1 Wae! Na bu beahaleamelebe, Sugua Sibi Malö amo Saiono bia ami neebeo. Ebalä udia dolö dausinimu hädali afädëïe nabülasi biyidiaïe odoai biyidia amolile odagia, ïe ëige, eedoïe ëige, dëdëla negei dibeo.[a] 2 Amo bealahilä nabelebe, selesaia mosöala goba afädë, ödä nawali guui goba gadoige, hahalä dagaboi goba gadoige, dagabose nabi. Goba amoda, dolö ilia gida düi goba gadoi nabi. 3 Dausinimu hädali afädëïe nabülasi biyidiaïe odoai biyidia amolia, Godeïe beaha aligilo filo dibe amoïe odagiamadige, amase, namolö aligi biyidia nefolalebe amolile odagiamadige, dolö asigi gäwi dafidilo nefolalebe amolile odagiamadi nea, gë gähe udäha nefolalebeo. Gë amoda, udia dolö odoaea dawadigimolöi made. Dausinimu hädali afädëïe nabülasi biyidiaïe odoai biyidia, Godea nagadaiawi damula awäla sigi obëgëi nefolalebe amoliamu, gë amo dawadigimolöi gabio.* 4 Dolö amolida, udiabalä aligilo made ameada, udia amolibalä susugu hamolo made nefolalo. Ili nigime baai made neada, sege sulubadelagi Sugua Sibi Malö awäse amo gadola bëgëla aulo. Godeïege, Sugua Sibi Malö amoïege, ili abulümi gadoi namiäia, udia dolö sulubadela amoligi, Godea ili damula awäla sigi obëgëi.[b] 5 Ilia wäfalï adoge sälo made. Ilima nafade afädëge maade gabio.

6 Amase, na aso, beahaleamelebe, selesaia fii afädë mu ilibia adogo hagila nawesa neebe melï. Ea namolöi namolö ado hedabi afädë nagadaia nefolalebe amolima säla ïmolöïe, ado gaula hagila awäsio. Gafodo elö elöi sulubadelamage, fii sulubadelamage, amase, ado elö elöla sälo sulubadelamage, gädili sulubadelamage säla ïmolöïe, ado gaula hagila awäsio. 7 Ea gelola uuala sähalea, Godeïe gudila mogemolö segeyo amo, hä, besela galai dibe ameada, dilia ebalä bedäla, ema ëi sälo neala sämalo. Muge, naga föige, duhuluge, ödä güge hamoi amoïe ëi gauia adogomalola säsio.

8 Na oböla, bu beahaleamelebe, selesaia fii dafidi asi amo gadola, selesaia fii elöge hobeala bëgëla awäha nea sähalea, Babilono gaamu ilibia edefade amo dagabola digaiee! E hä, dofä dagabola digala nafademolöi nafadeiee! Ea udia dolö fii sulubadelama ïe wani ödä muäia mualasio. Ïe wani ödä amoda, udia dolöea hïdo elöla gesami awäla susugu hamomäiaïe mualalomelëla säsio.[c]

9 Na aso, beahaleamelebe, selesaia fii dafidi äudä asi amole baagia, osodage awäsio. Ea gelola uuala sähalea, Afädëa sugua ilaba gadoi amoïe ëige, hï e gadoi ausulubo hamoi amomage, ilibiala gauia adala, odagia galëge naabogi galëge magi ifolo amo 10 hï eege Godeïe mihalälo hïdo elöi wani ödä amo molömelë. Wani ödä geloi amoda, ödäfalïbalä gegoai made, Godeïe mihalälo ödä iigi söga salala usi dibe amo molömelë. Eda selesaia fii hedabifalï nefolalebe amolile siigige, Sugua Sibi Malö neebe amoïe siigige, nulo igi gadoi ëi saloba wisa neebea ami, hïdo elöla së naha namolömelë. 11 Ili hïdo elöla sëmäia, nulo wise amoïe höbada, buugila fedaha namolöi namolömelë. Udia dolöea sugua ilaba amoïe ëige, sugua amohï gadoi ausulubo hamoi amoge, ilibiala gauia adala, sugua amoïe ëiïe magi negei nefolalebe amolida, yoba gasigige hele fimolö fuda, made bimolömelëla säsio.

