5 Sugua ilaba gadoi amea aube nabülasi biyidiaïe odoai äudägi beaha aligiloïe geloia sigi aligimäiage, e gugusämäia, Gode gagadela gelola uuala säha namiäiage, fu ïasio. 6 Amala fu ïasebegi, sugua ilaba amea nafi dagala Gode gagadesalea, ïe ëimage, ïe sege dibe amomage, amase, ïe sosogo Hebeni nefolalebe amolimage, gagadesa neebeo. 7 Ea Godeïe udia dolöbalä nudulahilä, salolela baagila mosäia, ema geloi ïasio. Ea fii sulubadelage, gädili sulubadelage, amase, ado elö elöla sälo sulubadelage, gafodo elö elöi sulubadelage sigi namiäia, ema geloi ïasio. 8 Udia dolö nagadaia nefolalebe amoli sulubadelaea, sugua ilaba amoïe ëi gauia adaha namolömelë. Naga föi made hamola nea, udia dolö ilile ëi namolöi namolö bebagi made dëdëla negei dibe amoliada, amamolömelë. Namolöi namolö beba amoda, Sugua Sibi Malö nufi amoïe gabio.
11 Amase, na aso, beahaleamelebe, sugua ilaba elö naga isogila doadigila fedala aligisio. Ïe busagia bese äudä neebe amoda, sugua sibi malöïe bese gadoi gasoda, ea ado säse amoda, oböla, game gadoia adolo amo gadola adolo gabio. 12 Sugua ilaba agedu ameada, sugua ilaba age amobalä nea, age amoïe sigi namolö geloi sulubadela gaula neebeo. Amala gaula neada, ea sege sulubadelaeage, udia dolö nefolalebe amoli sulubadelaeage, sugua ilaba age amoïe ëi gauia adamalala säha neebeo. E nufudala baagoi gaso, oböla, äyo amo bahola wahi neebe amo. 13 Sugua ilaba agedu amea hamomolöi made gadoi edefade odoa hamosa neebeo. Afädëda, udia dolö nefolalebe amolile siigi, nulo söa mudaiala nagadaia digamäia hamosio. 14 Godea ema geloi ïasebegi, e sugua ilaba age amobalä nea, hamomolöi made gadoi hamosa nelo amea, udia dolö nagadaia nefolalebe amoli dahila neasio. Ea udia dolö ilima sähalea, Sugua ilaba dafidi nudulo helebea nufi gasoda, made baagoi neebe amo dilia helësëla, ïe ausulubo hamomalola säla ïasio. 15 Amala säi amoda, sugua ilaba gadoi ausulubo hamoi amoma hame ifoloïe, ema geloi ïasio. Ausulubo amea ado adomäiage, amase, ïe ëi ilibiala made gauia adase amoli sulubadela nufudala baagomalola sämäiage, hame ifosio.
16 Sugua ilaba agedu amea ëi säloge, ëi sälo madege, nelegei yafie negelo dafidilo nefolalebe amolige, busadäoi amolige, galabaia hamoi gadoi hamolasilo amolige, odoaïe hamoi made hamolasilo fisigäi nefolalebe amolige, sulubadela naabo dafädimadi galë, be, odagia galë magi negemäiala eegedigisio. 17 Amaimo, afädëma sugua ilaba age amoïe ëi magi maade galëda, be, ïe ëi amoïe näba magi maade galëda, ea udia dolö odoama nelebo bidia nimolöge, amase, odoaea ema bidia nimolöge, maade gabio. 18 Dolö asigi falagasei neebe ameada, nelebo amo gowe gadoi gabula helësëmalo. Dolö dawa gaui neebe ameada, sugua ilaba gadoi neebe amoïe näba amo hedabola nidemalo. Näba amoda, dolö afädëïe näba gabumelë. Ïe näbada, hädali gafeiaïe nabülasi gafeiaïe odoai gafeiamelë.*Näba säi amoda, 666. Dafidi ilia Hibulu adoge Giligi adoge amolegida, näba maade. Ilile näbada, a-ba-da afädë afädëla gowe gadoi dilo. A amoda, näba age (1). Ba amoda, näba agedu (2). Amase, Da amoda, näba osoda (3). Amala säsäla aulo. Amaimo, dolö afädëïe ëi amo dëdëla beaha galebeda, a-ba-da näba gegedola nidelahilä, amoïe näba amo gowe gabula fädäla bimolöimelë. Dawadigi dolö iliada, näba 666 egoweïeda, mi elö elöla helësëi. Amase, dawadigi dolö yafieada, Yonea säi amoda, Sisa afädë ëi Neelo nelo amoïe säi gabula helësëi. Olomoïe gini Sisa Neelo ameada, Geleso sosogo nefolalebe amoli neala sëlasisa aligilo.
<- Ulufai 12Ulufai 14 ->- a Näba säi amoda, 666. Dafidi ilia Hibulu adoge Giligi adoge amolegida, näba maade. Ilile näbada, a-ba-da afädë afädëla gowe gadoi dilo. A amoda, näba age (1). Ba amoda, näba agedu (2). Amase, Da amoda, näba osoda (3). Amala säsäla aulo. Amaimo, dolö afädëïe ëi amo dëdëla beaha galebeda, a-ba-da näba gegedola nidelahilä, amoïe näba amo gowe gabula fädäla bimolöimelë. Dawadigi dolö iliada, näba 666 egoweïeda, mi elö elöla helësëi. Amase, dawadigi dolö yafieada, Yonea säi amoda, Sisa afädë ëi Neelo nelo amoïe säi gabula helësëi. Olomoïe gini Sisa Neelo ameada, Geleso sosogo nefolalebe amoli neala sëlasisa aligilo.