1 Yesuea ïe bëgëla aulo amolima sähalea, Nelegei yafie negelo dafidilo dolö afädë nelo. Dolö afädëa dafidilo amoïe nelegei amoli sigi nebegi, dolö odoa dafidilo neebea ami maalahilä, ïe nelebo sigi aligilo amea nafade hamoimelëla sämolöïe, dafidiloma sähalea, Dïe nelebo sigi aligilo amea, dïe muni amoda, waeasese melïmelëla säla ï. 2 Amala säla ï amo nabalahilä, nelegei yafie negelo dafidilo amea, ïe nelebo sigi aligilo amo misialola welahilä, ema nabahalea, Dïe sedalu afädë na nabi amoda, abilia hamoi. Nïe nelebo dia sigi neebe amoli hedabola nidelahilä, dëdëla negesa maademolö mosalo. Dida nïe nelebo sigi aligilo namolö mademelëla säi.

3 Amala säsebegi, nelebo sigi aligilo amea hïdo sähalea, Nïe dafidilo ameada, ïe nelebo sigi nelo amo dïgïla mosalola, hä, säi amo gabu. Amai na edo hamomolödu. Na odoaïe hamoi hamolasila, naga dagabomolö amoge, geloi maade gabu. Amase, odoama muni ëdëgëmolö amoge, ne hewai gabu. 4 Wae! Na hamomolö amo helësësawe. Nïe dafidilo neebe amea, na nelebo beaha neebewe haila fisiseda, na gowe gadoi hamomolöla helësësewe hamoseda, ne damelë neebe amolia, neda ilia mosöa misiëla sämolöla helësësala säi. 5 Amala helësëlahilä, ea ïe dafidilo amoma bidi negelo dolö amoli, hïdo hïdola wela mofiamalolahilä, dafidi misi amomadale nabahalea, Dia nïe busa dolöbalä bidi aboläia negei dialeala nabi. 6 Ea säla obëgësalea, Olibe gägäïe weli ödä i edefadegi usi hädali afädë bidi negei neamelëla säi. Amala säsebegi, sigi aligilo amea dolö amoma sähalea, Dia bidi negei amoïe beba amoda gomelë. Dia beba go nealahilä, hä, fodolofalï fia idogola salea, nabülasi bia dëdëmola säi. 7 Amala sälahilä, ea dolö elö amoma nabahalea, Dia bidi aboläia negei dialeala nabi. Amala nabasebegi, elö amea säla obëgësalea, Eladi gadoi widi sali adu dausini afädë bidi negeimelëla säi. Amala säsebegi, sigi aligilo amea ema sähalea, Dia bidi negei amoïe beba amoda gomelë. Dia beba go nealahilä, hä, hädali gödölasi dëdëmola säi.

8 Hobeala, dafidilo amea sigi aligilo mogoi made, asigi halowei amoma sähalea, Dia hobeala edo hamomolö amo hedabola helësëla, amala hamoi goda, hedabola hamoi gabumelëla säi. Nagadaia namolöïe malö amolia, yo digaloïe malö amolia hamolo amo gadoi made, baagila awäla, odoa hili ili gadoi helësëla hamolo amoda, hedabola helësëla hamolomelë. 9 Na dilima säla ïahago. Nagadaiaïe muni dibe ameada, udia dolö odoa neebe amoli damelë hamomalo. Amala hamosa neëgi, munia hamoi hamolo amo wagasolo amo gala, Godea namolöi namolö dibea ami, namolö misiëla sämolömelë.[a]

10 Afädëa nelebo holöfalï dibe amo, hedabola sigi aligiseda, nelebo edefade dibe amoge, hedabola sigi namolömelë. Amase, afädëa nelebo holöfalï dibe amo, mala mogola made sigi aligiseda, nelebo edefade dibe amoge, mala mogola made sigi namolömelë. 11 Amai gabugi, asigi falagasei made nea, nagadaiaïe muni amo, hedabola made sigi aligiseda, amai nelebo dofä hedabi dibe amo, dilia sigi namiäia, nowëa dilile naabogi gausimolödu. 12 Amaimo, dilia odoaïe nelegei dibe amo asigi falagasei made nea, hedabola made sigi aligiseda, amai dilile nelegeida, nowëa ïmolödu.

13 Hamoi hamolasilo afädëa, dafidilo äudäïe galabaia hamoi gadoi hamolasimolö ulïmelë. Ea elö amoma bimolö habobahalea, elö amo boba hamomolömelë. Ma, elö amo hedabola ugila negesaleada, oböla, elö amo memalä gabula helësëmolömelë. Dilia Godeïege, muniïege, helegelaïe galabaia hamoi gadoi hamolasimolö ulïmelëla Yesuea säla ï.

