Ulugu 18

Ado besula udia didalo afädëa gudi mogeloea e ugila negemäia säi

1 Yesuea ïe bëgëla aulo amolia, habola made, segeyo sulubadelagi Godema adosa namiäiaïe olelesalea, ado besu afädë säla ï. 2 Ea sähalea, Gaamu afädëgi mogelo dolö afädë sulo ameada, Godebalä bedälo madege, udia dolö helësëlo madege sulo. 3 Aso, gaamu amogimu udia didalo afädëge sulo. Ameada, segeyo sulubadelagi, gudi mogelo neebea ami awähamu nea, ema sähalea, Nïe ado nii neebe amea, ne neala yölasisa neebe amoïe, dia ne ugila negela gudi hamogila mogolasimola säla afufusamu aligilo sulo. 4 Amala afufusamu nebegi, mogelo dolö amea segeyo yafiegi, üla made, auausa sulo. Gasoda, oböla, hobeala hïdomu sähalea, Nada Godebaläge bedälo made, udia dolöge helësëlo made amo, 5 udia didalo gowea segeyo sulubadelagi, nebalä nalï egesamu neebe goweada, ïe yöi dibe amo na fädäla beala, hä, mogola hamogilasidelä. Ea segeyo sulubadelagi ne neebea maahamu nea, ne neala yölasilasiloea sähala säi.

6 Dafidilo Geloia ado aso, sähamu nea sähalea, Mogelo dolö mogoi made amea, ado säi amo nabualo. 7 Amaimo, Godea ïe udia dolö hï memelei nefolalebe amolia, eso sulubadelagige, gasi sulubadelagige, ema uuala sähamu aligise amolima, mogola mogelasimäia, ea made ugila negemolöle. Ma, asomelëla sämolöle. 8 Na dilima säla ïahago. Ea ili aabela mogola mogelasimäia, ugila negemolömelë. Amamolö gaso, Dolöïe Malö maalahilä, nagadaia wi udia dolö asigi afädë negei nefolalebe bimolölela nabi.

Ado besula Felesi dolölea dagisi muni nelo dolölea Godema adoila säi

9 Udia dolö odoaea helësësalea, nilïda asigi mogoi nea, odoa nefolalebe amoli sulubadelada, holöbö gidogola helësëlo amolima, Yesuea ado besula gowe säla ï. 10 Dolö äudä Godeïe mosöa Godema adomolö asi. Elö amoda, Felesi dolö, amase, elö amoda, dagisi muni nelo dolö. 11 Felesi dolö amea nowela nea, asigiamu Godema adosalea, Gode, neda odoa ili gadoi made, fa neloge, mala nafade hamologe, udia susugu neloge, amase, dagisi muni nelo dolö wagadi neebe gowe gadoige made ameada, dima nesegesa. 12 Na salele afädëïe segeyo äudägi, molö made naala aligilo. Amase, nelebo bidi nease amo sulubadelagida, nabülasi mogelahilä, nabü afädë neala digali ïlomelëla säla Godema adoi. 13 Gaso, ea amala säha neebe amo gaalu, dagisi muni nelo dolö amea, wagadi made nea, Hebeni sida adogomolö made helësëla, hïle bidagia nufigisa nea, Godema adosalea sähalea, Gode, neda nafade hamolo neawe. Dia ne bobasëmalola säimelëla säi.

14 Yesuea sähalea, Na dilima säla ïahago. Mosöa obëgëla awäla, Godeïe siigi mogola nelo amoda, Felesi dolö amo made, dagisi muni nelo dolö amomelë. Udia dolö hili ili ilibialo amoli sulubadela, Godea neala nagadaialasisalea, gaso, afädë hï e nagadaialo neebe amoda, Godea neala ilibialasimolömelëla säi.

Yesuea malësä e mia misiäiala säi

(Madiu 19.13-15; Maga 10.13-16)

15 Udia dolö odoa nefolalo amolia ilile malö dubo amolige, Yesu ïe naaboea diigimäia, e neebea ami sogobala gaula maasebegi, bëgëla aulo amolia amo beala, ilima halala nemola dofogai. 16 Amala nemosebegi gaso, Yesuea malësä amoli e neebea ami mofiamalolahilä sähalea, Dofogamabu. Malësä ne neebea misiäia beasimo. Mida, Godea Beaha Maadela Sigi Neebea ami, malësä gowe ili gadoi neebe amolile dialeamelë. 17 Na dilima dofä sähago. Godea Beaha Maadela Sigi Neebe amo, malësäea neala gaulo amo gadola, made neala gaulo amoda, dofä made nogila digamolömelëla säi.

Nelegei yafie negelo dafidilo dolö afädëa Yesubalä adoi

(Madiu 19.16-30; Maga 10.17-31)

18 Beaha aligilo afädëa Yesuma nabahalea, Säla Olelelo hedabi-e, ne namolöi namolö neala gaumolöïe, abilia hamomolödula nabi. 19 Amala nabasebegi, Yesuea ema säla obëgësalea, Dia nema hedabila säi amoda, mi edoïe. Afädë hedabida maade. Gode emu hedabi nea. 20 Mala säla negei dibe amoda, dia dawadigi nebego.

Udia dolö susugu hamomabio.

Baagomäia nufuabio.

Nelebo fa nimabio.