12 Amo gadola hamomolö ameada, Godeïe udia dolöea, ea hamomalola säla negei dibe amo gadola bëgëla hamosa neada, Yesuma asigi afädë negela nea, aso maadela, gelola namolö dialea.

13 Na aso, nabaha nebegi, ado afädë selesaia mosöala säia idogosalea, Dia dëdësalea, Segeyo walio wila nofela, udia dolö Dafidilo Geloima asigi afädë negei nea baagose amolida, obeägïsa namolömelëla säla dëdëmola säsio. Amala säsebegi, Gesamia sähaleage, Ä, amo dofä. Ili awähalea, mala hedabi ilia hamosa nelo amoda hilibalä moholö ameada, ilia hamoi baagi sëi hamosa nelo amo fisila, hele fimolömelëla säsio.

14 Wae! Na aso, bu beahaleamelebe, mu baidili falei afädë melï. Dolö afädë dolöfä gadoi mu baidili amodaia sebeo. Ïe busagia gini habuga gadoi goloea hamoi amo salugalahilä, ïe naaboeada, widi damulo helebe sugalëi meifalï gaui gabio.[d] 15 Aso, amo beaha neebegimu, selesaia fii elö Godeïe mosöala doadigila maalahilä, mu baidilidaia sebe amoma gelola uuala säia gahalea, Nagadaia molö difolalebe amoli bësa maadei gabugi, molö damula gegedola negemolö segeyo besela galai ameada, dia helebe sugalëi gaui goea, hä, damumalola säsio. 16 Amala sälebegi, mu baidilidaia sulo amea, ïe helebe sugalëi gaula sulo amo nagadaia fisiga idogolahilä, hä, nagadaia molö amo damusa maadesio.

17 Amase amo gaalu, selesaia fii elö Godeïe mosö Hebeni neebea amila doadigila maasio. Eage helebe sugalëi meifalï gaui gabio. 18 Amase, selesaia fii elö nulo gobei beaha aligilo amoge, odala ïlo auli dibea amila maalahilä, selesaia fii helebe sugalëi meifalï gaula neebe amoma ea gelola uuala sähalea, Ëfë gägä negelo gelebi negei dibe amolida, bëi gabugi, dïe helebe sugalëi meifalï gaula nebegoea, nagadaiaïe gelebi ëfë sagai dibe amoïe gägä maao amoli damula nealahilä, gafedela negemalola säsio. 19 Amala säsebegi, selesaia fii amea ïe helebe sugalëi gaula nelo amo nagadaia fisiga idogola, gelebi ëfë maao dibe amoli damulahilä, gafedela negela gelebi damui amoli emesala fësëlo edefade igi duwi amogi salasio. Amoda, Godeïe mihalälo amoïe säi dialea. 20 Amala salasebegi, gaamu edefade amoïe yala baagido, gelebi gägä emesala fësëlo igi duwi dibe amogi, gelebi gägä maao damula sali amoli emesala fësësio. Amai ameada, igi duwi dibea amila heale awäse amoda, magi sedade gilomida hädali ohodoa gadoige, amase, hulula fedai amoda, sugua hosiïe migalïbalä gaalui amo gadoige awäsio.*Dawadigi dolö yafieada, gaamu edefade amoda, Yalusaleme gabula helësëi. Amase, ilia Giligi adoea sidadia dëdëida, sidadia dausini afädëïe hädali gafeiala dëdëi. Näba säi amoda, 1,600. Egoweda, gilomida hädali ohodoa gadoi. Yonea säi amoda, dofä gilomida hädali ohodoaïe dofe säiledu ma, nelebo odoaïe näba dausini afädëïe hädali gafeiala säla dëdëla negeiledu. Nilïa dawa made.

<- Ulufai 13Ulufai 15 ->