Ulugu 19

Yesu e Sagiasia mosöa asi

1 Yesu e, hä, Yaligo gaamugi besela galala baagila awäha nelo. 2 Gaamugi amida, dolö afädë sulo. Amoïe ëida Sagiasi. Eda dagisi muni neaha aligilo nefolalebe amolile busa nea, muni yafie negei nelo. 3 Ea Yesuda, abodo gadoi walebelela bimolöla helësëi gaso, udia dolö yafie negegi amea, ea Yesu bimolöi made melï. Mida, e oboba amea. 4 Udia dolö awäsebe amo gadola, e edale baluluia awälahilä, Yesu eda, idi gowegi maase bimolö gabula helësëlahilä, äfäeo i amogi fedala sulo. 5 Yesu e maala, Sagiasi e fedai sebea ami besela galala, sida adogola nea, Sagiasima sähalea, Sagiasi-e, neda walio dia mosöa namolö moholömelë. Di hä, fodolofalï digamola säi. 6 Amala säsebegi, Sagiasi e fodolofalï digala, ïe iso asigia obeägïlahilä, ea mosöa fimäia Yesu säla olela fu ï. 7 Amala säsebegi, udia dolö nefolalo amolia, amala hamosebe amo bealahilä, habobala sëdäwala sähalea, Dolö nafade hamolo amea mosöa söfë awäsebegola säi. 8 Ea mosöa awälahilä, Sagiasia nowela nea, Dafidilo Geloima sähalea, Dafidilo-o, dia nabuö. Na nelebo difolalebe amo mogogi mogelahilä, elö amo busadäoi nefolalebe amoligali ïmolömelë. Amalahilä, afädëïe nimolö dibe amo gadola made, baagia asogola ïmola säla neaha nelo amoïeda, na oböla, dahila neala nii amoïe biyidiala ïa obëgëmolömelëla säi. 9 Amala säsebegi, Yesuea ema sähalea, Dolö gowe eege, hä, Abalahamaïe malö neebe ameada, mosö gowegi sefolalebe amolia, walio hä, damula aulo neala gausagomelë. 10 Dolöïe Malö ameada, udia dolö dabadigi neebe amoli, hogolahilä sigi obëgëmolö misimelëla säi.

Ado besula hamoi hamolasilo nabülasia muni niiïe säi

(Madiu 25.14-30)

11 Udia dolö nefolalo amolia, ado säse amo nabaha sefolalebegi, Yesuea aso, sähamu nea, ilima ado besula säha nelo. Mida, e hä, Yalusaleme ga madela neëgida, ilia helësësalea, Godea Beaha Maadela Sigi Neebe amo, waliomu ulufadigimolö gabula helësëi. 12 Amala helësësebegi, Yesuea sähalea, Dolö dafidilo ëi sälo afädë nelo amea, ilia e gini neala ifosimäia, sege wagadi made awälahilä, hobeala hï segea udia dolö sigi namolö obëgëmolöïe, naabo negesiä asi. 13 E aso, awäla made nea, dafidi ïe hamoi hamolasilo nabülasi welahilä, ilima muni giwi siliba hädali afädë hïdo hïdolama sogosalea sähalea, Gowe ïase goweada, ne asibua hamoi hamolahilä, baala nea negesa namialola säsiä asi.

14 Amala asibua, hïle segeafalï udia dolö sefolalo amolia, ema bimolö habobalahilä sähalea, Dolö goweda, nilïle gini namiäia hamesa mademelëla sälahilä, odoaea e moholö awäsebea ami säla ïmolö mosalola säi. 15 Amai gaso, ga nefolalo amolia dolö amo gini neala ifosisebegi, e obëgëi. E hä, obëgëlahilä, ïe hamoi hamolasilo amolima muni ïasila asi amolia hamoi hamolahilä, baala abilia hamoi walebelela bimolöïe, e neebea ami misialamalola säi.

