1 ሄዋ ድራዉ፥ ክርስቶሳ የሱሳና ደእያዋንቱ ቦላን ፕርዳይ ሀእ ባዋ፤ 2 አያዉ ጎፐ፥ ክርስቶሳ የሱሳ ባጋና ኑዉ ደኡዋ እምያ ጌሻ አያና ህጊ ታና [a] ናጋራ ህግያ አይለተꬃፐነ ሀይቁዋ ህግያ አይለተꬃፐ ከሴዳ። 3 አሳ አሳተꬃይ ዳቡራንቻ ግድያ ድራዉ፥ ህጊ ኦꬃናዉ ዳንዳይቤናዋ ጾሳይ ኦꬄዳ፤ ናጋራንቻቱዋ አሳተꬃ ማላ አሳተꬃና ደእያ ባረ ናኣ፥ አሳይ ኦꬄዳ ናጋራዉ ያርሹዋ ግዳናዉ ጾሳይ ኪቲደ፥ አሳ አሳተꬃ ግዶን ደእያ ናጋራ ፕርዴዳ። 4 ጌሻ አያናይ ኮይያዋዳን ደእያዋንቱፐ አትን፥ ኑ አሳተꬃይ ኮይያዋዳን ደአናዋንቱ ቦላ፥ ኑ ቦላ፥ ህግያ ጽሎ አዛዙ ፖለታና ማላ፥ ጾሳይ ሀዋ ኦꬄዳ።

5 ባረንቱ አሳተꬃይ ኮይያዋዳን ደእያዋንቱ ባረንቱ አሳተꬃባ ቆፒኖ፤ ሽን ጌሻ አያናይ ኮይያዋዳን ደእያዋንቱ ጌሻ አያናባ ቆፒኖ። 6 አሳተꬃባ ቆፉሳይ ሀይቁዋ አሄ፤ ሽን ጌሻ አያናባ ቆፉሳይ ደኡዋነ ሳሮተꬃ አሄ። 7 አሳተꬃባ ቆፉሳይ ጾሳዉ እጾ፤ አያዉ ጎፐ፥ አሳተꬃይ ጾሳ ህገዉ ኤኖ ጌና፤ ቃይ ኤኖ ጋናዉካ አዉ ዳንዳየተና። 8 ባረንቱ አሳተꬃዉ ኤኖ ግያዋንቱ ጾሳ ናሸቻናዉ ዳንዳይክኖ።

9 ሽን ጾሳ አያናይ ህንተንቱን ደኦፐ፥ ጌሻ አያናይ ግያዋዳን ደኢታፐ አትን፥ ህንተ አሳተꬃይ ኮይያዋዳን ደእክታ። ሽን ኦንነ ክርስቶሳ አያናይ ባይናዋ ግዶፐ፥ ሄ ኡራይ ክርስቶሳዋ ግደና። 10 ሽን ክርስቶስ ህንተንቱን ደኦፐ፥ ህንተ አሳተꬃይ ናጋራ ጋሱዋን ሀይቄዳዋ፤ ሽን ህንተ አያናይ ጽሎተꬃ ጋሱዋን ህንተንቱን ፓጻ ደኤ። 11 ሽን የሱሳ ሀይቁዋፐ ደንꬄዳ ጾሳ አያናይ ህንተ ግዶን ደኦፐ፥ ሀይቁዋፐ ክርስቶሳ ደንꬄዳ ጾሳይ ቃይ ህንተንቱን ደእያ ባረ ጌሻ አያናን፥ ሀይቂያ ህንተ አሳተꬃዉካ ደኡዋ እማና።

