1 Hessafe guye, Goday Museko, “Gibxe kawako bada, ‘Goday, taw goyinnana mela ta asaa yedda. 2 Neeni enta yeddonna ixiko, ne biitta ubban shodhe gado yeddana. 3 Nayle Shaafan shodhey kumana. Enti yaape keyidi ne kawotetha, ne zin7iya kifiliya, ne hiixa, ne moorinnata keethaanne ne deriya keetha ubban gelana. Hessadaka ne cooceninne munuqa miishe ubban gelana. 4 Shodheti ne bolla, ne asaa bollanne ne shuumata ubbaa bolla gupana yaagees’ yaagada oda” yaagis.

5 Goday Museko, “Aaroni Gibxen de7iya haathata bolla, zara haathata bollanne teqe haatha ubbaa bolla ba xam7aa denthana mela oda” yaagis.

6 Aaroni Gibxe haathata bolla ba xam7aa denthida wode shodheti keyidi, Gibxe biitta ma7idosona. 7 Shin marotika banta bitan hessada oothidi Gibxe biittan shodhe kesidosona.

8 Kawoy Musenne Aarona xeegisidi, “Ha shodheta taapenne ta asaape diggana mela Godaa hinte woossiko ta hinte asaa Godaas yarsho yarshana mela yeddana” yaagis.

9 Musey kawako, “Shodheti neepe, ne moorinnatapenne ne asaape kichana mela ta woossanaw qaxaro imma. Hessafe guye, Shaafa shodheti neepenne ne keethaafe kichidi Nayle xalaalan de7ana” yaagis.

10 Kawoy zaaridi, “Wonto gido” yaagis.

Musey, “Nu Godaa Xoossaa meli hari oonika baynaysa neeni erana mela ne gidaysada oothana. 11 Shodheti neepe, ne keethaafenne, ne moorinatape kichidi Nayle Shaafa xalaalan attana” yaagis.

12 Museynne Aaroni kawa matape keyidi, kawa bolla Goday ehida shodheta diggana mela Musey Godaa woossis. 13 Goday Musey oychidaysada oothin son, kareninne geeshshan de7iya shodheti hayqidosona. 14 Gibxe asay hayqida shodheta shiishidi dooridosona; biitta ubbay xinqis. 15 Shin shodheti hayqidaysa kawoy be7ida wode iya wozanay zaari muumis. Goday gidaysa mela I Musenne Aarona si7onna ixis.

16 Hessafe guye, Goday Museko “Aaroni ba xam7a denthidi biitta baana shocana mela oda. Gibxe biitta ubban de7iya baanay boxe gidana” yaagis. 17 Enti kiitetidaysada oothidosona. Aaroni xam7ara biitta baana shocis. Gibxen de7iya baana ubbay boxe laametidi mehiyanne asaa ma7is. 18 Marotika banta bitan hessada oothanaw paacidosona, shin xoonetidosona. Boxey asaa bollanne mehiya bolla laaletis. 19 Maroti kawako, “Haysi Xoossaa ooso” yaagidosona. Shin kawa wozanay muumis. Goday gidaysa mela I entana si7onna ixis.

20 Goday Muse, “Guura dendada, kawoy Shaafa bishin iyara gahetada, ‘Goday, tana goyinnana mela ta asaa yedda. 21 Neeni ta asaa yeddona ixiko, taani, ne bolla, ne moorinnata bollanne, ne asaa bolla udunxe gado yeddana. Gibxeta keethaanne enti de7iya biitta ubban udunxey kumana. 22 Shin he gallas ta asay de7iya Geesame biittan udunxey doonada enta teqada ashshana. Taani Goday, He wode ha biittan taani Goday ootheysa neeni erana. 23 Taani, ta asaanne ne asaa shaakana; he gita malaatay wonto hanana’ yaagees gada oda” yaagis.

24 Hessafe guye, Goday gidaysada oothis. Kawa gadhonne iya moorinnata soo daro udunxe gado yeddis. Kumetha Gibxe biittay udunxe gadon qohetis.

25 He wode kawoy Musenne Aarona xeegisidi, “Bidi, ha biittan hinte Xoossaas yarsho yarshite” yaagis.

26 Shin Muse zaaridi, “Hessi hanonnaba. Nuuni Godaas, nu Xoossaas yarshiya yarshoy Gibxeta matan ixetiya gisho, hessa oothoko. Nu yarshishin enti be7iko nuna shuchan caddana. 27 Nuna kiitidaysa mela, nuuni Godaas, nu Xoossaas yarsho yarshanaw heedzu gallas oge mela biitta baanaw bessees” yaagis.

28 Kawoy zaaridi, “Godaas, hinte Xoossaas mela biitta bidi yarshana mela taani hintena yeddana. Shin hinte haakidi boopite; taw woossite” yaagis.

29 Musey zaaridi, “Taani ne matape keyida mela Godaa woossana. Ha udunxey wonto kawuwape, iya moorinnatapenne iya asaape kichana. Shin kawoy asay Godaas goyinnanaysa diggidi zaari nuna cimmofo” yaagis.

30 Hessafe guye, Musey kawa matape keyidi, Godaa woossis. 31 Goday Musey oychidaysada oothis. Udunxey kawuwape, iya moorinnatapenne iya asaape issoyka attonna kichis. 32 Shin ha77ika kawa wozanay muumin asaa yeddonna ixis.

<- Kessa Maxaafa 7Kessa Maxaafa 9 ->