1 ኡባ ሃርያ ጎዳይ ታና ቆንጨꬅ በስስ። ሄ ቆንጨꬃን ታኒ ካዋ ጋክያ ካꬃይ ጫከትዳፐ ጉየ፥ ናምአንꬆ ጫርዳ ዶላ ቦላ ፆሳይ ቦለ ዉደ መꬍሽን በአስ። 2 ኤንቲ እርፃባ ኡባ ምድ ዉርስዳ ዎደ ታኒ፥ “አቤት፥ ኡባ ሃርያ ጎዳዉ፥ ሀያና ነ ደርያ ማራርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉꬃ!” ያጋስ።

3 ሄሳ ግሾ፥ ጎዳይ ኤንታዉ ቃትድ፥ “ሀ ኔኒ በእዳባይ ፖለተና” ያግስ።

4 ኡባ ሃርያ ጎዳይ ታና ሀራ ቆንጨꬅ በስስ። ኡባ ሃርያ ጎዳይ ባ አሳ ፕርዳናዉ ታማ ፄግስ፤ ሄ ታማይ ግታ ጪሞ አባ ም ድግድ፥ ቢታ ማናዉ ዶምስ። 5 ታኒ፥ “አቤት፥ ኡባ ሃርያ ጎዳዉ፥ ሀያና ሀ ታማ ቶይሳርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉꬃ!” ያጋስ።

6 ሄሳ ግሾ፥ ጎዳይ ቃትድ፥ “ሀይስ ፖለተና” ያጌስ ኡባ ሃርያ ጎዳይ።

7 ቃስ ፆሳይ ታና ሀራ ቆንጨꬅ በስስ። ታኒ ሄ ቆንጨꬃን በእያ ዎደ፥ ጎዳይ ቱምበ ኦይክድ፥ ቱምበን ልከትድ ግምበትዳ ግምብያ ማታን ኤቅስ። 8 ጎዳይ ታኮ፥ “አሞፀ፥ ኔኒ አይ ፄላይ?” ያግድ ኦይችስ።

ታኒ፥ “ቱምበ ፄላይስ” ያጋስ።

ጎዳይ ታኮ፥ “ሄኮ፥ ታኒ ታ አሰ ግድዳ እስራኤለ ግዶን ቱምበ የጋይስ፤ ታኒ ኤንታ ሴሮና አግከ። 9 ይሳቃ ኮቻት ጎይንያ ꬎቃ በሳት ላለታና፤ እስራኤለ ጌሻ በሳት ꬋያና፤ እዮርባማ ካዎተꬃ ቦላ ታኒ ማሻራ ደንዳና” ያግስ።

10 ቤተለ ካታማን ካህነ ግድድ ደእያ አማስያስ እስራኤለ ካዋ እዮርባማኮ ሀይሳዳ ያግድ ኪትስ፦ “አሞፀይ እስራኤለ አሳ ግዶን ደእሸ፥ ነ ቦላ ማቀቴስ፤ እ ባ ኦዳን ቢታ ꬋይሴስ። 11 እ፥ ‘እዮርባም ማሻን ሀይቃና፤ እስራኤለ አሳይ ባንታ ቢታፈ ድኤትድ ባና’ ያጌስ” ያግስ።

12 አማስያስ አሞፀኮ፥ “ነኖ ትንብተ ኦደይሶ፥ ባ፤ ይሁዳ ቢታ ባዳ፥ ያን ኦꬃዳ አቃ፤ ያን ትንብተ ኦዳ። 13 ሽን ቤተለይ ካዎይ ጎይንያ በስነ ካዎተꬃ ኬꬅ ግድያ ግሾ፥ ናምአንꬆ ሀ በሳን ትንብተ ኦዶፓ” ያግስ።

14 አሞፀይ ዛሪድ፥ “ታኒ መህያ ሄምያነ ቦባ አይፈ ማፅያ አሰፐ አትሽን፥ ናበ ዎይኮ ናበ ናአ ግድከ። 15 ሽን ጎዳይ ታና ዶርሳ ዉደ ሄምያ በሳፈ ኤክድ፥ ‘ባዳ ታ አሳ እስራኤለስ ትንብተ ኦዳ’ ያግስ። 16 ሀእ ህዛ ጎዳይ ግያባ ስአ! ኔኒ፥ ‘እስራኤለ ቦላ ትንብተ ኦዶፓ፤ ይሳቃ ኮቻታ ሳባኮፓ’ ያጋዳሳ። 17 ሄሳ ግሾ፥ ጎዳይ፥ ‘ነ ማችያ ካታማ ግዶን ላይማ ግዳና፤ ነ አደ ናይትነ ነ ማጫ ናይት ማሻን ሀይቃና። ነ ቢታይ ዎዶሮን ሻከታና፤ ቃስ ኔኒ ነ ሁጰን አላጋ ቢታን ሀይቃና። ስይ ባይና እስራኤለ አሳይ ባንታ ቢታፈ ድኤትድ ባና’ ያጌስ” ያግስ።

<- አሞፀ 6አሞፀ 8 ->