16 Amala misialasebegi, dolö dafididale misi amea ema sähalea, Dafidilo-o, dia muni giwi siliba hädali afädë ï amea, na hamoi hamolahilä, muni giwi siliba dausini afädë baala nea negeimelëla säi. 17 Amala säsebegi, ea dolö amoma sähalea, Hamoi hamolasilo hedabi-e, hedabola hamoi gabu. Dia holöfalï amo asigi falagasei nea, sigi nelo gabugi, gaamu nabülasi dibe amo dia sigi namialola säi.

18 Amalahilä, dolö agedu amo maalahilä sähalea, Dafidilo-o, dia muni giwi siliba hädali afädë ï amea, na hamoi hamolahilä, muni giwi siliba hädali bia baala nea negeimelëla säi. 19 Amala säsebegi, ïe dafidilo amea dolö amoma sähalea, Gaamu bia dibe amo dia sigi namialola säi. 20 Amase, dolö elö amo maalahilä sähalea, Dafidilo-o, dïe muni giwi siliba hädali afädë amoda gowe. Na faguloea usulala negei dilo. 21 Mida, di geloi bologodei amo helësëla, ne bedäi. Dolö elöea nelebo negei dibe amoda, dia nealahilä, dia made sagaia amida, dia faila nülo gabiola säi.

22 Amala säsebegi, ea dolö osoda amoma sähalea, Hamoi hamolasilo nafade di, dihï ado säsebe goea, na dibalä gudidelä. Dia helësësaleada, neda geloi bologodeige, nelebo odoaïe dibe amoge, na nelo, amase, molö na sagai made amoge, na faila nülolage helësëile. 23 Dia nïe muni amo bëgigi negesiä ami, made negei goda, abisalea amai. Amala negei galebeda, ne obëgësegi, baai muni amola nealabio godala säi. 24 Amala sälahilä, ea ami nefolalo amolima sähalea, Ea muni giwi siliba hädali afädë gaula neebe go fedela, muni giwi siliba dausini afädë gaula neebe amogali neala ïmalola säi. 25 Amala säsebegi, ilia ema säla obëgësalea, Dafidilo, eda muni giwi siliba dausini afädë gaula neebela säi. 26 Amala säsebegi, ea säla obëgësalea, Na dilima säla ïahago. Sulubadelaea nelebo gaula neebe amolimada, odoa baala ïmolömelë. Gaso, afädëa made gaula neebe amomada, holöfalï gaula neebe amo haila nimolömelë. 27 Amaimo, nebalä ado nealahilä, ne ilile gini made namiëla sälo nefolalebe amolida, dilia sigi maalahilä, nïe odagia baagomäia nufudaha maademalola säimelëla säi.

28 Yesuea amala sälahilä, e Yalusaleme aulo idigi, dafidi awäha nelo.

Yesu e Yalusaleme besela galalahilä, gobela ïlo mosöa ami udia dolöma olelesa nelo

(Ulugu 19.29–21.38)

Yesu e gini gadoi hamola, Yalusaleme besela galai

(Madiu 21.1-11; Maga 11.1-11; Yone 12.12-19)

