3 ኡባ ሃርያ ጎዳይ፥ “ሄ ጋላስ ካዎ ኬꬃን የፅያ የꬃይ ዬሆን ላመታና፤ አሳ አህ ዱማ ዱማ በሳን ዎꬋና፤ ዬሆይ ዋሶይ ባይና ስእ ግድ የገታና” ያጌስ።
4 ህንተኖ፥ መቶታንቾታ ኡንኤይሳቶ፥ ቢታን ደእያ ማንቆታ ꬋይሳናዉ ኮየይሳቶ፥ ሀይሳ ስእተ! 5 ህንተ፥ “ኑኒ ካꬃ ባይዛናዉ አጌና ፄሮ ባለይ አዉደ አꬋነ! ቃስ ኑኒ ኑ ዛልእያ ዶማናዉ ሳምባት አዉደ አꬋነ! ኑኒ ካꬃ ጉꬃባን ማክድ፥ ዳሮ ሚሸን ባይዛና። ቃስ ዎርዶ ምዛነን አሳ ጭማና። 6 ማንቁዋ ብራን፥ መቶታንቹዋ ዋꬃ ጫማን ሻማና፤ ቃስ ሀርቆ ግስተ ሙሩቶ ግስተ ጋተን ባይዛና” ያጌታ።
7 ያይቆብ እያ ሱንꬃን ጬቀትያ ጎዳይ፥ ፆሳይ፥ ሀይሳዳ ያግድ ባ ሁጰን ጫቅስ፦ “ታኒ ኤንቲ ኦꬅዳ ኢታ ኦሶ ኡባ ዶግከ። 8 ሄሳ ጋሶን ቢታይ ያርኬስ፤ አሳ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎꬋና” ያግስ።
9 ኡባ ሃርያ ጎዳይ፥ “ሄ ጋላስ ታኒ አዋ ሴታ ጋላስ ዉልሳና፤ ጋላሳ ቃምሳና። 10 ታኒ ህንተ ኡፋይሳ ባልያ አዛኖን፥ ህንተ የꬃ ዬሆን ላማና። ፐፅ እስ ናእ ሀይቅን ዬክያ አሳዳ፥ ህንተ ህንተ ሁጵያ ሜደትድ ካዮ ማኦ ማአናዳ፥ ህንተና ኦꬃና። ሄ ጋላሳ ዉርሰꬃይ ዳሮ ጫሞ ግዳና” ያጌስ።
11 ኡባ ሃርያ ጎዳይ፥ “ሄኮ፥ ታኒ ቢታ ኡባ ቦላ ኮሻ የድያ ዎደይ ያና። ሄ ኮሻይ ካꬅ ዎይኮ ሃꬃ ኮሻ ግዶናሽን፥ ስአናዉ ጎዳ ቃላ ꬋዮ ኮሻ ግዳና። 12 አሳይ ዶሎሀፐ ዉሎሀ ጋካናዉ፥ ፑደሀፐ ዱገሀ ጋካናዉ ዎፀረታና። ኤንቲ ጎዳ ቃላ ኮያናዉ ያነ ሃነ ዎፃና፥ ሽን ደሞኮና። 13 ሄ ጋላስ የገልሳ ጌላኦትነ ዎልቃማ ፓንꬃት ሳሞን ፕቅ ጋና። 14 ሳማረ ኤቃታራ ጫቅዳይሳት፥ ‘ዳና ፆሳይ ኤሮ!’ ያገይሳት፥ ‘በርሳበ ፆሳይ ኤሮ’ ያገይሳት ኩንዳና። ኤንቲ ዛር ደንዶኮና” ያጌስ።
<- አሞፀ 7አሞፀ 9 ->