14 Felesi dolö muni boba hamolo amolia, Yesuea ado säi amo sulubadela nabalahilä, e gadiabola säha dilo. 15 Amalebegi, Yesuea ilima sähalea, Diliada udia dolö odoa neebe amolia, dili asigi mogoi neebela helësëmäiala hamelo neago gaso, dilile iso asigida, Godea dawa nea. Udia dolöea nelebo hedabi edefade gabula helësëlo amoda, Godeïe sidaia nafadefalï nafade dialeamelë.

16 Mosese nebegi, Ado säla negei dibe amoge, bea sälo ilia ado säla negei dibe amoge, säla ïaha neloa amila maala, Yone neebea besela galai. Amase, Yone misia amila mi gäwilahilä, Godea Beaha Maadela Sigi Neebe amoïe, Ado Mala Hedabi säla ïaha nea. Udia dolö sulubadelaea gelolahilä, ami digaha neamelë.

17 Amaimo, muge, naga föige, hogosa helemolöi dialea gaso, Mosese nebegi, Ado säla negei dibe amogi, bea sälo ilia ado säla negei dibe amogige, ado holöfalïïe dudumu afädë, made hogosa helemolömelëla säi.

19 Yesuea ado aso, sähamu nea sähalea, Nelegei yafie negelo dafidilo dolö afädë sulo. Dolö amea fagulo hogale uii didiga salugaloge, fagulo hedabi hïdo elöi muni edefadea nii amoge, salugalo neada, segeyo sulubadelagi obeägïla molö hedabifalï amomu naha nelo. 20 Amase, busadäoi dolö afädëge sulo. Amoïe ëida Elasalusi. Ïe domalo sulubadela äyomu aligisa maadei sulo. Odoaea e sogobala gaula, nelegei yafie negelo dafidilo dolö amoïe mosö idi galo mia ami, ifosisa aligilo. 21 Busadäoi ameada, nelegei negelo dolö amea molö nahalea, auli hawa dao digase amo molöila gelola helësësa filo. Ügülo amoli maala, ïe domalogi äyo aligi amoli nobaha aligilo.

22 Hobeala, busadäoi amo baagosebegi, selesaia fii ilia e gaula awäla, Abalahama neebea ami ifosi. Nelegei yafie negelo dafidilo dolö amoge baagosebegi, ilia e dögöla negei. 23 Eda heli segea ami së edefademalä naha nea, sida adogola beahamelebe, Abalahama mia made neebe, amobalä Elasalusige neebe melï. 24 Amala neebe amo bealahilä, ea uuala säia adogosalea, Naado Abalahama-o, ne nulo gobeia wi nea, së edefade naha neebe weada, dia ne bobasëla, Elasalusiïe naabo sögö ödägi gelahilä, nïe elï hisulasila diigila misialala sämola säi. 25 Amala säsebegi, Abalahamaea säla obëgësalea, Nïe malö-o, di made baagola nea, dida nelebo sulubadela hedabigimu nelo. Elasalusi eda nelebo sulubadela nafadegimu nelo amo, helësëmo. Gaso, walio sege wegi neada, e bobasëla aealasisa nebegida, dida hä, së edefade naha nebego. 26 Amase elöda, odoaea nilï neebea wila, dili neebea idogoi digadeläla hamese amoli digamolö ulïmäia, nilï mogogi nofe geloi edefade negei dialeamelë. Amo gadola, dili neebea amilage, nilï neebea wi fedamolö ulï neamelëla säi. 27 Amala säsebegi, dolö amea säla obëgësalea, Hä, amai galëda, naado Abalahama-o. Na dima gelola afädë nabahago. Dia Elasalusi e naadoea mosöa fisiga idogomo. 28 Mida, nïe nedoolali bia nea. Amolige së nülo dibea wi asiala muloea, ea ilima gelola säla ïmalamalola säi. 29 Amala säsebegi, Abalahamaea säla obëgësalea, Ilida Mosesea ado säi dëdëla negei dibe amoge, bea sälo ilia ado säi dëdëla negei dibe amoge, galea. Ilida ilile ado amo nabuäiala säi. 30 Amala säsebegi, dolö amea sähalea, Ai, Naado Abalahama-o. Afädë baagoia amila nowela, ili neebea awäseda, ili asigi besumolömelëla säi. 31 Abalahamaea sähalea, Ilia Mosesea Ado säi dëdëla negei dibe amoge, bea sälo ilia ado säi dëdëla negei dibe amoge, made nabaseda, afädë baagoia amila nowela awäla säse amo nabalage, dofäla made helësëmolöla säimelëla Yesuea säi.

<- Ulugu 15Ulugu 17 ->