Ulugu 17

Neala nafadelasiloïe säi

(Madiu 18.6-7, 21-22; Maga 9.42)

1 Yesuea ïe bëgëla aulo amolima sähalea, Udia dolöea asiala hamomäia, ili neala digalasimolö nelebo elö elöla, dofä moholö gaso, nelebo amoli misiäia, dolö doga negelo amoda, asigii gabu. 2 Dolö amea malö holöbö gowe gadoi nefolalebe goweligi, afädë neala digalasiseda, ëfëa igi edefademalägi begela, bidi näiadoea ïe muugia begelalahilä, ödä duhulugi sadia idogoseda, ïe hedabida amomelë. 3 Amala hamoloea, dihili dili hedabola idihë namialo.

Dïe didoo afädëa nafade hamoseda, nemomalo. Amogi, e bu asigi besuseda, nafade hamoi amo säla made, fisimalo. 4 Amaimo, segeyo afädë amogimu, dima gifalädalïala nafade hamolahilä, gifalädalïala asigi besula, di neebea maalahilä, na dima nafade hamoimelëla säseda, ea nafade hamoi amo, dia säla made, fisimalo.

Yesuea asigi afädë negeloïe säi

5 Abosolo dolö ilia Dafidilo Geloima sähalea, Nilïa asigi afädë negei neebewe, dia neala edelasimalola säi. 6 Amala säsebegi, Dafidilo Geloia ilima säla obëgësalea, Dilia asigi afädë negeigo, masada gägä holöfalï amo gadoi negei nea galëda, dilia hä, i neebe gowema sähalea, Dihï soomo aala gaula awäla, ödä duhulu dibea ami sagala namiëla säseda, dia säse amo nabala hamomolömelëla säi.

Yesuea hamoi hamolasiloïe säi

7 Yesuea ado aso, sähamu nea sähalea, Dili nebegogi afädëa, ïe hamoi hamolasilo neebe amea sagai sagamolöïe naga dagabosa nelo galëge, sugua sibi sigi nelo galëge, e mosöa obëgëla maaha neëgi wäla, ea sähalea, Di fodolofalï maalahilä, molö molöïe samiëla sämolöle. 8 Amala made. Ea hamoi hamolasilo amoma sähalea, Nïe molö giala daiamalo. Amalahilä, di fagulo afädë neala bulula, ne molö molö amo deala gaula maala, na molö ödäle nase amo gaalu, dia sigi beaha namialo. Amala hamolahilä, hobealada, dihïdi mualola sälo madele. 9 Oböla, hamoi hamolasilo amea säi amo gadola hamosa maadeseda, ïe dafidilo amea ema nesege, hedabola hamoi gabula sämolöle. Ai, amala made. 10 Dihili dilige amo gadoi wäla neebela helësëla, dilia hamomalola säi amo gadola hamosa maadelahilä, gomalä sämalo. Nilïda hamoi hamolasilo dofea mademelë. Nilïa hamomolö dibe amomu hamoimelëla sämolö dialeala, Yesuea säi.

Yesuea dolö gudubu hamoi nabülasi wahilasi

11 Yesu e Yalusaleme moholö awähalea, Disiligi Samelia Galilile mogogi ami awäha nelo. 12 E gaamu afädë dibea ami awäla besela galaha nebegi, dolö gudubu hamoi nabülasi idiafa holöbö wagadi madela nea, 13 gelola uuala sähalea, Dafidilo Yesu-o, dia nilï bobasëmola säi. 14 Amala säsebegi, Yesuea ili bealahilä sähalea, Dili gobela ïlo amoli neebea awäla, dilile domalo go olemolö mosalola säi. Amo nabala, ili idiafa awäha dibegi, ilile gudubu hamoi amo wahisa maadei. 15 Iligi dolö afädëa beahamelebe, ema gudubu hamoi dilo amo wahi amo bealahilä, gelola uuala Godeïe ëi gauia adogola, bu obëgëi. 16 Obëgëlahilä, ea Yesu mia, gumusula dia digalahilä nesegei. Eda Samelia dolö. 17 Yesuea dolö amo bealahilä sähalea, Dolö nabülasi amoli hulu wahisa maadei madele. Amai, sëgëlasi amolida, abilisio. 18 Dolö odoa obëgëla maalahilä, Godeïe ëi gauia adala made, dolö fii elö goweamu, amala hamosalela nabi. 19 Amala nabalahilä, dolö amoma sähalea, Di, hä, nowela mosö. Dihï asigi afädë negei amea di hä, wahigomelëla säi.

