1 Taani hintera de7iya wode, “Shugo”, qassi hintefe haakiya wode “Nu bolla minnees” yaagetida, Phawuloosi, keehanne ashke gidida Kiristoosa sunthan hintena woossayis. 2 Taani hinteko biya wode nu asho qofara simeretiya asi oothidi qopiya asaa bolla mino qaalan odetanaw qofa qachas. Hinte bolla hessada odetana mela hinte tana oothonnaada hintena woossayis. 3 Nuuni ha sa7an de7ikoka ha sa7aa asada oletoko. 4 Nu ola miishey ha sa7aba gidenna. Shin miixa laallanaw wolqara de7iya Xoossa toora. Tumaara eqetiya palamanne, 5 Xoossa eratetha bolla otoron dendiya palamanne hada qofa ubba laalloos. Asa qofa ubbaa di77idi Kiristoosas kiitetana mela oothoos. 6 Hinte kiitetethay polo gidiya wode nuuni kiitetetha ixo ubbaa seeranaw giigetana.

7 Hinte ayfey be7ida mela pirdeta. Oonika bana Kiristoosaba gidi qopiyaba gidiko, nuka Kiristoosaba gideysa ero. 8 Goday taw immida maatan ceeqetikoka hessan yeellatike. He maatay taw imetiday hintena dichanaasafe attishin, qohanaasa gidenna. 9 Taani ta dabdaabiyan hintena yashisanaw koyada xaafidaba daanopo. 10 Issi issi asay, “Phawuloosa dabdaabey deexonne wolqaama, shin iya som7on be7iya wode I daaburancho; iya odayka pathenna” yaagosona. 11 He asati nu haahon de7ishe xaafiya dabdaabiyaninne matan hintera de7ishe oothiya oosuwa giddon dummatethi baynaysa akeeko.

12 Nuuni bantana nashshiya asatara nuna ginayanaw woyko gaaddeyanaw koyoko. Shin enti bantana bantara ginayidi woyko gaaddeyidi be7ishe eeya.

13 Shin nuuni Xoossay nuus immida dhassan ceeqetoosipe attishin, zawa pinnidi ceeqetoko; he zaway hintekoka gakees. 14 Nuuni besseysafe aathidi ceeqetoko, shin Kiristoosa Wongela hinteko gathidaysan ceeqetoos. 15 Nuuni Xoossay essida zawape pinnidi, harati oothida ooson ceeqetoko. Gidoshin, hinte ammanoy diccana mela Xoossay immida zawan hinte giddon nu oothiya oosoy dalgana gidi qopoos. 16 Nuuni hara asi ba zawan oothida ooson gelidi ceeqetoko, shin hintefe pinnidi haratas Wongela markatanaw danda7oos. 17 Shin, Geeshsha Maxaafan, “Ceeqiya ubbay Godaa lo77otethan ceeqo” yaagidi xaafetis.[a] 18 Goday nashshiya uraape attishin, bana baw nashshiya uray nashetenna.

<- 2 Qorontoosa Kiita 92 Qorontoosa Kiita 11 ->