1 ታኒ ጎዳይ ያርሾ በሳ ማታን ኤቅዳሽን በአስ። እ ታኮ፥ “ባሶይ ቃፃና ጋካናዉ ፆሳ ኬꬃ ጉምቡዋ ሾጫዳ አሳ ኡባ ሁጰን መንረꬃ። ሄሳፈ አትዳ አሳ ታኒ ማሻን ዎꬋና። ባቃትያ አስ ከስ ኤከና፤ ከስ ኤክዳ አስካ ፓፃ አተና። 2 ኤንቲ ቢታ ቦክድ፥ ስኦለን ዎꬍኮካ፥ ታኒ ኤንታና ያፐ ከሳና። ሳሉዋ ከይኮካ፥ ታኒ ኤንታ ያፐ ዎꬍሳና። 3 ኤንቲ ቃርመሎሳ ዙማ ሁጰን ቆሰትኮካ፥ ታኒ ኤንታ ኮያዳ ያፐ ከሳና። አባ ጪሞን ገልድ፥ ታ ስንꬃፈ ጌምኮካ፥ ታኒ ዳወ ኪትን፥ እ ኤንታ ዱካና። 4 ኤንቲ ባንታ ሞርከታን ድኤትድ፥ ቢኮካ፥ ያን ኤንቲ ማሻን ሀይቃናዳ ኪታና፤ ታኒ ኤንታ ኢታ አይፈን ፄላና፤ ኤንታ ሎኦ አይፈን ፄልከ” ያግስ።

5 ጎዳይ፥ ኡባፈ ዎልቃማ ፆሳይ፥ ሳኣ ቦችን ሳእ ትልኤስ፤ ቃስ ሳአን ደእያ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎꬋና። 6 ባ ኬꬃ ሳሎን ኬፅዳይ፥ እያ ባሱዋ ሳአን ኤስዳይ፥ አባ ሃꬃ ፄግድ፥ ቢታ ቦላ ዱገ ቡክሰይ፤ እያ ሱንꬃይ ጎዳ።

7 ጎዳይ፥ “እስራኤለ አሳዉ፥ ህንተ ታዉ ቶጰ አሳ መላ ግደከትዬ? ታኒ ህንተና ግብፀ ቢታፈ ከስዳይሳዳ፥ ፍልስፄመ አሳ ካፍቶራፐ፥ ቃስ ሶረ አሳ ቂራፐ ከሳብክና?” ያጌስ።

8 ጎዳይ፥ “ሄኮ፥ ኡባ ሃርያ ጎዳ አይፈይ ናጋራንቾ ካዎተꬃ ቦላ ደኤስ። ታኒ እያ ቢታ ቦላፈ ꬋይሳና፤ ሽን ታኒ ያይቆባ ኮቻ ኡባ ꬋይስከ። 9 ታኒ ካꬅ ዛርዛረን ሀርቀተይሳዳ እስራኤለ አሳይ ካዎተꬃታ ኡባ ግዶን ላለታና መላ ኪታና። ሽን ኤንታ ግዶን አማነትዳይሳታፐ እሶይካ ሳአን ዎꬍድ ꬋየና። 10 ‘ኑና አይባ ኢትካ ጋከና ዎይኮ ደመና’ ግያ ታ አሳ ግዶን ደእያ ናጋራንቾት ኡባይ ማሻን ዉራና” ያጌስ።

11 “ሄ ጋላስ ታኒ ኩንድዳ ዳዊታ ካዎተꬃ ደንꬃና። ድርሳ ግምበታ ዛራ ኤሳና፤ ላለትዳ በሳታ ኦራꬃና፤ ታኒ እያ ካሰይሳዳ ኦꬃዳ ኬፃና። 12 ሄስካ ኤዶመፐ አትዳይሳታነ ታ ሱንꬃን ፄገትዳ ካዎተꬃታ ኡባ ላታና” ያጌስ ሄሳ ኦꬅያ ጎዳይ።

13 “ካꬅ ጫከይሳት ጫክ ዉርሶና ደእሽን፥ ጎየይሳት ጋክያ ዎደይ፥ ዎይነ ጉምኤይሳት ጉምእድ ዉርሶና ደእሽን፥ ዎይነ ቶከይሳት ጋክያ ዎደይ ያና። ሄ ዎደ ደረት ማልኦ ዎይነ ኡሽ ፑልታና፤ ዙማት ዎይነ ኡሻን ምተታና። 14 ድኤትድ ብዳ ታ አሳ እስራኤለ ዛራና፤ ኤንቲ ላለትዳ ካታማታ ዛር ኬፅድ ዳና። ዎይነ ቶክድ እያፐ ዎይነ ኡሻ ኡያና፤ አታክልተ ቶክድ ኤንታ አይፍያ ማና። 15 ታኒ ታ አሳ፥ እስራኤለ ኤንታ ቢታን ቶካና፤ ኤንቲ ታኒ ኤንታዉ እምዳ ቢታፈ ዛሪድ ሾደቶኮና” ያጌስ ሄሳ ኦꬅያ ጎዳይ።

<- አሞፀ 8