1 Hessafe guye, kahine halaqay Iyyasuy Godaa kiitanchuwa sinthan eqidaysanne xalahey Iyyasu mootanaw iyape ushacha baggara eqidaysa tana qoncethan bessis. 2 Goday, “Xalahiyaw, Goday nena seero; Yerusalaame doorida Goday nena seero! Ha addey tamape attida duncha mela gidennee?” yaagis.

3 Iyyasuy qitatida ma7o ma77idi kiitanchuwa sinthan eqis. 4 Kiitanchoy ba sinthan eqidaysata, “Iya bollafe ha qita ma7uwa qaarite” yaagis. Qassi Iyyasuko, “Heko, taani ne nagara neepe diggas; boncho ma7uwa nena mayzana.” 5 Taani, “Geeshsha xaatha qaciya iya huuphen xaaxite” yaagis. Enti kiittidaysada oothidosona; ma7o mayzidosona. Godaa kiitanchoy he wode iya miyen eqis.

6 Hessafe guye, Godaa kiitanchoy Iyyasuko, 7 Ubbaafe Wolqaama Goday haysada yaagees; “Neeni ta ogiyan hemetikonne ta kiita naagiko, neeni ta keethaa aysana; ta dabaaban aawatana. Qassi haysan eqidaysatara issife geliyanne keyiya maata new immana. 8 Kahine halaqa Iyyasu, haysa si7a! Sinthara yaana lo77obaas malaata gididaysatinne neera ootheysati haysa si7o! Taani, ‘Tashe’ geetetiya ta aylliya ehana. 9 Heko, taani Iyyasu sinthan shuchu wothana; he shucha bolla laapun ayfeti de7oosona. Taani he shuchaa woocada iya bolla xuufe xaafana; ha biitta nagara issi gallas diggana” yaagees Ubbaafe Wolqaama Goday.

10 “He gallas hinte ubbay hinte woynenne hinte balase garsan uttidi hinte shooruwa xeegana” yaagees Ubbaafe Wolqaama Goday.

<- Zakaryaasa Maxaafa 2Zakaryaasa Maxaafa 4 ->