12 ስም ታናዳን አማንያዋንቶ፥ ኑን አጩዋና ደኤቶ፤ ኑ አሳተꬃይ ኮይያዋዳን ደአናዉ ኑዉ በሰና። 13 አያዉ ጎፐ፥ ህንተ ህንተ አሳተꬃይ ግያዋዳን ደኦፐ፥ ህንተ ሀይቃና፤ ሽን ህንተ ህንተ ናጋራ ኦሱዋ ጌሻ አያናን ዎꬎፐ፥ ፓጻ ደአና። 14 ጾሳ አያናይ ካለꬅያ ኡባቱ ጾሳ ናና። 15 አያዉ ጎፐ፥ ኑን ኑ ኮሻ ꬎቁ ኦꬂደ፥ “አባ! ታ አቦ” ያጊደ ጼስያ፥ ኑና ጾሳ ናና ከስያ ጌሻ አያና ጾሳፐ አኬዶፐ አትን፥ ላኤንꬁዋ ያያናዉ አይለ ከስያ አያና አክበይኮ። 16 ጾሳ አያናይ ባረ ሁጰዉ ኑ አያናና ግዲደ፥ ኑን ጾሳ ናና ግድያዋ ማርካቴ። 17 ኑን አ ናና ግዶፐ፥ እ ባረ አሳዉ ምንጄዳ አንጁዋ ላታና፤ ቃይ ኑን ጾሳይ ክርስቶሳዉ ምንጄዳዋካ አናና ላታና፤ ኑን ክርስቶሳ ዋይያ አናና ሻኮፐ፥ አ ቦንቹዋካ አናና ሻካና።

18 አያዉ ጎፐ፥ ኑን ሀእ ዋየትያ ዋይያ ኑዉ ስንꬃፐ ቆንጫና ቦንቹዋና ጋꬃናዉ፥ ኡባካ ዳንዳየተና ጋደ ታን ቆፓይ። 19 ጾሳይ መꬌዳ መታ ኡባይ ጾሳ ናናይ ቆንጫናዋ ሎይꬅ ላሞት ኡቴዳ። 20 አያዉ ጎፐ፥ መታ ኡባይ ማዱ ባይናባ ግዳናዳን፥ ጾሳይ አ ቦላ ፕርዴዳ፤ ስንꬃፐ ደማና ጊደ ናሸቻን ናግ ኡታናዳን ኦꬄዳ ጾሳይ ኮዬዳ ድራዉ ሀኔዳፐ አትን፥ መታ ኡባይ ባረ ሁጰዉ ኮዬዳዋን ግደና። 21 መታ ኡባይ ባረ ሁጰዉ ባሻ አይለተꬃፐ እት ጋላስ ከሳናዋ፤ ቃይ ሄ መታቱ ጾሳ ናናይ አይለተꬃፐ ከሴዳ ቦንቾ ከሳ ሻካና። 22 አያዉ ጎፐ፥ መታ ኡባይ እትፐ ሀዋ ጋካናዉ፥ ማጫ አሳ የሉ ኦይቂና ኦልያዋዳን፥ ሳኩዋን ኦልያዋ ኑን ኤሬቶ። 23 ቃይ ሄዋ ጻላላ ግደና፤ ኑን፥ ጌሻ አያና ጾሳ ባይራ እሞታዳን ኦꬂደ አኬዳዋንቱ፥ ኑ ሁጰዉ ጾሳይ ኑና ባረ ናና ኦꬃናዳንነ ኑ ኩመንꬃ አሳተꬃ ዎዛናዳን ናጊደ፥ ኑ ግዶን ኦሌቶ። 24 አያዉ ጎፐ፥ ኑን ጾሳይ እማና ጌዳዋን አቴዶ። ሽን ኑን ጾሳይ እማና ጌዳዋ በኦፐ፥ ያትና፥ ሄዌ ናሸቻን ናግያዋ ግደና፤ አያዉ ጎፐ፥ ባረ በእያዋ ደማና ጊደ፥ ናሸቻን ናግያዌ ኦኔ? 25 ሽን ኑን በኤናዋ ደማና ጊደ፥ ናሸቻን ናጎፐ፥ ሄዋ ዳንዳዪደ ናጌቶ።