Dolöïe Malö ulufadigila moholö amoïe säi

(Madiu 24.23-28, 37-41)

20 Segeyo afädëgi, Felesi dolö nefolalo amolia Yesuma nabahalea, Godea Beaha Maadela Sigi Neebe amoda, abola moholö gabula nabi. Amala nabasebegi, Yesuea ilima säla obëgësalea, Godea Beaha Maadela Sigi Neebe amo, nofe elöi siia melemolöibaläda, made moholömelë. 21 Afädëa sähalea, Bimo, gui neebe, ma, gagowei neebela sämolöi mademelë. Nabuö. Mida, Godea Beaha Maadela Sigi Neebe amoda, hä, dili neebea gui misi dialeamelëla säi.[a]

22 Amala sälahilä, ïe bëgëla aulo amolima sähalea, Segeyo afädë besela galamolö amogi, dilia Dolöïe Malö amoïe segeyo afädë gelola bimolöila helësëmolö gaso, made bimolömelë. 23 Odoaea dilima sähalea, Bimo, gagowei neebela säsege, ma, bimo, gui neebela säsege, dilia ili bëgëla, bea mosabio. 24 Mida, sege yabagelesegi, mu giwi sulubadelagi yo digaha maadelo amo gadolada, Dolöïe Malö amo, ïe segeyogi amo gadoi wäla maala namolömelë. 25 Amamolö gaso, e dafidi edefademalä së elö elöla nasegi, udia dolö walio segeyo nefolalebe welia, e baagi ïmolö dialeamelë.

26 Noaïe segeyogi hamoi amo gadola, Dolöïe Malö amoïe segeyogige, amo gadola wäla hamomolömelë. 27 Udia dolö nefolalo amolia, molö ödä nadigi, udia neadigi, dolö fila awäla digisa nebegi, Noa eda ödä sibi isogi fila fedamolö segeyo amo besela galaimelë. Amala hamosa nebegi, ödä bëi edefade maalahilä, udia dolö sulubadela ödäea naha maadei. 28 Amase, Olodeïe segeyogige, amo gadola wäla hamosa nelo. Udia dolö nefolalo amolia, molö ödä nadigi, nelebo neadigi, odoaea nimäia nelebo negela digi, sagai sagala digi, mosö oladigisa nelo. 29 Olode e Sodomo gaamu amo dïgïla awäsolo segeyo amo gala, mudaiala nulo söabalä, igi gadoi abüai, ëida saloba, neëi amola sadia idogoi amea, ili sulubadela nafadesa maadei. 30 Dolöïe Malö ulufadigimolö segeyo amogige, amo gadola wäla hamosa namolömelë.

31 Segeyo amo gala, dolö mosö daiowa sebe amea, ïe nelegei mumusogi dibe amo nea digamabio. Amo gadola wäla, dolö sagaia neebe ameage, nelebo afädë hï mosöa nea obëgëmabio. 32 Dilia Olodeïe udia amo helësëla obëgëmalo. Mi Gäwi 19.26 33 Afädëa hïle namolö amo gaula fëdöla aligimolö helësëseda, ïe namolö amo hogosa helemolömelë. Gaso, afädëa hïle namolö amo fisiseda, ea ïe namolö amo gaula namolömelë.

34 Na dilima säla ïahago. Amo gala, gasigi dolö äudä sogobala adi diëgi, elö amo neahalea, elö amo dïgïla moholömelë. 35-36 Udia äudä heledo wahalo däilaha neëgi, elö amo neahalea, elö amo dïgïla moholömelëla säi.[b] 37 Amala säi amo nabalahilä, ilia ema nabahalea, Dafidilo Geloi-e, abidi hamomolödula nabi. Amalebe, Yesuea säla obëgësalea, Baagoi domalo dibea ami, haea säsalï gadoi mafula gegedomolömelëla säi.

<- Ulugu 16 Ulugu 18 ->