1 Arxekisisi kawotida laatamantho laythan, Nisaane geetetiya ageenan, issi gallas kawa sinthan woyne ushsha shiishas. He gallasepe attishin, kase kawa sinthan azzana erike. 2 Hessa gisho, kawoy, “Nena sakiyabay baawa, shin haysa mela ayis azzanadii? Hessi ne wozanay issiban azzanidaysa bessees” yaagis.

Yaagin, taani daro yayyada, kawako, 3 “Kawoy merinaw kawoto! Ta mayzati moogetida katamay laaletidi dhayin, qassi he katamaa dirsa pengeti taman xuugetin ayis azzanikina?” yaagas.

4 Kawoy zaaridi, “Yaatin, ha77i ta new ay oothana mela koyay?” yaagis.

Taani salo Xoossaa woossa simmada, 5 kawako, “Kawaw, ta ne sinthan saba demmidaba gidikonne ta oyshay ufaysiyabaa gidiko, Yihuda biitta, ta mayzati moogetida katamaa bada zaara keexana mela tana yeddarki” yaagas.

6 He wode kawiya, Kawa Arxekisisa matan uttida de7ishin, kawoy zaaridi, “Ne ogey ay mela wode ekanee? Ne awude simmanee?” yaagidi tana oychis. Taani ta simmana wodiya iyaw odin, kawoy ufaytidi tana yeddis.

7 Qassi, “Kawa, nena ufaysiyabaa gidiko, ta Yihuda gakanaw he biittara kanthada aadhana mela Efraxiisa shaafape wuloha baggara de7iya biitta haareysatas dabdaabey xaafeto” yaagada kawa woossas. 8 Hessadaka, “Xoossa keetha pengiya giigisanaw, katamaa gimbe dirsaa diranawunne ta daana keethaa keexanaw taw mithi immana mela kawo wora naagiya Asaafas dabdaabey xaafeto” yaagada oychas. Xoossaa lo77o kushey taara de7iya gisho kawoy taani oychidaba ubba immis.

9 Kawoy taara guutha toora moconatanne para toggeyisata yeddis. Taani entara issife Efraxiisa shaafape wuloha bagga biitta gakada kawoy yeddida dabdaabiya he biitta haareysatas immas. 10 Shin Horoona katama asi gidida Sanbalaaxinne Amoone biitta halaqa gidida Xoobbey, “Isra7eele asaas lo77oba oothiya asi yis” geetetidaysa si7ida wode daro yilotidosona.

11 Taani Yerusalaame gakada heedzu gallas yan gam7as. 12 Yerusalaames taani oothana mela Xoossay ta wozanan wothida qofaa oodeska odabike. Hessafe guye, taara de7iya asaape guuthata ekada qamma dendada bas. He wode taani toggida mehiyape hara toga mehey nuus baawa. 13 Taani bilahe dendada Zangaara Pengiyara kanthada, Dawe Pulto geetetiya bessaara aadhada, Pito Penge[a] geetetiya bessaa gakanaw bas. Yaara aadhashe laaletida Yerusalaame gimbiyanne taman xuugetida gimbe pengeta be7as. 14 Hessafe simmada Pulto Pengiyakonne kawa teqe haathay de7iya bessaa bas. Gidoshin, ta toggida mehey aadhiya oge demmabike. 15 Hessa gisho, qamma Qediroona Zangaara giddora aadhada gimbiya be7as. Wursethan, guye simmada Zangaara Pengiyara katamaa gelas.

16 Yan de7iya halaqatape oonika taani awu bidaako, woyko ay oothidaako eribeenna. Ayis giiko, taani Ayhudetas, kahinetas, bonchetida asatas, halaqatasinne oosuwa oothanaw de7iya asaape oodeska ta qofaa odabike. 17 Hessefe guye, entako, “Nuuni ay mela meton de7iyako be7eeta; Yerusalaame katamay laaletis; gimbe pengeti taman xuugetidosona. Ha yiite, Yerusalaame gimbiya zaaridi gimboos; nuna gakida yeella ane diggoos” yaagas. 18 Qassi Xoossaa lo77o kushey taara de7eysanne kawoy taw odidaba ubbaa entaw odas.

Enti zaaridi, “Ane dendoos; zaaridi gimboos” yaagidi banta kushiya lo77o oosos minthidosona.

19 Shin Horoona katamaa asi gidida Sanbalaaxi, Amoone biitta asi gidida Xoobeynne Araba biitta asi gidida Geesamey hessa si7ida wode, nu bolla qelqisidi miicidosona. “Haysi hinte oothiyabay ayibee? Woyko kawa bolla makallanaw koyeetii?” yaagidi oychidosona.

20 Taani zaarada, “Salo Xoossay nuna polisana; nuuni iya aylleti dendidi oothana. Shin Yerusalaamen hintew gishoy woyko hintena gathiyabay woyko hintena qofisiyabay baawa” yaagas.

<- Nahime Maxaafa 1Nahime Maxaafa 3 ->