29 Yesu e maala Bedefagige, Bedanige, ga madela nea, segebi ëi Olibebia amila, ea bëgëla aulo äudä dafidi mosalolahilä, elema sähalea, 30 Ali segea ago mosö nefolalebea ami awäla besela galala beahamelële, sugua dögi üdïli afädë dafidi dolö afädë filo made, gide begei neë bimolömelë. Amo fisigäla, wi sigi obëgëmalo. 31 Afädëa alima goda abïdä fisigähala nabaseda, alia gomalä sämalo. Dafidiloea webalä hamomolö galeamelëla sämalola säi. 32 Amala säsebegi, dolö äudä dafidi mosaloi amole awäla beahamelebe, ea säi amo gadolafalï dibe melï. 33 Hä, elea sugua dögi üdïli gide begei amo fisigäha nebegi, amoïe eedo amolia elema, Goda abilia hamodelä fisigähala nabi. 34 Elea säla obëgësalea, Dafidiloea webalä hamomolö galeamelëla säi. 35 Amala sälahilä, elea sugua dögi üdïli amo sigi, Yesu neebea obëgëi. Amalahilä, elele fagulo daia salugalo giila, sugua dögidaia sadia idogolahilä, Yesu amodaia fila fedamäia, ugila negei. 36 Amalebe, e amodaia fila awäha nebegi, udia dolöea ilile fagulo daia salugalo amo giilahilä, idiafa föföla awäha nelo. 37 E awäla Olibebia amila aliga idogomolö idi ga madesebegi, udia dolö yafie e bëgëla aulo amoli sulubadelaea, geloi melëlo made gadoi sulubadela hamose melï amoïe, edefademalä obeägïlahilä, gelola uuala Godeïe ëi gauia adala sähalea,

38 Beaha aligilo gini Dafidilo Geloiïe ëigila maahago, Godea e neala obeägïlasimäia.

Selesaia mosöa ami, neala dalulasilo diamiäia.

Gode ilibia neebe amoïe ëi gauia adogosawela

säsäla afiaha dilo. 39 Amala säsäla afiaha dibegi, Felesi dolö odoaea udia dolö gegedoi nefolalebea amila Yesuma sähalea, Säla Olelelo-o, dïe bëgëla aulo golima nemomola säi. 40 Amala säsebegi, Yesuea säla obëgësalea, Na dilima säla ïahago. Ilia adola made, aumala neëda, igi difolalebe gowe ilia gelola uuala sämolömelëla säi.

Yesuea Yalusaleme gaamu amo beala dïi

41 Yesu e besela galamolö ga madela nea, Yalusaleme gaamu amo bealahilä, amogi dïisa nea sähalea, 42 Segeyo walio wegi, di neala dalulasilo amo dihï helësëlabio gaso, walio hä, dia siia bimolöi made, musügä dialeamelë. 43 Hobeala segeyo afädëgi, di mia besela galasegi, dïe ado nii neebe amoli maalahilä, dïe yala edefade go baagido, naga gasala dadagulula nelegela amalelahilä, dïe idi sulubadela gaha maademolömelë. 44 Ilia dihïdige, dïe malö dïe mumusogi sebe amolige, neala nagadaia sadia idogola dusula nafademolömelë. Gode e di neebea misi amoïe segeyo, dia dawa made nelo amea, ilia dïe igi odoa daia dadagulula negei dibe goda, sulubadela mugulula digaha maadela, igi afädë igi elödaia made diamolömelëla säi.

Godeïe mosöa magaia negei hai

(Madiu 21.12-17; Maga 11.15-19; Yone 2.13-22)

45 Amala sälahilä, Yesu e Godeïe mosö yala isogi nogila digalahilä beahamelebe, dolöea bidi nimolöïe, nelebo negela digisa difolalebe amoli nesila digilahilä, 46 ilima sähalea, Ado säla dëdëla negei dibe amea sähaleada, Nïe mosö amoda Godema adolo mosö diamolömelë. Amai gaso, dilia oböla, fa nelo musügä aligilo igi äbä gadoi hamoi gabula säi.

47 Segeyo sulubadelagi, Yesu e Godeïe mosöa ami nea, ado mala olelesa aligilo nelo. Amala olelesa neëgida, gobela ïlo busa nefolalo amoliage, mala dawadigi amoliage, amase, udia dolö beaha aligilo busa nefolalo amoliage, Yesu nufulöïe idi hogosa nelo. 48 Amai gasoda, udia dolö nefolalo amoli sulubadelaea, Yesuea mala olelese amo, afädë damula fisila made, hedabola naba mafusa neebe amea, ilia Yesu nufulö fu made beagolei nelo.

<- Ulugu 18 Ulugu 20 ->