Kessa Maxaafa 7

1 Goday Museko, “Heko taani nena Gibxe kawas Xoossa mela oothas. Ne ishaa Aaroni ne nabe gididi iyaw odana. 2 Taani nena kiitida kiita ubbaa Aaronas oda. I, Isra7eeleta ba biittafe kessi yeddana mela kawas odana. 3 Shin taani kawa wozanaa muumisana. Taani Gibxe biittan malaatatanne malaalsiyabata oothikoka, 4 I hinte odiyaba si7enna. He wode taani Gibxeta pirdana; ta deriya Isra7eele Gibxefe kessana. 5 Hessi haniya wode taani godaa gididaysa Gibxeti erana” yaagis.

6 Museynne Aaroni Goday kiitidaysada oothidosona. 7 Enti kawas odiya wode, Muses hospun tammu laythi; Aaronas qassi hospun tammanne heedzu laythi.

Aarona Xam7a

8 Goday Musenne Aarona, 9 “Kawoy hintena, malaata oothidi tana bessite giiko, Aaroni ba xam7a ekidi kawa sinthan yeggana mela iyaw oda; he xam7ay shooshi gidana” yaagis. 10 Museynne Aaroni kawako bidi Goday enta kiitidaysada oothidosona. Aaroni ba xam7aa kawa sinthaninne iya moorinnata sinthan yeggin xam7ay shooshu gidis. 11 Hessafe guye, kawoy marotanne bitanchota xeegisis. Entika banta bitan hessada oothidosona. 12 Enti ubbay banta xam7aa sa7an yeggida wode xam7ati shooshi gididosona. Shin Aarona xam7ay enta xam7ata mittis 13 Gidoshin Goday gidaysa mela kawa wozanay muumis. I enti geysa si7onna ixis.

Haathi Suuthu Laametetha

14 Goday Muse, “Kawa wozanay muumis; I asaa yeddonna ixis. 15 Wonto wonta guura shooshi laametida xam7aa ekada, Nayle Shaafa matan eqada, kawuwara gahetanaw naaga. 16 Iyako, ‘Goday, Ibraaweta Xoossay ta asay mela biittan taw goyinnana mela yedda’ yaagidi tana neeko kiittis. Shin neeni hanno gakanaw ixadasa. 17 Goday, I, Godaa gideysa I oothiyaban neeni erana. Taani Nayle Shaafa haatha ta kushen de7iya xam7an shociko haathay suuthi laametana. 18 Nayle Shaafan de7iya moloy hayqana; shaafayka xinqana. Gibxeti he shaafa haatha uyanaw danda7okona” yaagada oda.

19 Goday Museko, “Aaroni Gibxen de7iya haathata bolla, shaafata bolla, zara haathata bolla, teqe haatha bollanne duuqetida haathi ubbaa bolla ba xam7aa denthana mela oda. He wode haatha ubbay suuthi laametana. Hari attoshin Gibxe biittan mithafenne shuchafe oosetida haathe tikiya miishetan de7iya haathay ubbay suuthi laametana yaaga” yaagis.

20 Museynne Aaroni Goday kiitidaysada oothidosona. Kawa sinthaninne iya moorinnata sinthan ba xam7aa denthidi, Nayle Shaafa haatha shocis. Haatha ubbay suuthi laametis. 21 He Shaafa haathan de7iya moloti hayqidosona. Shaafa haathay iita xinqida gisho, Gibxe asay uyanaw danda7ibookona. Gibxe biitta ubban suuthi kumis. 22 Shin Gibxe bitanchoti banta bitan hessada oothidosona. Goday gidaysada kawa wozanay muumin, Museynne Aaroni odidaysa si7onna ixis. 23 Kawoy he hanidaba aybinka taybonna yeggi aggidi ba gadho simmidi bis. 24 Gibxe asay Nayle Shaafa haatha uyanaw danda7iboona gisho, uyiya haathi demmanaw Shaafa gaxan olla bookidosona.

25 Goday haatha shoci simmin laapun gallas gidis.

<- Kessa Maxaafa 6 Kessa Maxaafa 8 ->