1 Goday Museko, “Gibxe kawako bada, Goday, Ibraaweta Xoossay neeko, ‘Enti taw goyinnana mela ta asaa yedda. 2 Neeni enta yeddonna ixiko, 3 taani ne parata bolla, ne hareta bolla, ne gimaleta bolla, ne mehiya bolla, ne dorsata bollanne ne deeshata bolla iita gado yeggana. 4 Shin taani Goday Isra7eele asaa mehiya giddoninne Gibxe asaa mehiya giddon dummatethi medhana. Isra7eele asaa mehiyape issoyka hayqenna. 5 Wonto taani hessa oothana gidi Goday wode qanxis’ yaaga” yaagis.

6 Wontetha gallas Goday gidaysada oothis. Gibxe asaa mehe ubbay hayqis, shin Isra7eele asaa mehiyape issoyka hayqibeenna. 7 Kawoy hanidabaanne Isra7eeleta mehiyape hari attoshin issoyka hayqonaysa ase kiittidi, oychidi eris. Shin ha77ika iya wozanay muumida gisho asaa yeddonna ixis.

8 Hessafe guye, Goday Musenne Aarona, “Coocepe bido kuuci ekidi, kawoy be7ishin bolla dharcite. 9 Hessi Gibxe biitta ubbaa bolla baana gididi laaletana. Gibxe biittan de7iya asaa bollanne mehey bolla kixa gado ehana” yaagis. 10 Enti coocepe guutha bido ekidi kawa sinthan eqidosona. Musey hessa bolla laallin, asaa bollanne mehiya bolla kixa gadoy wodhi aggis. 11 Gibxe asaa bolla wodhida kixay marota bollaka wodhida gisho Muse sinthan eqanaw danda7ibookona. 12 Shin Goday Muses gidaysa mela, kawoy ba wozana muumisida gisho, Musenne Aarona si7onna ixis.

13 Hessafe guye, Goday Museko, “Kawako guura denda bada, ‘Goday, Ibraaweta Xoossay, taw goyinnana mela ta asaa yedda. 14 Ha77i ne ixas giiko, ne moorinnatanne ne asaa xalaala gidonashin ne bollaka iita gado ehana. He wode alame ubban Godi ta xalaala gideysa neeni erana. 15 Taani ta kushiya denthada nenanne ne asaa gadon shocidaba gidiyako ha77i gakanaw hinte biitta bolla de7eketashin. 16 Shin ta sunthay biitta ubban eretana mela taani ta wolqaa bessanaw nena de7on wothas. 17 Neeni ha77ika otortada ta asaa yeddonna ixadasa. 18 Taani wonto hannoode Gibxe biittay medhotosape hachi gakanaw buki eronna wolqaama shachi bukisana. 19 Ha77i neeni ne mehiyanne karen de7iyaba ubbaa elle soo gelsana mela kiitta. Soo gelonna asaa bollanne mehiya ubbaa bolla shachi bukidi, enta wodhana yaagees’ yaaga” yaagis. 20 Kawa moorinatape issoti issoti Goday gidaysa si7idi yayyida gisho, banta aylletanne banta meheta soo gelsidosona. 21 Shin harati Goday gidaysa si7onna ixidi banta aylletanne banta mehiya karen aggaagidosona.

22 Hessafe guye, Goday Museko, “Gibxe biitta ubbaa bolla, asa bolla, mehiya bollanne gaden de7iya katha bolla shachi bukana mela ne kushiya salo dentha” yaagis. 23 Musey ba xam7aa salo denthida wode, Goday wolqaama deshonne wol7anthi yeddis. Hessada oothidi Goday Gibxen shachi bukisis. 24 Goday gedera haara wolqaama wol7anthi yeddis. Hessa melabay Gibxe biittan asi doosape hani erenna. 25 He shachay Gibxen de7iya asaanne mehiya shocis. Gaden de7iyaba, mithinne maata ubbaa dhaysis. 26 Isra7eeleti de7iya Geesame biitta xalaalan shachi bukibeenna.

27 Kawoy Musenne Aarona xeegisidi, “Taani ha77i nagara oothas. Goday tumancho; taaninne ta asay bala. 28 Deshoynne shachay nu bolla daridi un7ethida gisho nuus Godaa woossite. Taani hintena yeddana; hizape hinte haysan gam7eketa” yaagis.

29 Musey iyako, “Taani ha katamaape keyida wode ta kushiya denthada Godaa woossana. Deshoynne shachay eqiya wode sa7ay Godaaba gideysa neeni hessan erana. 30 Shin nenne ne moorinnati ha77ika Godaa Xoossa yayyonnaysa taani erayis” yaagis.

31 Talbay ciishshe, bangay qorxa gidiya gisho ubbay shachan dhayis. 32 Shin gisteynne murqay gakiboonna gisho shachan dhaybeenna.

33 Musey kawa matape keyidi, katamaape gaxaa bidi ba kushiya denthidi Godaa woossis. Yaatin deshoy, shachaynne iray ellesidi eqi aggis. 34 Shin kawoy he ubbay eqidaysa be7ida wode zaaridi nagara oothis. Iyaranne iya moorinnatara banta wozana gujidi minthidosona. 35 Goday Muse baggara odidaysa mela kawa wozanay muumin, Isra7eeleta yeddonna ixis.

<- Kessa Maxaafa 8Kessa Maxaafa 10 ->