Wäfalï säsäla gudimabio. Amase,

diado diemele hawala nea, elele ado nabala hamomalola

säi. 21 Amala säsebegi, dolö amea säla obëgësalea, Ado amoli sulubadelada, ne malësägila hamosa maadeimelëla säi. 22 Amala säla obëgëi amo nabalahilä, Yesuea ema sähalea, Afädëfalï dima maademelë. Dïe nelegei difolalebe amo, bidi neaha maademolö mosö. Neaha maadelahilä, dia muni nease amoda, dolö busadäoi nefolalebe amoligali ïmalo. Amala hamoseda, selesaia mosöa bidi edefade nimolömelë. Amo gadola hamolahilä, ne bëgëla misialola säi. 23 Ado säi amo nabalahilä, ïe odagi augia idogola, edefademalä yöi. Mida, ïe nelegei yafie dilo amogi amai.

24 Yesuea dolö amoma siila nea sähalea, Nelegei yafie negelo dafidilo dolö neebe amolida, Godea Beaha Maadela Sigi Neebea ami nogila digamolöda, häuai galeamelë. 25 Dofä. Sugua gameleda, nusi galabagi doadigila moholöda, häuai holöfalï mademelë. Gaso, nelegei yafie negelo dafidilo dolö nefolalebe amoli, Godea Beaha Maadela Sigi Neebea ami nogila digamolöda, häuai baagila asi dialeamelëla säi. 26 Udia dolö nefolalo amolia, ea ado säi amo nabalahilä sähalea, Amai, damula auloda, nowëa gaula namolödula säi. 27 Amala säsebegi, Yesuea säla obëgësalea, Udia dolöea hamomolöi made amoda, Godea hamomolöi neamelëla säi.

28 Amala säsebegi, Fidaea sähalea, Hä, bimo. Nilïa nilïle nelegei sulubadela fisila, di bëgëla misimelëla säi. 29 Amala säsebegi, Yesuea ilima sähalea, Na dilima dofä säla ïahago. Sulubadelaea mosöge, udiage, edooge, eedo emelege, malöge fisila, Godea Beaha Maadela Sigi Neebe amomu si gäwisi awäseda, 30 nagadaia neebe wegi nea, fisi amoli baagila awäla, edefademalä gaula namolölahilä, oböla, segeyo hobea besela galamolö amogi, namolöi namolö dibe amo gaula namolömelëla säi.

Yesuea e baagolahilä nowemolömelëla bu osoda säi

(Madiu 20.17-19; Maga 10.32-34)

31 Yesuea ïe bëgëla aulo giwilasi amoli sigi aliga galahilä, ilima sähalea, Nabuö. Nilï hä, Yalusaleme moholö awähamelë. Awäseda, nelebo sulubadela dafidi bea sälo nefolalo amolia, Dolöïe Malö amoïe säla dëdëla negei dibe amo gausiala digaha maademolömelë. 32 Afädëa Dolöïe Malö amo Yu dolö ilima made, dolö odoa nefolalebe amolima gaula ïaseda, ilia e gadiabola digi, e gagadela digi, ema gofedela galala digimolömelë. 33 Ilia e fëgälahilä, baagomäia nufulömelë. Amala hamoseda, segeyo äudä nelolahilä, osodagi, hï nowemolömelëla säla ï. 34 Bëgëla aulo amolia, ea säi amo sulubadela made helësëi nelo. Ilia ado säi amoïe, galone made helësëmäia, musügä negela säi amea, ilia ea säi amoda, goweïe säsebela, dofä dawa made nelo.

Yesuea si golai afädë wahilasi

(Madiu 20.29-34; Maga 10.46-52)

35 Yesu e Yaligo gaamugi besela galamolö ga madesa nebegi, dolö si golai afädë idi agesua ami salea, udia dolöma muni ïmola ëdëgësa sulo. 36 Udia dolö yafie adodola afiasebe amo nabalahilä, ea nabahalea, Goda edo hamosebela nabi. 37 Ilia ema säla obëgësalea, Goda Nasalese fii Yesu awäsebela säi. 38 Amala säsebegi, ea uuala sähalea, Debidiïe malö Yesu-o, ne bobasëmola säi. 39 Yesu hobeala maaha nebegi, amala uuasebegi, udia dolö dafidila afiaha dilo amolia ema nemosalea, Dia adomabu. Gameläla säi. Amala säsebegi gaso, ea gelolafalï uuahalea, Debidiïe malö-o, ne bobasëmola sähamu sulo. 40 Hä, Yesu e maala beaha nea, dolö si golai amo e neebea ami sigi misialasebegi, ilia e sigi gaula maala, Yesu neebea ami ga madela ifosi. Amalebe, Yesuea ema nabahalea, 41 Na dima abilia hamomäia hamesebela nabi. Ea säla obëgësalea, Dafidilo Geloi-e, na siia fädäla bimolö hamesebela säi. 42 Yesuea ema sähalea, Hä, bimo. Dihï Godema asigi afädë negei amea, di hä, wahi gomelëla säi. 43 Amala säi amole, ïe si golai amo hä, fodolofalï wahisebegi, ea Godeïe ëi gauia adogolahilä, Yesu bëgëla asi. Udia dolö nefolalo amoli sulubadelaea, amala hamose amo bealahilä, iliage Godeïe ëi gauia adaha nefolalo.

<- Ulugu 17 Ulugu 19 ->