1 Nu ishato, Xoossay Maqedoonen de7iya woosa keethatas immida aadho keehatethaba hinte erana mela nu koyoos.[a] 2 Enti gita meton paacetidosona, shin enta ufaysay wolqaama. Enta manqotethas zawi baawa, shin banta imuwan daro keehidosona. 3 Enti banta wolqaa melanne banta wolqafe aadheysa dosidi immidaysas ta marka. 4 Enti Xoossa ase maaddiya lo77o ooso nuura oothanaw koydi nuna daro woossidosona. 5 Enti nuuni qopidaysafe aathidi oothidosona. Xoossa sheniyada, koyrottidi bantana Godaas immidosona; kaallidi, bantana nuus aathidi immidosona.

6 Ha lo77o oosuwa doomida Titoy, gujidi oothanaadanne hintena maaddidi, he oosuwa polisanaada iya woossida. 7 Shin hinte ubbaban, ammanon, odan, eratethan, gita amon, nuna dosoninne ubbaban duretidaysada ha lo77o oosuwanka hinte keeha gidana mela nu koyoos.

8 Taani hessa kiittanaw giike. Shin harata gita amuwa hinte siiquwara gatha be7ada, hinte ay keena tumeeko eranaw gayis. 9 Hinte, nu Godaa Yesuus Kiristoosa aadho keehatetha ereeta. Kiristoosi dure gidi uttidi, hinte iya manqotethan duretanaada hinte gisho manqis.

10 Taani ha odan hintena maaddiya zore zoranaw koyayis. Hinte zillaythi immanaw xalaala gidonashin, hessa oothanaw amotisheka hinte koyro. 11 Hinte oothanaw doomida oosuwa ha77i polite. Hinte hintew de7eysa keena immiko, hessi hinte immanaw daro amotteysa qoncisees. 12 Issi asi immanaw amotiko, iya imoy Xoossa sinthan eketey, I baw de7idaysa keena imminape attishin, baynabape immanaw un7etin gidenna.

13 Taani hessa gey, hinte ubbay issi gina gidana melasafe attishin, harati waayiyape shempin, hinte waayetana melasa gidenna. 14 Wode enta palahay hinte pacaa kunthana mela, ha77i hinte palahay enta pacaa kuntho. Hessan hinte gina gidana. 15 Geeshsha Maxaafan, “Daro shiishidaysas palahibeenna; guutha shiishidaysas pacibeenna” geetetidi xaafetidaysa mela.[b]

16 Nuuni hintew qopeysada Titoyka hintew qopana mela oothida Xoossay galatetto. 17 Titoy hinteko biday, nuuni iya denthethida gisho xalaala gidonashin, I ba shenen baanaw amotida gishosa. 18 Wongela markatethan woosa keetha ubban daro eretida isha, nuuni Titora issife kiittoos. 19 Hessa bolla nuuni ha keeha imota efiya wode nuura baana mela, ha lo77o oosuwan Godaa bonchanawunne harata maaddanaw de7iya amuwa bessanaw I woosa keethatan dooretis.

20 Ha imetida keeha imuwa, nuuni ooso bolla peeshshiya wode boretonna mela naagetoos. 21 Nuuni Godaa sinthan xalaala gidonashin, asa sinthanka lo77o gididaba oothoos.[c]

22 Qassi daro wode paacen minnidi aadhida nu ishaa, entara hinteko kiitida. I hintenan daro ammanetiya gisho, ha77i hintena maaddanaw daro amottees. 23 Titoba eranaw koyko, hintena maaddanaw taara oothiya ta ooso lagge. Hanko ishataba gidiko woosa keethati kiittidaysata; qassi asay enta duussa be7idi Kiristoosa bonchoosona. 24 Hessa gisho, woosa keethati hinte siiquwanne nu hintena nashiya nashoy tuma gideysa qoncisanaw hinte siiquwa ha asata bessite.

<- 2 Qorontoosa Kiita 72 Qorontoosa Kiita 9 ->