Ulufai 12

Mugabe Saidanige e sosogo nefolalo amolige neala nafadesa maadei

(Ulufai 12–20)

Yonea udiale gamele melï

1 Amase amo gaalu, melëlo made gadoi nofe elöi edefade afädë mudaia adogo ulufadigisio. Amoda, udia afädë neebeo. Ea esoda fagulo gälo amo gadola gäi nea, ïe emo hawa aube aligilahilä, ïe busagia nudula salolelo habuga salugalo amo gadola, gasumilï giwilasi salugai neebeo. 2 Eda, hä, fagulo hagui sebeo. Malö ägümolö ga madesalea, së edefade nahalea, gelola üasio. 3 Aso, melëlo made gadoi nofe elöi mudaia adogo elö ulufadigisio. Wae! Amoda game gadoi edefade afädë, bëi nulo söa gadoi, busa gifalädalïa osogoloi, beseda nabülasi neebeo. Busa osogoloi gifalädalïa amogida, gini habuga gifalädalïa salugai neebeo. 4 Gasumilï ohodoala mogelahilä, game gadoi amoïe hobea osoda amo sulubadela mudaiala doala, nagadaia sadia idogosio.

Amalahilä, udia amea malö neegela ägüseda, malö amo fodolofalï nufudala molöïe, game amea udiaea malö ägüse amoïe odagiamadila beaha neebeo. 5 Amala nebegi, udia amea dolö malö afädë neegela ägüsio. Ïe malö amoda, afädëa fodolofalï fedela neala, Gode neebea amige, ïe beaha aligilo filo dibea amige, sogobala gaula fedasio. Malö ameada, hobea udia dolö gädili sulubadela aeane baialaea beaha aligilo namolömelë. 6 Udia amoda, udia dolö aligisia made ami fisäla awäsio. E ami namiäia, Godea sege afädë daiala negei dilo. E ami seëgida, odoaea e segeyo dausini afädëïe hädali äudäïe nabülasi gafeiagi sigi nea, molö ïaha namolöïe daiala negei.[a]

7 Hä, selesaia mosöa edefademalä nudusio. Maigolola ïe selesaia fii amolalia game amobalä nudusebegi, game amola e sosogo amolalia ilibalä nudula obëgësio. 8 Amai gaso, ilia nudusalea, game amoïe geloi maadesebegi, ili selesaia mosöa namolö fuda, maademelëla säla haila fisisio. 9 Game gadoi edefade amo nesila digisio. Eda nuba gadoi siiba dilo amomelë. Ïe ëida, mugabe busale Saidanilela sälo. Eda sege sulubadelagi nefolalebe amoli nafade hamomäia sigi gaula aulo. E hä, nagadaia nesila sadia idogosio. Amase, e sosogo amolige, ebalä nesila sadia idogosio.

10 Amala hamose amo gaalu na nabelebe, selesaia mosöala ado afädë gelola sähalea,

Nilïle nedoo nalifila ilia nafade hamoila sälo amoda,

dafidi nilïle Godeïe odagiamadi nea, yoba gasigige ilia nafade hamoila säsäla maaha nelo amoda,

nesila sadia idogosio.

Ameada, nilïle Godea nilï damula moholö amoge,

ea Beaha Maadela Sigi Namolö amoge,

ïe geloi amoge,

amase, ïe Afädë Memelei neebe amoïe beaha maadela namolö geloi amoge,

waliowegi hä, besela galai dialea.

11 Sugua Sibi Malö amoïe healeage, ado mala dofä ulufala säla ïlo ameage,

ilia ebalä nudula salolela baagila asi gabio.

Ilia hilile namolö amo made helësëla, së naala baagomolö diëgi, gamelä, aso maadela, baagomolöi nelo.

12 Amai gabugi, Hebeni diage, Hebeni nefolalebe diliage obeägïmalo.

Gaso, naga föi dige, ödä duhulu dige, asigii gabu.

Mida, mugabeïe busa Saidanida, dili neebea digai neebe gogi.

E namolö fu segeyo ede made dibe amo helësëse amea,

edefademalä mihaläha neala

säsio.

13 Game gadoi amea e nagadaia nesila sadia idogose amo beala, udiaea dolö malö neegela ägüi awäse amo gadola, ea bëgëla awäsio. 14 Amala bëgëla awäsebegi gaso, udia dolö aligisia made udia amoïe segea ami hagila mosäia, haea edefade sëdïa gadoiïe augia äudä amo ema ïasio. Segea ami nuba gadoi amea, e made nufuäia, ilia e gäheo i ohodoaïe aube gafeia ami sigi namolömelë. 15 Nuba gadoi amoïe nafiadila, ödä bëi edefade awäse amea udia amo mola mosäia, isosio. 16 Isoi gasoda, nagaea udia amo ugila negesio. Nagaea nafi dagala, game gadoiïe nafiadila ödä bëi misi amo, ea naha maadesio. 17 Amala hamosebegi, game gadoi amea udia amobalä edefademalä habobalahilä, ïe malö odoa amolibalä nudumolö awäsio. Malö amolida, Godea hamomalola säla negei dibe amo gadola bëgëla hamologe, Yesuea ulufala dofäla säi amo asigia dofäla gaula mogologe nefolalebe amoli, sulubadelabalä nudumolö awäsio. 18 Game gadoi amoda, ödä duhulu agesua nowela neebeo.

<- Ulufai 11 Ulufai 13 ->