Nahime Maxaafa Gaatha Qofa Nahime maxaafa, heedzu bessan shaakidi be7anaw danda7etees. 1. Yihuda biitta aysana mela, Farse kawoy kiitida Nahimey, kaalethin, Yerusalaame dirsa gimbey ooraxidaysa odiya taarike. 2. Iziri, higge maxaafa nabbabidaysanne asay banta nagara paaxidysa odiya maxaafa. 3. Nahimey Yihuda biitta aysishe oothida hara oosota odees. Ha maxaafan daro qoncidi bentey Nahimey Xoossan ammanetidaysanne I woossida woosata. Iziranne Nahime maxaafan de7iya waanna qofati, 1. Yihuda maaddanaw Xoossay allaga kawota go7etis 2. Yihuda asay allaga biitta asan sugetidosona 3. Yihudi geeyidi Xoossako simmanaw bessees. Izira maxaafay xoossa keethaanne yarsho bessa bolla dummayidi odees; Nahime maxaafay Yerusalaame katama gimbe dirsa keexo bolla caddidi odees. Maxaafa Ayfe Qofata Yerusalaame katama gimbe dirsa oosetetha (1:1—7:73) Nahimey Yerusalaames woossida woosa (1:1—2:8) Nahimey ayso oosos Yerusalaame buussaa (2:9-20) Gimbe dirsa oosuwa (3:1—7:4) Nahimey di7ope simmida asaa mazgabis (7:5-53) Izira gaason asaa ayyaana de7oy laametis (8:1—10:39) Nahime gaason biitta bolla yida laamiya (11:1—12:47)
3 Enti zaaridi, “Babiloone di7etonna attida asaynne di7etidi simmida Ayhudeti gita metoninne kawushan de7oosona. Yerusalaame gimbe dirsay laaletis qassi gimbiya pengeti taman xuugetidosona” yaagidosona.
4 Ta haysa ubbaa si7ida wode uttada yeekas. Daro gallas azzanoninne xooman salo Xoossaa haysada yaagada woossas.
5 “Abeeti Godaw, salo Xoossaw, gitaw, bonchetidayso, nena doseysatasinne ne kiita naageysatas ne merina siiqo caaquwa naagasa. 6 Taani ne aylley, ne aylle gidida Isra7eele asaa gisho qammanne gallas woossiya woosa si7anaw ne haythay hayzo; ne ayfey tana xeello. Nu Isra7eele asay oothida nagaraa ubbaa new paaxayis; tuma taaninne ta mayzati nena naaqida. 7 Nuuni ne bolla daro iita nagara oothida; neeni ne aylliya Muse baggara nuus immida kiitaa, wogaanne higgiya naagibooko. 8 Ne aylliya Muses ne odida qaala hayyana qopa; neeni, ‘Hinte taw ammanetona ixiko, taani hintena Ayhude gidonna biittatan laallana. 9 Shin hinte taako simmidi, ta kiita naagiko, hinte hari attoshin sa7aa gaxaa gakanaw laaletikoka, ta sunthay xeegetana mela doorida bessaa zaarada ehana’ gidaysa qopa.
10 “Neeni ne gita wolqaaninne ne mino qesiyan woza ekida ne aylletanne ne asata. 11 Abeeti Godaw, taani ne aylley woossiya woosaanne nena bonchanaw dosiya, ne aylleta woosa ne haythay si7o. Ta ne aylley hachi oothanaw koyidabay taw ushacanaada, kawa sinthan taw saba imma” yaagas.