26 ሀዋዳን ቃይ ጌሻ አያናይ ኑ ዳቡራ ማዳናዉ ዬ፤ አያዉ ጎፐ፥ ኑን ጾሳ ዎት ዎሳናዉ በስንቶ ኤሮኮ፤ ሽን ጌሻ አያናይ ባረ ሁጰዉ ቃላን ቆንጭሳናዉ ዳንዳየተና ኦልያን ኑዉ ጋናቴ። 27 ቃይ አሳ ዎዛና ብድያ ጾሳይ፥ ጌሻ አያናይ እ ኮይያዋዳን፥ ጾሳ ናቶ ጋናትያ ድራዉ፥ ጌሻ አያና ቆፋይ አየንቶ ኤሬ።

28 ጾሳይ ባረና ሲቅያዋንቶ፥ ባረ ቆፋዳን ጼሴዳዋንቶ፥ ኡባ የዉዋ ሎኦተꬃዉ ኦꬅያዋ ኑን ኤሬቶ። 29 ጾሳይ ባረ ናአይ ጮራ እሻቱዋ ግዶን ባይራ ግዳናዳን፥ እ ካሰ ኤሬዳዋንታ ቃይ ባረ ናኣ ማላታናዳን፥ ካሰቲደ ቆፋ ቃቼዳ። 30 ጾሳይ ካሰቲደ ቆፔዳዋንታ፥ ኡንቱንታ ቃይ ጼሴዳ፤ ሄ ጼሴዳዋንታካ ጌሼዳ፤ ሄ ጌሼዳዋንታካ ቃይ ቦንቼዳ።

31 ያትና፥ ኑን ሀዋ ኡባ ዋጋኔ? ጾሳይ ኑ ባጋ ግዶፐ፥ ኑና ኦን ኤቀታናዌ? 32 እ ሀራይ አቶ ባረ ናኣካ ዋይያፐ ጉየ አሽቤና፤ ሽን አ ኑዉ ኡባዉ አꬂደ እም አጌዳ። እ ባረ ናኣ እሜዳዌ ቃይ ኑዉ ኡባባ ጮ እመኔ?

33 ጾሳይ ዶሬዳዋንታ ኦኔ ሞታናዌ? ጾሳይ ባረ ሁጰዉ ኡንቱንታ ጽልሴዳ። 34 ያትና፥ ኡንቱንቱ ቦላ ፕርዳናዉ ዳንዳይያዌ ኦኔ? ሄዋ ጎፐ፥ ሀይቁዋፐ ደንዲደ፥ ጾሳፐ ኡሸቻ ባጋና ኡቴዳ፥ ክርስቶስ የሱሳ፤ እ ቃይ ኑዉ ጋናቴ።

35 ስም ኑና ክርስቶሳ ሲቁዋፐ ሻካናዌ ኦኔ? ዋዪ ዎይ መቱ ዎይ የደርሱ ዎይ ኮሻይ ዎይ ካሉ ዎይ ያሻይ ዎይ ኦላይ ኑና ሻካኔ? 36 ጾሳ ማጻፋይ፥ “ኑን ነ ድራዉ፥ ኡባ ጋላስ ሀይቄቶ፤ ሹካዉ አፍያ ዶርሳዳን ፓይደቴቶ” ያጌ። [b] 37 ሽን ኑን ኑና ሲቄዳ አን ሀ የዉዋ ኡባን ኑና ጾንያዋንቱፐ አꬌቶ።

38-39 አያዉ ጎፐ፥ ሀይቁዋ ግድና፥ ደኡዋ፥ ኪታንቻቱዋ ግድና፥ ሞድያዋንታ፥ ሀእ ደእያዋንታ ግድና፥ ስንꬃፐ ያናዋ፥ ዎልቃማቱዋ ግድና፥ ቦላ ሳሉዋ ግድና፥ ጋርሳ ሳኣ፥ አይ መታ ግድናካ፥ ኑ ጎዳ ክርስቶሳ የሱሳን ደእያ ጾሳ ሲቁዋፐ ኑና ሻካናዉ ዳንዳየናዋ ታን ኤራድ።

<- ሮመ 7ሮመ 9 ->