2 Qorontoosa Kiita 9

Ammaniya Asaas Shiiqida Miishe

1 Ammaniya asaas kessiya miishiyaba ta hintew xaafanaw koshshenna. 2 Hinte maaddanaw keehi amotteysa ta erayis. Hinte Akaya asay, zillaythafe doomidi maaddanaw giigetidaysa taani Maqedoone asaas doona kunthada odas. Hinte gita amoyka entafe darota denthethis. 3 Ha oosuwan hintenan nu ceeqetiya ceeqoy hada gidonna mela koyro hintebaa ta odidaysada hinte giigetidi naagana mela ha ishata hinteko kiittas. 4 Maqedoone asay taara bidi, hinte giigetonna de7ishin, demmiko, nu hintenan yeellatana; qassi hinte nuupe aadho yeellatana. 5 Hessa gisho, ha ishati taape sinthatidi hinteko bidi, hinte immana gida imuwa kasetidi giigisana mela ta entana kiittas. Taani gakiya wode he imoy giigidi uttees. He wode he keehatetha imoy wolqan gidonashin, dosan gideysa erisees.

6 Haysa akeekite; guuthu zeriday guuthu cakana; daro zeriday daro cakana. 7 Xoossay ufaysan immiya uraa dosiya gisho, wolqan woyko dosi bayna gidonashin, issi issi asi ba wozanan qopidaysada dosan immanaw bessees. 8 Ubba wode ubbaban koshshiyaba ubbaa demmidi lo77o ooso ubbaa oothanaw danda7ana mela Xoossay hintew ba anjuwa darsana. 9 Geeshsha Maxaafan,

“I ba shaluwa manqotas laallis;

iya xillotethay merinaw de7ana”

yaagees.[a]

10 Zereysas zerethi, maanaw kathi immiya Goday, hinte zeriya zerethi darsidi immana. Hinte xillotetha ayfiyaka darsana.[b]

11 Daro asay hinte immiya imuwa nuupe ekidi, Xoossaa galatanaada, hinte ubba wode darsidi immeyisata gidana mela Xoossay hintena ubba baggara dureyana. 12 Ha hinte immiya imoy ammaniya asaa pacaa kuntho xalaala gidonashin, asay Xoossaa galatanaw gaaso gidees. 13 Ha hinte oosoy hinte ammanuwa erisidi Kiristoosa Wongela hinte ammanidinne iyaw kiitetidi hintew de7iyaba entaranne haratara shaaketida gisho ubbay Xoossaa bonchana. 14 Xoossay hintew immida aadho keehatetha gisho enti hintew Xoossaa woossishe hintena be7anaw laamotosona. 15 Zawi bayna Xoossaa imuwas Xoossay galatetto.

<- 2 Qorontoosa Kiita 8 2 Qorontoosa Kiita 10 ->