i wopu gidi saro de7ees” yaagidosona.

12 Hessafe guye, Godaa kiitanchoy, “Abeeti Ubbaafe Wolqaama Godaw, neeni hanqetin ha77i laapun tammu laythi kumis; yaatin, neeni Yerusalaamenne Yihuda katamata maaronna awude gakanaw gam7anee?” yaagis. 13 Goday taara haasaya kiitanchawas lo77onne minthethiya qaalan zaaro immis.

14 Taara haasaya kiitanchoy taako, “Ha qaala awaaja! Ubbaafe Wolqaama Goday, ‘Taani Yerusalaamesinne Xiyoones daro mishetayis. 15 Nuuni saro de7oos gidi qopiya hara kawotethata bolla taani daro hanqetas. Taani ta asaa bolla guuthara hanqetas, shin enti aathidi ta deriya qohidosona.’ 16 Hessa gisho, taani Yerusalaameko maarotan simmana; ta keethay zaaridi yan keexetana; Yerusalaame katama bolla wadha wodoro yeggana” yaagees Ubbaafe Wolqaama Goday.

17 Gujada haysada yaagada awaaja: “Ta katamata duretethay kumidi palahana; taani Goday Xiyoone zaara minthethana; Yerusalaame zaara doorana” yaagees Ubbaafe Wolqaama Goday.

Oyddu Kaceta Qoncethi

18 Taani qoncethan oyddu kaceta be7as. 19 Taara haasaya kiitanchuwa, “Haysati aybee?” yaagada oychas.

I zaaridi, “Ha kaceti Yihuda, Isra7eelenne Yerusalaame laallida kawotethata” yaagis.

20 Hessafe guye, Goday tana birata qoxiya oyddu hiillanchota bessis. 21 Taani, “Haysati ay oothanaw yidona?” yaagada oychas.

I zaaridi, “Haysati oonika zaari denthona mela Yihuda biitta laallida kaceta kawushanawunne dhaysanaw yidosona. Enti Yihuda biitta laallanaw banta kaciya denthida hara kawotethata kaciya shocidi sa7an yegganaw yidosona” yaagis.

Zakaryaasa Maxaafa 2 ->